Read Papantla Totonac 2 Kronikanan 33 Bible Online

2 Kronikanan 33 - Papantla Totonac bible

2 Kronikanan 33

¹Manases tabatin diesdos ana dia ku el a bira rei, i el a reina sinkuent'i sinku ana na Jerusalem.

²I el a hasi malu den bista di SENOR, konforme e abominashonnan di e nashonnan ku SENOR a kita for di dilanti di e yunan di Israel.

³Pasobra el a rekonstrui e luganan haltu ku su tata Ezekias a bash'abou; tambe el a lanta altarnan pa e Baalnan i a traha imagennan di Asera, i a adora henter e ehersito di shelu i a sirbi nan.

⁴I el a traha altarnan den e kas di SENOR, di kual SENOR a bisa: "Mi nomber lo ta na Jerusalem pa semper."

⁵Pasobra el a traha altarnan pa henter e ehersito di shelu riba e dos plenchinan di e kas di SENOR.

⁶I el a hasi su yu hombernan pasa dor di kandela den e vaye di Ben-hinom; i el a hasi bruheria, a uza adivinashon, a praktika okultismo i a konsulta ku montado i spiritista. El a hasi hopi maldat den bista di SENOR i a probok'E na rabia.

⁷Anto el a pone e imagen graba di e idolo ku el a traha den e kas di Dios, di kual Dios a bisa David i su yu homber Salomon: "Den e kas aki i na Jerusalem, ku Mi a skohe for di tur e tribunan di Israel, lo Mi pone Mi nomber pa semper;

⁸i lo Mi no bolbe kita pia di Israel for di e tera ku Mi a apunta pa boso tatanan, kontal ku nan perkura di hasi tur loke Mi a ordena nan, konforme henter e lei, e statutonan i e ordenansanan duna pa medio di Moises."

⁹Asina Manases a gana Juda i e habitantenan di Jerusalem, pa hasi mas maldat ku e nashonnan ku SENOR a destrui dilanti di e yunan di Israel.

¹⁰I SENOR a papia ku Manases i su pueblo, ma nan no a hasi kaso.

¹¹Pesei SENOR a trese e komandantenan di e ehersito di rei di Asiria kontra nan, i nan a kaptura Manases ku hak, a mar'e ku kadena di brons i a hib'e Babilonia.

¹²I ora ku e tabata den angustia, el a roga na SENOR su Dios i a umiya su mes grandemente dilanti di e Dios di su tatanan.

¹³Ora ku el a hasi orashon na djé, El a keda konmovi dor di su rogamentu i a tende su suplika, i a hib'e atrobe na Jerusalem na su reino. E ora ei Manases a rekonose ku SENOR ta Dios.

¹⁴Awor despues di esaki el a traha e muraya di pafo di e stat di David, pabou di Gihon, den e vaye, te na entrada di e Porta di Piska; i el a lant'e tur ront di Ofel i a hasie masha haltu mes. Anto el a pone komandantenan di ehersito den tur e statnan fortifika di Juda.

¹⁵Tambe el a kita e diosnan stranhero i e idolo for di e kas di SENOR, tambe tur e altarnan ku el a traha riba e seru di e kas di SENOR i na Jerusalem; i el a tira nan pafo di e stat.

¹⁶I el a lanta e altar di SENOR i a sakrifika ofrendanan di pas i ofrendanan di gradisimentu riba dje; i el a ordena Juda pa sirbi e SENOR Dios di Israel.

¹⁷Sinembargo, e pueblo a sigui ofrese sakrifisio riba e luganan haltu, ounke solamente na SENOR nan Dios.

¹⁸Awor e demas echonan di Manases, asta su orashon na su Dios, i e palabranan di e miradonan ku a papia kune den nomber di e SENOR Dios di Israel, mira, nan ta para skirbi den e bukinan di e reinan di Israel.

¹⁹Tambe su orashon i kon el a roga na Dios, i tur su pikanan, su infieldat i e sitionan kaminda el a traha luganan haltu i a lanta e imagennan di Asera i e imagennan graba, prome ku el a umiya su mes, mira, nan ta para skirbi den e bukinan di e miradonan.

²⁰Asina Manases a bai sosega serka su tatanan, i nan a der'e den su mes kas. I su yu homber Amon a bira rei na su luga.

²¹Amon tabatin bint'i dos ana dia ku el a bira rei, i el a reina dos ana na Jerusalem.

²²I el a hasi malu den bista di SENOR, manera su tata Manases a hasi, i Amon a ofrese sakrifisio na tur e imagennan graba ku su tata Manases a traha, i el a sirbi nan.

²³Ademas, e no a umiya su mes dilanti di SENOR, manera su tata Manases a hasi, ma Amon a oumenta su kulpabilidat.

²⁴Finalmente su sirbidonan a konspira kontra dje i a mat'e den su mes kas.

²⁵Ma e hendenan di e tera a mata tur esnan ku a konspira kontra rei Amon, i e hendenan di e tera a hasi su yu homber Josias rei na su luga.