Read Papantla Totonac 2 Kronikanan 4 Bible Online

2 Kronikanan 4 - Papantla Totonac bible

2 Kronikanan 4

¹E ora ei el a traha un altar di brons, binti kodo largu i binti kodo hanchu i dies kodo haltu.

²Tambe el a traha e laman di metal basha, dies kodo di rant pa rant, di forma rondo; i su haltura tabata sinku kodo i un lina-di-midi di trinta kodo por a pasa ront di dje.

³Awor tabatin figuranan manera buey bou di dje i tur ront di dje, dies kodo, ku tabata rondona e laman kompletamente. E bueynan tabata den dos kareda, basha tur na un.

⁴E tabata para riba diesdos buey, tres kara panort, tres kara pabou, tres kara pasuit i tres kara pariba; i e laman tabata poni riba nan, i tur nan parti patras tabata den direkshon paden.

⁵I e tabata mes diki ku hanchura di un man, i su rant tabata traha manera rant di un kopa, manera un flor di leli; e por a kontene tres mil bato.

⁶Tambe el a traha dies labamano pa laba aden, i el a pone sinku na banda drechi i sinku na banda robes, pa spula e kosnan pa e ofrenda kima; ma e laman tabata pa e saserdotenan laba nan mes aden.

⁷E ora ei el a traha e dies kandelanan di oro na e manera ku a wordu preskribi pa nan, i el a pone nan den e tempel, sinku na banda drechi i sinku na banda robes.

⁸Tambe el a traha dies mesa i a pone nan den e tempel, sinku na banda drechi i sinku na banda robes. I el a traha shen komchi di oro.

⁹Anto el a traha e plenchi di e saserdotenan i e plenchi grandi i portanan pa e plenchi, i a fura nan portanan ku brons.

¹⁰I el a pone e laman na banda drechi di e kas den direkshon suit-ost.

¹¹Tambe Huram a traha e hemchinan, e skopnan i e komchinan. Asina Huram a termina e trabou ku e tabata hasi pa rei Salomon den e kas di Dios:

¹²e dos pilarnan, e bolanan i e dos kapitelnan riba kabes di e pilarnan, i e dos knopwerknan pa tapa e dos bolanan di e kapitelnan ku tabata riba kabes di e pilarnan,

¹³i e kuater shen granatapelnan pa e dos knopwerknan, dos kareda di granatapel pa kada knopwerk, pa tapa e dos bolanan di e kapitelnan ku tabata riba e pilarnan.

¹⁴Tambe el a traha e basenan i el a traha e labamanonan riba e basenan,

¹⁵i e laman ku e diesdos bueynan bou di dje.

¹⁶I e hemchinan, e skopnan, e forkinan i tur su artikulonan-di-uzo Huram-abi a traha di brons lombra pa rei Salomon, pa e kas di SENOR.

¹⁷Den e sabana di Jordan rei a basha nan, den e tera di klei entre Sukot i Seredata.

¹⁸Asina Salomon a traha tur e artikulonan-di-uzo aki na gran kantidat, pasobra peso di e brons no por a wordu kalkula.

¹⁹Tambe Salomon a traha tur e kosnan ku tabatin den e kas di Dios: e altar di oro, e mesanan ku e pan di e Presensia riba nan,

²⁰e kandelanan ku nan lampinan di oro puru, pa sende dilanti di e santuario paden na e manera ku a wordu preskribi,

²¹e flornan, e lampinan i e skernan-pa-korta-mecha di oro, di e oro di mas puru;

²²i e kosnan-pa-paga-lampi, e puncheronan, e kucharanan i e weanan-pa-kandela, di oro puru; i e entrada di e kas, su portanan paden pa e luga santisimo, i e portanan di e kas, esta, di e tempel di oro.