Read Papantla Totonac 2 Kronikanan 34 Bible Online

2 Kronikanan 34 - Papantla Totonac bible

2 Kronikanan 34

¹Josias tabatin ocho ana dia ku el a bira rei, i el a reina trint'i un ana na Jerusalem.

²I el a hasi bon den bista di SENOR i a kana den e kamindanan di su tata David, i no a desvia ni na man drechi ni na man robes.

³Pasobra den e di ocho ana di su reinado, mientras ku e tabata un hoben ainda, el a kuminsa buska e Dios di su tata David; i den e di diesdos ana el a kuminsa purifika Juda i Jerusalem i a kita e luganan haltu, e imagennan di Asera, e imagennan graba i e imagennan basha.

⁴I den su presensia nan a basha e altarnan di e Baalnan abou, i e altarnan pa kima sensia ku tabata poni mas haltu ku nan, el a kap na pida-pida; tambe e imagennan di Asera, e imagennan graba i e imagennan basha el a kibra na pida-pida, a garna nan hasi nan stof i a stroi esaki riba e grafnan di esnan ku a ofrese sakrifisio na nan.

⁵Despues el a kima e wesunan di e saserdotenan riba nan altarnan i a purifika Juda i Jerusalem.

⁶I den e statnan di Manases, Efrain, Simeon, te na Neftali i den e ruinanan ront di nan,

⁷tambe el a basha e altarnan abou i a bati e imagennan di Asera i e imagennan graba hasi nan stof, i a kap tur e altarnan di kima sensia den henter tera di Israel na pida-pida. Despues el a bai Jerusalem bek.

⁸Awor den e di diesocho ana di su reinado, ora ku el a kaba di purifika e tera i e kas, el a manda Safan, yu homber di Azalia, i Maaseias, un ofisial di e stat, i Joa, yu homber di Joakaz, e registrado, pa drecha e kas di SENOR su Dios.

⁹I nan a bin serka sumosaserdote Hilkias i a entrega e plaka ku a wordu tresi den e kas di Dios, ku e levitanan, e wardadonan-di-porta, a kolekta for di Manases i Efrain, i for di henter e restante di Israel, for di henter Juda i Benjamin i e habitantenan di Jerusalem.

¹⁰E ora ei nan a entrega esaki den man di e trahadonan ku tabatin enkargo di e kas di SENOR; i e trahadonan ku tabata traha den e kas di SENOR a uza esaki pa restora i drecha e kas.

¹¹I nan, na nan turno, a entrega esaki na e karpintenan i na e trahadonan den konstrukshon pa kumpra piedra gekap i palu pa e konekshonnan, i pa traha balki pa e kasnan ku e reinan di Juda a laga para bira ruina.

¹²I e hombernan a hasi e trabou fielmente, ku forman riba nan pa supervisa: Jahat i Abdias, e levitanan di e yu hombernan di Merari, Zakarias i Mesulam di e yu hombernan di e koatitanan i e levitanan, tur ku tabata eksperto den tokamentu di instrument di muzik.

¹³Tambe nan tabata riba e kargadonan di kos pisa i tabata supervisa tur e trahadonan den kualke trabou; i algun di e levitanan tabata eskriba, ofisial i wardado-di-porta.

¹⁴Ora nan tabata saka e plaka ku a wordu tresi den e kas di SENOR, saserdote Hilkias a hana e buki di lei di SENOR, duna pa medio di Moises.

¹⁵I Hilkias a kontesta i a bisa Safan, e eskriba: "Mi a hana e buki di lei den e kas di SENOR." I Hilkias a duna Safan e buki.

¹⁶E ora ei Safan a hiba e buki pa rei i a debolbe esaki na rei, bisando: "Tur loke bo a konfia bo sirbidonan pa hasi, nan ta hasi.

¹⁷Tambe nan a saka e plaka ku nan a hana den e kas di SENOR i a entregu'e den man di e formannan i e trahadonan."

