Read Papantla Totonac 2 Kronikanan 32 Bible Online

2 Kronikanan 32 - Papantla Totonac bible

2 Kronikanan 32

¹Despues di e echonan di fieldat aki Senakerib, rei di Asiria, a bin i a invadi Juda i a rondona e statnan fortifika, ku intenshon di kibra drenta nan pa su mes.

²Awor ora ku Ezekias a mira ku Senakerib a bin, i ku e tabatin intenshon di hasi guera kontra Jerusalem,

³el a disidi, huntu ku su ofisialnan i su guereronan, pa korta e provishon di awa for di e fuentenan di awa ku tabata pafo di stat; i nan a yud'e.

⁴Pesei, hopi hende a reuni i a dempel tur e fuentenan di awa i e roi ku tabata kore den e region, bisando: "Pakiko e reinan di Asiria mester bin hana awa na abundansia?"

⁵I el a tuma kurashi i a bolbe lanta henter e muraya ku a keda basha abou, i a lanta torennan riba dje i a traha un otro muraya parti pafo, a fortifika e sitadel den e stat di David i a traha arma i eskudo na gran kantidat.

⁶Tambe el a nombra ofisialnan militar riba e pueblo, i a reuni nan serka dje riba e plenchi na porta di e stat i a enkurasha nan, bisando:

⁷"Sea fuerte i tene kurashi; no tene miedu ni desmaya pa motibu di rei di Asiria, ni pa motibu di henter e multitut ku ta huntu kune; pasobra Esun ku ta ku nos ta mas grandi ku esun ku ta kune.

⁸E tin solamente un brasa di karni kune, ma nos tin SENOR nos Dios huntu ku nos, pa yuda nos i pa bringa nos batayanan." I e pueblo a konfia den e palabranan di Ezekias, rei di Juda.

⁹Despues di esaki Senakerib, rei di Asiria, a manda su sirbidonan na Jerusalem, mientras ku e tabata rondona Lakis ku tur su trupanan huntu kune, kontra Ezekias, rei di Juda, i kontra henter Juda ku tabata na Jerusalem, bisando:

¹⁰"Asina Senakerib, rei di Asiria, ta bisa: 'Den kiko boso ta konfia, ku boso ta keda na Jerusalem mientras ku e ta rondona?

¹¹No ta gana Ezekias ta gana boso, pa laga boso muri di hamber i di set, bisando: "SENOR nos Dios lo libra nos for di man di rei di Asiria"?

¹²E mesun Ezekias aki no a kita Su luganan haltu i Su altarnan, i a bisa Juda i Jerusalem: "Dilanti di un altar so boso mester adora i riba dje boso mester kima sensia"?

¹³'Boso no sa kiko ami ku mi tatanan a hasi ku tur e pueblonan di e teranan? Akaso e diosnan di e nashonnan di e teranan tabata kapas pa libra nan tera for di mi man?

¹⁴Kende tabatin entre tur e diosnan di e nashonnan ei ku mi tatanan a destrui kompletamente, ku por a libra su pueblo for di mi man, ku boso Dios por ta kapas pa libra boso for di mi man?

¹⁵Pesei anto, no laga Ezekias persuadi boso, ni gana boso di e manera aki, i no ker'e, pasobra ningun dios di ningun nashon of reino tabata kapas pa libra su pueblo for di mi man, ni for di man di mi tatanan. Kuantu menos boso Dios lo por libra boso for di mi man?'"

¹⁶I su sirbidonan a sigui papia kontra SENOR Dios i kontra Su sirbido Ezekias.

¹⁷Tambe el a skirbi kartanan pa blasfema e SENOR Dios di Israel i pa papia kontra djé, bisando: "Meskos ku e diosnan di e nashonnan di e teranan no a libra nan pueblo for di mi man, asina e Dios di Ezekias lo no libra Su pueblo for di mi man."

¹⁸I nan a grita esaki na bos haltu na e idioma di Juda, pa e pueblo di Jerusalem ku tabata riba e muraya tende, pa spanta i terorisa nan, pa nan por kohe e stat.

¹⁹I nan a papia di e Dios di Jerusalem na e mesun manera ku di e diosnan di e pueblonan di e tera--e obra di man di hende.

²⁰Ma rei Ezekias i profeta Isaias, yu homber di Amos, a hasi orashon tokante di esaki i a sklama na shelu.

²¹I SENOR a manda un angel ku a destrui tur guerero poderoso, komandante i ofisial, den e kampamentu di rei di Asiria. Asina ta ku el a bolbe ku berguensa na su mes tera. I ora ku el a drenta tempel di su dios, algun di su mes yunan a mat'e ayanan ku spada.

²²Asina SENOR a salba Ezekias i e habitantenan di Jerusalem for di man di Senakerib, rei di Asiria, i for di man di tur otronan, i a guia nan na tur banda.

²³I hopi hende tabata trese ofrendanan pa SENOR na Jerusalem, i regalonan di balor pa Ezekias, rei di Juda, asina ku el a wordu halsa den bista di tur nashon despues di esaki.

²⁴Den e dianan ei Ezekias a bira malu pa muri; i el a hasi orashon na SENOR, i SENOR a papia kune i a dun'e un senal.

²⁵Ma Ezekias no a mustra gratitut pa e bondat ku el a risibi, pasobra su kurason tabata orguyoso; pesei e furia di SENOR a bin riba dje i riba Juda i Jerusalem.

²⁶Sinembargo, Ezekias a umiya e orguyo di su kurason, tantu e komo e habitantenan di Jerusalem, asina ku e furia di SENOR no a bin riba nan den e dianan di Ezekias.

²⁷Awor Ezekias tabatin masha hopi rikesa i onor; i el a traha pa su mes luganan-di-warda-tesoro pa plata, oro, piedra presioso, speserei, eskudo i tur sorto di artikulo di balor,

²⁸tambe depositonan pa e produktonan di mainshi, bina i zeta, stal pa tur sorto di bestia di kria i kura pa e tounan di karne.

²⁹I el a traha statnan pa su mes, i a akumula tounan di bestia chikitu i krianan di baka na abundansia; pasobra Dios a dun'e masha hopi rikesa.

³⁰Ta Ezekias a dempel e salida di awa di e parti ariba na Gihon i a kondusie na e parti pabou di e stat di David. I Ezekias a prospera den tur loke ku el a hasi.

³¹Ma relashona ku e delegashon di e gobernantenan di Babilonia, kendenan a manda puntr'e tokante di e maraviya ku a sosode na e tera, Dios a lagu'e pa pon'e na prueba, pa E por a sa tur loke tabatin den su kurason.

³²Awor e demas echonan di Ezekias i su aktonan di deboshon, mira, nan ta para skirbi den e vishon di profeta Isaias, yu homber di Amos, den e Buki di reinan di Juda i Israel.

³³Asina Ezekias a bai sosega serka su tatanan i nan a der'e den e sekshon mas ariba di e tumbanan di e yu hombernan di David; i henter Juda i e habitantenan di Jerusalem a onr'e na su morto. I su yu homber Manases a bira rei na su luga.