Read Papantla Totonac 2 Kronikanan 31 Bible Online

2 Kronikanan 31 - Papantla Totonac bible

2 Kronikanan 31

¹Awor ora tur esaki a yega na un fin, tur e israelitanan ku tabata presente a sali bai na e statnan di Juda, a kibra e pilarnan na pida-pida, a kap e imagennan di Asera bash'abou, i a basha e luganan haltu i e altarnan den henter Juda i Benjamin abou, i tambe den Efrain i Manases, te ora nan a destrui nan tur. E ora ei tur e yunan di Israel a bolbe na nan statnan, kada un na su propiedat.

²I Ezekias a nombra e divishonnan di e saserdotenan i e levitanan segun nan divishon, kada un segun su sirbishi, tantu e saserdotenan komo e levitanan, pa ofrendanan kima i pa ofrendanan di pas, pa sirbi, pa duna gradisimentu i pa alaba den e entradanan di e kampamentu di SENOR.

³Tambe el a stipula rei su porshon for di su propiedatnan pa e ofrendanan kima, esta, pa e ofrendanan kima di mainta i atardi, i e ofrendanan kima pa e dianan di sabat, pa e dianan di luna nobo i pa e fiestanan stipula, manera ta para skirbi den e lei di SENOR.

⁴Tambe el a ordena e pueblo ku tabata biba na Jerusalem pa duna e porshon debi na e saserdotenan i e levitanan, pa nan dedika nan mes na e lei di SENOR.

⁵I asina ku e ordu a plama, e yunan di Israel a provee na abundansia e prome frutanan di mainshi, bina nobo, zeta, miel i di tur loke kunuku ta produsi; i nan a trese na abundansia e diesmo di tur kos.

⁶I e yunan di Israel i di Juda ku tabata biba den e statnan di Juda, tambe a trese e diesmo di buey i di karne i e diesmo di e regalonan santu ku tabata konsagra na SENOR nan Dios, i a pone nan na monton.

⁷Den e di tres luna nan a kuminsa traha e montonnan, i a keda kla den e di shete luna.

⁸I ora ku Ezekias i e gobernantenan a bin i a mira e montonnan, nan a bendishona SENOR i Su pueblo Israel.

⁹E ora ei Ezekias a puntra e saserdotenan i e levitanan tokante di e montonnan.

¹⁰I Azarias, sumosaserdote di e kas di Zadok, a bis'e: "Desde ku nan a kuminsa trese e kontribushonnan den e kas di SENOR, nos tabatin sufisiente di kome i nos a sobra hopi, pasobra SENOR a bendishona Su pueblo; i e kantidat grandi aki a sobra."

¹¹Anto Ezekias a ordena nan pa prepara kambernan den e kas di SENOR, i nan a prepara nan.

¹²I fielmente nan tabata trese e kontribushonnan, e diesmonan i e kosnan konsagra; i e levita Konanias tabata e ofisial ku tabatin enkargo di nan, i su ruman homber Simei tabata e di dos.

¹³I Jehiel, Azazias, Nahat, Asael, Jerimot, Jozabad, Eliel, Ismakias, Mahat i Benaia tabata mayordomo bou di outoridat di Konanias i su ruman homber Simei, nombra pa rei Ezekias, i Azarias tabata e ofisial prinsipal di e kas di Dios.

¹⁴I Kore, yu homber di e levita Imna, wardado-di-porta na e entrada di e porta pariba, tabatin enkargo di e ofrendanan boluntario pa Dios, pa parti e kontribushonnan pa SENOR i e kosnan di mas santu.

¹⁵Eden, Miniamin, Jesua, Semaias, Amarias i Sekanias, tabata yud'e fielmente den e statnan di e saserdotenan dor di distribui porshonnan na nan rumannan, segun nan divishonnan, tantu na e bieunan komo na e hobennan.

¹⁶Ademas, nan tabata distribui porshonnan na e hombernan di trinta ana p'ariba, kende nan nombernan tabata den e registronan genealogiko-- tur ku tabata drenta e kas di SENOR pa kumpli ku nan varios obligashonnan di tur dia, segun nan responsabilidatnan i nan divishonnan.

¹⁷I nan tabata distribui porshonnan na e saserdotenan ku tabata inskribi segun e kas di nan tatanan den e registro genealogiko, i tambe na e levitanan for di binti ana p'ariba, segun nan responsabilidatnan i nan divishonnan.

¹⁸I e registro genealogiko tabata inklui tur nan yunan chikitu, nan esposanan, nan yu hombernan i nan yu muhenan, pa henter e asamblea, pasobra nan a konsagra nan mes fielmente den santidat.

¹⁹Tambe pa e yu hombernan di Aaron, e saserdotenan ku tabata den e luganan di yerba berde di nan statnan, of den kualke stat, tabatin hombernan ku a wordu designa na nan nomber, pa distribui porshonnan na kada homber entre e saserdotenan i na kada un ku tabata registra segun genealogia entre e levitanan.

²⁰I asina Ezekias a hasi den henter Juda; i el a hasi loke tabata bon, hustu, i berdat dilanti di SENOR su Dios.

²¹I tur obra ku el a kuminsa den e sirbishi di e kas di Dios den e lei i e mandamentu, buskando su Dios, el a hasi ku henter su kurason; i asina el a prospera.