Read Papantla Totonac 2 Kronikanan 35 Bible Online

2 Kronikanan 35 - Papantla Totonac bible

2 Kronikanan 35

¹Despues Josias a selebra Pasku na SENOR na Jerusalem, i nan a mata e bestianan di Pasku riba e di dieskuater dia di e prome luna.

²I el a pone e saserdotenan den nan puesto i a enkurasha nan pa e sirbishi di e kas di SENOR.

³Tambe el a bisa e levitanan ku tabata duna sinansa na henter Israel i ku tabata santu pa SENOR: "Pone e arka santu den e kas ku Salomon, yu homber di David, rei di Israel, a traha; e lo no ta un karga mas riba boso skouder. Awor sirbi SENOR boso Dios i Su pueblo Israel.

⁴I prepara boso mes segun e kasnan di boso tatanan den boso divishonnan, konforme e instrukshon di David, rei di Israel, i konforme e instrukshon di su yu homber Salomon.

⁵"Ademas, para den e luga santu, segun e divishonnan di e kasnan di e tatanan di boso rumannan, e yunan di tera, i segun e levitanan, konforme e divishonnan di e kasnan di e tatanan.

⁶Awor, mata e bestianan di Pasku, santifika boso mes, i prepara boso rumannan pa nan hasi konforme e palabra di SENOR pa medio di Moises."

⁷I Josias a kontribui pa e yunan di tera, pa tur ku tabata presente, tounan di lamchi i di yu di kabritu, tur pa e ofrendanan di Pasku, un total di trinta mil, plus tres mil bishe machu; esakinan tabata for di rei su mes propiedat.

⁸Su ofisialnan tambe a kontribui ku un ofrenda boluntario pa e pueblo, e saserdotenan i e levitanan. Hilkias, Zakarias i Jehiel, e ofisialnan di e kas di Dios, a duna e saserdotenan pa e ofrendanan di Pasku dos mil seis shen bestia chikitu i tres shen bishe machu.

⁹Tambe Konanias ku su ruman hombernan Semaias i Natanael, i Hasabias, Jeiel i Jozabad, e ofisialnan di e levitanan, a duna e levitanan sinku mil bestia chikitu i sinku shen bishe machu pa e ofrendanan di Pasku.

¹⁰Asina e sirbishi a wordu prepara, i e saserdotenan a para na nan luga i e levitanan segun nan divishon, konforme e ordu di rei.

¹¹I nan a mata e bestianan di Pasku, i mientras ku e saserdotenan tabata sprengu e sanger risibi for di nan man, e levitanan tabata soya nan.

¹²Despues nan a aparta e ofrendanan kima pa nan duna nan na e divishonnan di e kasnan di e tatanan di e yunan di tera, pa ofrese nan komo sakrifisio na SENOR, manera ta para skirbi den e buki di Moises. Asina nan a hasi tambe ku e bishenan machu.

¹³Asina nan a roster e bestianan di Pasku riba e kandela, konforme e ordenansa, i nan a herebe e kosnan santu den wea, den ketel i den panchi, i lihe lihe nan a hiba nan pa tur e yunan di tera.

¹⁴I despues nan a prepara pa nan mes i pa e saserdotenan, pasobra e saserdotenan, e yu hombernan di Aaron, tabata ofrese e ofrendanan kima i e vet te anochi; pesei, e levitanan a prepara pa nan mes i pa e saserdotenan, e yu hombernan di Aaron.

¹⁵E kantadonan, e yu hombernan di Asaf, tambe tabata na nan luga, konforme e ordu di David, Asaf, Heman i Jedutun, e mirado di rei; i e wardadonan-di-porta na kada porta no tabatin mester di kita for di nan sirbishi, pasobra nan ruman hombernan, e levitanan, a prepara pa nan.

¹⁶Asina henter e sirbishi di SENOR a wordu prepara riba e dia ei pa selebra Pasku, i pa ofrese ofrendanan kima riba e altar di SENOR, konforme e ordu di rei Josias.

¹⁷Asina e yunan di Israel ku tabata presente a selebra Pasku na e tempu ei, i e Fiesta di Pan Sin Zurdeg, shete dia largu.

¹⁸I nan no a selebra un Pasku asina na Israel desde e dianan di profeta Samuel; tampoko ningun di e reinan di Israel no a selebra un Pasku asina manera Josias a hasi huntu ku e saserdotenan, e levitanan, henter Juda i Israel ku tabata presente, i e habitantenan di Jerusalem.

¹⁹Nan a selebra e Pasku aki den e di diesocho ana di e reinado di Josias.

²⁰Despues di tur esaki, ora ku Josias a pone e tempel na ordu, Neko, rei di Egipto, a bin pa hasi guera na Karkemis banda di Riu Eufrates, i Josias a sali bai pa enfrent'e.

²¹Ma Neko a manda mensaheronan serka dje, bisando: "Kiko nos tin di hasi ku otro, O rei di Juda? No ta kontra bo mi ta bin awe, sino kontra e kas ku mi ta na guera kune, i Dios a mandami hasi lihe. Pa bo mes bon, stop di opone Dios, Kende ta ku mi, pa E no destruibo."

²²Sinembargo, Josias no kier a retira for di dje, ma a disfrasa su mes pa bai bringa kontra dje; ni e no a tende na e palabranan di Neko, kualnan tabata bin for di boka di Dios, ma a bin pa bringa den e sabana di Meguido.

²³I e tiradonan di flecha a tira rei Josias, i rei a bisa su sirbidonan: "Hibami for di aki, pasobra mi ta gravemente herida."

²⁴Asina su sirbidonan a sak'e for di e garoshi i a kargu'e hiba den e di dos garoshi ku e tabatin, i a hib'e Jerusalem kaminda el a muri i a wordu dera den e tumbanan di su tatanan. I henter Juda i Jerusalem a tene rou pa Josias.

²⁵E ora ei Jeremias a kanta un lamento pa Josias. I tur e kantadonan homber i muhe ta menshona Josias den nan lamentashonnan te dia djawe. I nan a hasi nan bira un kustumber fiho na Israel; mira, nan ta para skirbi tambe den e Lamentashonnan.

²⁶Awor e demas echonan di Josias i su obranan di deboshon, manera ta para skirbi den lei di SENOR,

²⁷i su echonan, for di prome te delaster, mira, nan ta para skirbi den e Buki di reinan di Israel i Juda.