¹⁸Ademas, Safan, e eskriba, a konta rei, bisando: "Saserdote Hilkias a dunami un buki." I Safan a lesa for di dje den presensia di rei.

¹⁹I a sosode ku ora rei a tende e palabranan di e lei, el a sker su pananan.

²⁰E ora ei rei a ordena Hilkias, Ahikam, yu homber di Safan, Abdon, yu homber di Mikaias, Safan, e eskriba, i Asaias, e sirbido di rei, bisando:

²¹"Bai, konsulta ku SENOR pa mi i pa esnan ku a keda na Israel i na Juda, tokante di e palabranan di e buki ku a wordu hana; pasobra grandi ta e furia di SENOR ku ta wordu basha riba nos, pasobra nos tatanan no a kumpli ku e palabra di SENOR, pa hasi konforme tur loke ta para skirbi den e buki aki."

²²Asina Hilkias i esnan ku rei a nombra a bai serka Hulda, e profeta muhe, esposa di Salum, yu homber di Tokat, yu homber di Hasra, wardado di e kashi-di-warda-pana (awor Hulda tabata biba na Jerusalem den e di Dos Bario); i nan a papia kune tokante di esaki.

²³I el a bisa nan: "Asina SENOR, e Dios di Israel, ta bisa: 'Bisa e homber ku a manda boso serka Mi,

²⁴asina SENOR ta bisa: "Mira, Mi ta bai trese kalamidat riba e luga aki i riba su habitantenan, esta, tur e maldishonnan ku ta para skirbi den e buki ku nan a lesa den presensia di rei di Juda.

²⁵Pasobra nan a bandonaMi i a kima sensia na otro diosnan, pa nan por a probokaMi na rabia ku tur e obranan di nan man, pesei Mi rabia lo wordu basha riba e luga aki, i e lo no wordu paga."'

²⁶Ma na rei di Juda, kende a manda boso pa konsulta ku SENOR, asin'aki boso mester bis'e: 'Asina e SENOR Dios di Israel ta bisa tokante di e palabranan ku bo a tende:

²⁷"Pasobra bo kurason tabata moli i bo a umiya bo mes dilanti di Dios, ora bo a tende Su palabranan kontra e luga aki i kontra su habitantenan, i pasobra bo a umiya bo mes Mi dilanti, a sker bo pananan i a yora Mi dilanti, di berdat Mi a tendebo," SENOR ta deklara.

²⁸"Mira, lo Mi reunibo ku bo tatanan i lo bo baha den bo graf na pas, asina ku bo wowo lo no mira tur e kalamidat ku Mi lo trese riba e luga aki i riba su habitantenan.

²⁹E ora ei rei a manda rospondi i a reuni tur e ansianonan di Juda i di Jerusalem serka dje.

³⁰I rei a bai na e kas di SENOR huntu ku tur e hombernan di Juda, e habitantenan di Jerusalem, e saserdotenan, e levitanan i henter e pueblo, for di esun di mas grandi te na esun di mas chikitu; i el a lesa pa nan tende tur e palabranan di e buki di e aliansa ku a wordu hana den e kas di SENOR.

³¹E ora ei rei a bai para na su luga i a sera un aliansa dilanti di SENOR, pa sigui SENOR i pa warda Su mandamentunan, Su testimonionan i Su statutonan ku henter su kurason i ku henter su alma, pa kumpli ku e palabranan di e aliansa ku ta para skirbi den e buki aki.

³²Ademas, el a hasi tur ku tabata presente na Jerusalem i Benjamin para huntu kune. Asina e habitantenan di Jerusalem a hasi konforme e aliansa di Dios, e Dios di nan tatanan.

³³I Josias a kita tur e abominashonnan for di tur e paisnan ku tabata pertenese na e yunan di Israel, i a hasi tur ku tabata presente na Israel sirbi SENOR nan Dios. Durante di henter su bida nan no a laga di sigui e SENOR Dios di nan tatanan.