Read Papantla Totonac 2 Kronikanan 5 Bible Online

2 Kronikanan 5 - Papantla Totonac bible

2 Kronikanan 5

¹Asina tur e trabou ku Salomon a hasi pa e kas di SENOR a keda kla. I Salomon a trese e kosnan ku su tata David a dedika, esta, e plata i e oro i tur e artikulonan-di-uzo, i a pone nan den e luganan-di-warda-tesoro di e kas di Dios.

²E ora ei Salomon a reuni na Jerusalem e ansianonan di Israel i tur e kabesantenan di e tribunan, e lidernan di e kasnan di e tatanan di e yunan di Israel, pa trese e arka di e aliansa di SENOR for di e stat di David, ku ta Sion.

³I tur e hombernan di Israel a reuni serka rei na e fiesta, ku ta den e di shete luna.

⁴E ora ei tur e ansianonan di Israel a bin, i e levitanan a hisa e arka.

⁵I nan a trese e arka, e tent di reunion i tur e artikulonan-di-uzo santu ku tabatin den e tent; i esakinan e saserdotenan levitiko a trese.

⁶Anto rei Salomon i henter e kongregashon di Israel, ku a reuni serka dje dilanti di e arka, tabata sakrifika asina tantu karne i buey ku nan no por a wordu konta ni numera.

⁷E ora ei e saserdotenan a hiba e arka di e aliansa di SENOR na su luga, den e santuario paden di e kas, na e luga santisimo, bou di e halanan di e kerubinnan.

⁸Pasobra e kerubinnan tabatin nan halanan habri ofer di e luga di e arka, asina ku e kerubinnan tabata tapa e arka i su baranan.

⁹I e baranan tabata asina largu ku por a mira e puntanan di e baranan di e arka dilanti di e santuario paden, ma no por a mira nan di pafo; i nan ta ayanan te dia djawe.

¹⁰No tabatin nada den e arka sino solamente e dos tablanan ku Moises a pone den dje na Horeb, kaminda SENOR a sera un aliansa ku e yunan di Israel, tempu ku nan a sali for di Egipto.

¹¹I ora ku e saserdotenan a sali for di e luga santu (pasobra tur e saserdotenan ku tabata presente a santifika nan mes, sin tene kuenta ku divishonnan),

¹²i tur e kantadonan levitiko: Asaf, Heman, Jedutun i nan yu hombernan i famianan, bisti na lino fini, ku simbal, arpa i salterio, para pariba di e altar, i huntu ku nan shent'i binti saserdote ku tabata toka trompet.

¹³I ora ku e tokadonan di trompet i e kantadonan konhuntamente a laga tende nan mes den un solo bos pa alaba i glorifika SENOR, i ora nan a halsa nan bos, akompana pa trompet, simbal i instrumentnan di muzik, i ora nan a alaba SENOR, bisando: "Di berdat E ta bon, pasobra Su miserikordia ta pa semper." E ora ei e kas, e kas di SENOR, a yena ku un nubia,

¹⁴asina ku e saserdotenan no por a keda para pa sirbi pa motibu di e nubia, pasobra e gloria di SENOR a yena e kas di Dios.