Read Papantla Totonac 2 Kronikanan 36 Bible Online

2 Kronikanan 36 - Papantla Totonac bible

2 Kronikanan 36

¹E ora ei e pueblo di e tera a skohe Joakaz, yu homber di Josias, i a hasie rei na Jerusalem na luga di su tata.

²Joakaz tabatin bint'i tres ana dia ku el a bira rei, i el a reina tres luna na Jerusalem.

³E ora ei rei di Egipto a bah'e for di trono na Jerusalem, i a pone un but di shen talento di plata i un talento di oro riba e tera.

⁴I rei di Egipto a hasi su ruman homber Eliakim rei di Juda i Jerusalem, i a kambia su nomber pa Joakim. Ma Neko a bai ku su ruman homber Joakaz i a hib'e Egipto.

⁵Joakim tabatin bint'i sinku ana dia ku el a bira rei, i el a reina diesun ana na Jerusalem; i el a hasi malu den bista di SENOR su Dios.

⁶Nabukodonosor, rei di Babilonia, a bin kontra dje i a mar'e ku kadena di brons pa hib'e Babilonia.

⁷Tambe Nabukodonosor a hiba algun di e artikulonan-di-uzo di e kas di SENOR na Babilonia i a pone nan den su tempel na Babilonia.

⁸Awor e demas echonan di Joakim i e abominashonnan ku el a hasi, i loke a wordu hana kontra dje, mira, nan ta para skirbi den e Buki di reinan di Israel i Juda. I su yu homber Joakin a bira rei na su luga.

⁹Joakin tabatin ocho ana dia ku el a bira rei i el a reina tres luna i dies dia na Jerusalem, i el a hasi malu den bista di SENOR.

¹⁰I na kuminsamentu di ana rei Nabukodonosor a manda busk'e i a hib'e Babilonia huntu ku e artikulonan di balor di e kas di SENOR, i el a hasi Zedekias, tio di Joakin, rei di Juda i Jerusalem.

¹¹Zedekias tabatin bint'i un ana dia ku el a bira rei, i el a reina diesun ana na Jerusalem.

¹²I el a hasi malu den bista di SENOR su Dios; e no a umiya su mes dilanti di profeta Jeremias, kende a papia pa SENOR.

¹³I tambe el a rebeldia kontra rei Nabukodonosor, kende a pon'e hasi un huramentu dilanti di Dios. Ma el a hasi su nek steif i a hasi su kurason duru pa no bolbe serka e SENOR Dios di Israel.

¹⁴Ademas, tur e ofisialnan di e saserdotenan i e pueblo tabata masha infiel i tabata sigui tur e abominashonnan di e nashonnan; i nan a kontamina e kas di SENOR ku El a santifika na Jerusalem.

¹⁵I SENOR, e Dios di nan tatanan, a manda palabra pa nan bes tras bes pa medio di Su mensaheronan, pasobra E tabatin kompashon di Su pueblo i di Su luga di biba;

¹⁶ma kontinuamente nan tabata hasi bofon di e mensaheronan di Dios, i tabata despresia Su palabranan i hasi bofon di Su profetanan, te ora ku e furia di SENOR a lanta kontra Su pueblo, te ora ku no tabatin remedi mas.

¹⁷Pesei El a lanta rei di e kaldeonan kontra nan, kendenan a mata nan hombernan hoben ku spada den e kas di nan santuario, i no tabatin kompashon di e homber hoben, ni di e birgen, e hende grandi ni e ansiano; El a entrega nan tur den su man.

¹⁸I tur e artikulonan-di-uzo di e kas di Dios, grandi i chikitu, i e tesoronan di e kas di SENOR, e tesoronan di rei i di su ofisialnan, el a hiba tur Babilonia.

¹⁹E ora ei nan a kima e kas di Dios, i a basha e muraya di Jerusalem abou, a pega tur su edifisionan fortifika na kandela, i a destrui tur su artikulonan di balor.

²⁰I esnan ku a skapa for di spada, el a hiba prezo na Babilonia; i nan tabata sirbido di dje i di su yu hombernan te ora ku e reino di Persia a bin na poder,

²¹pa kumpli ku e palabra di SENOR pa medio di boka di Jeremias, te ora ku e tera a gosa di su sabatnan. Tur e dianan di su desolashon el a tene sabat te ora setenta ana a wordu kompleta.

²²Awor den e di prome ana di Siro, rei di Persia--pa e palabra di SENOR pa medio di boka di Jeremias wordu kumpli—SENOR a anima e spiritu di Siro, rei di Persia, asina ku el a manda un proklamashon dor di henter su reino, i tambe a hasi esaki por eskrito, bisando:

²³"Asina Siro, rei di Persia, ta bisa: 'SENOR, e Dios di shelu, a dunami tur e reinonan di tera, i El a mandami traha un kas p'E na Jerusalem ku ta keda na Juda. Esun ku ta meimei di boso di henter Su pueblo, ku SENOR su Dios sea kune, i lagu'e subi bai!'"