Read Papantla Totonac 2 Kronikanan 6 Bible Online

2 Kronikanan 6 - Papantla Totonac bible

2 Kronikanan 6

¹E ora ei Salomon a bisa: "SENOR a bisa ku E lo biba den e nubia diki.

²Mi a traha un kas magnifiko pa Bo, i un luga pa Bo biba aden pa semper."

³Despues rei a bira su kara i a bendishona henter e asamblea di Israel, mientras ku henter e asamblea di Israel tabata para.

⁴I el a bisa: "Bendishona sea SENOR, e Dios di Israel, Kende a papia ku Su boka ku mi tata David i a kumpli ku esaki ku Su mannan, bisando:

⁵'For di dia ku Mi a saka Mi pueblo for di tera di Egipto, Mi no a skohe ni un stat for di tur e tribunan di Israel pa traha un kas, pa Mi nomber por ta ayanan. Tampoko Mi no a skohe ningun homber pa ta lider riba Mi pueblo Israel;

⁶ma Mi a skohe Jerusalem pa Mi nomber por ta ayanan, i Mi a skohe David pa ta riba Mi pueblo Israel.'

⁷"Awor tabata riba kurason di mi tata David pa traha un kas pa e nomber di SENOR, e Dios di Israel.

⁸Ma SENOR a bisa mi tata David: 'Pasobra tabata riba bo kurason pa traha un kas pa Mi nomber, bo a hasi bon di tin esaki riba bo kurason.

⁹Sinembargo, abo lo no traha e kas, ma bo yu homber, ku lo nase pa bo, e lo traha e kas pa Mi nomber.'

¹⁰"Awor SENOR a kumpli ku Su palabra ku El a papia; pasobra mi a lanta na luga di mi tata David, i ta sinta riba e trono di Israel, manera SENOR a priminti; i mi a traha e kas pa e nomber di SENOR, e Dios di Israel.

¹¹I ayanan mi a pone e arka, ku tin e aliansa di SENOR aden, ku El a sera ku e yunan di Israel."

¹²E ora ei el a bai para dilanti di e altar di SENOR den presensia di henter e asamblea di Israel i a habri su mannan.

¹³Awor Salomon a traha un plataforma di brons, sinku kodo largu, sinku kodo hanchu i tres kodo haltu, i a laga pon'e meimei di e plenchi; i el a bai para riba dje, a hinka rudia den presensia di henter e asamblea di Israel i a habri su mannan na shelu.

¹⁴I el a bisa: "O SENOR, e Dios di Israel, no tin ningun dios manera Bo, ni den shelu ni riba tera, Kende ta warda e aliansa i ta mustra miserikordia na Bo sirbidonan ku ta kana Bo dilanti ku henter nan kurason,

¹⁵Kende a kumpli ku Bo sirbido, mi tata David, loke Bo a primintie; di berdat, Bo a papia ku Bo boka i a kumpli ku esaki ku Bo man, manera ta riba dia djawe.

¹⁶"Pesei anto, O SENOR, e Dios di Israel, kumpli ku Bo sirbido, mi tata David, loke Bo a primintie, bisando: 'Lo bo no falta un homber pa sinta riba trono di Israel, kontal ku bo yu hombernan perkura di warda nan kaminda, pa kana den Mi lei manera abo a kana Mi dilanti.'

¹⁷Pesei anto, O SENOR, e Dios di Israel, laga Bo palabra ku Bo a papia ku Bo sirbido David keda konfirma.

¹⁸"Ma di berdat Dios lo biba riba tera serka hende? Mira, shelu i e shelu di shelunan no por konteneBo; kuantu menos e kas aki ku mi a traha.

¹⁹Sinembargo, pone atenshon na e orashon di Bo sirbido i na su suplika, O SENOR mi Dios, pa skucha e sklamashon i e orashon ku Bo sirbido ta hasi Bo dilanti;

²⁰ku Bo wowo por ta habri di dia i anochi den direkshon di e kas aki, den direkshon di e luga di kual Bo a bisa ku lo Bo pone Bo nomber ayanan, pa skucha e orashon ku Bo sirbido lo hasi den direkshon di e luga aki.

²¹I skucha e suplikanan di Bo sirbido i di Bo pueblo Israel, ora nan ta hasi orashon den direkshon di e luga aki; tende Abo for di Bo luga di biba, for di shelu; tende Abo i pordona.

²²"Si un hende peka kontra su prohimo i wordu obliga pa hasi huramentu, i e bin hura dilanti di Bo altar den e kas aki,

²³e ora ei tende Abo for di shelu, i aktua i huzga Bo sirbidonan, i kastiga e malbado dor di trese su manera di aktua riba su mes kabes, i hustifika e hustu dor di dun'e segun su hustisia.

²⁴"I si Bo pueblo Israel wordu derota dilanti di un enemigu, pasobra nan a peka kontra Bo, i nan bolbe serka Bo, i konfesa Bo nomber i hasi orashon i suplika Bo dilanti den e kas aki,

²⁵e ora ei tende Abo for di shelu i pordona e pika di Bo pueblo Israel i trese nan bek na e tera ku Bo a duna nan i nan tatanan.

²⁶"Ora ku e shelunan keda sera i no tin awaseru, pasobra nan a peka kontra Bo, i nan hasi orashon den direkshon di e luga aki, i konfesa Bo nomber i bira for di nan pika ora Bo afligi nan,

²⁷e ora ei tende Abo den shelu i pordona e pika di Bo sirbidonan i di Bo pueblo Israel, pa Bo sina nan e bon Poo kaminda ku nan mester kana aden. I manda awaseru riba Bo tera ku Bo a duna Bo pueblo komo erensia.

²⁸"Ora tin hamber den e tera, of pestilensia, pispis of beskem, tirakochi bruin of tirakochi berde; ora nan enemigunan rondona nan den e tera di nan statnan; kualke plaga of kualke malesa ku sea;

²⁹kualke orashon of suplika ku un hende of ku henter Bo pueblo Israel hasi, ora kada un konose su mes aflikshon i su mes dolo, i ta habri su mannan den direkshon di e kas aki,

³⁰e ora ei tende Abo for di shelu, Bo luga di biba, i pordona, i duna kada un segun tur su kamindanan, kende su kurason Bo konose (pasobra ta Abo so konose kurason di e yunan di hende),

³¹pa nan tin temor pa Bo, pa kana den Bo kamindanan tanten ku nan ta biba na e tera ku Bo a duna nos tatanan.

³²"Tambe tokante di e stranhero ku no ta di Bo pueblo Israel, ora ku e bin for di un tera leu pa kousa di Bo gran nomber, Bo man poderoso i Bo brasa ekstendi, ora ku nan bin hasi orashon den direkshon di e kas aki,

³³e ora ei tende Abo for di shelu, for di Bo luga di biba, i hasi konforme tur loke e stranhero pidiBo, pa tur e pueblonan di mundu konose Bo nomber i tin temor pa Bo, manera Bo pueblo Israel ta hasi, i pa nan sa ku e kas aki ku mi a traha ta wordu yama na Bo nomber.

³⁴"Ora Bo pueblo sali bai bringa kontra nan enemigunan, unda ku Bo manda nan, i nan hasi orashon na Bo den direkshon di e stat aki ku Bo a skohe, i e kas ku mi a traha pa Bo nomber,

³⁵e ora ei tende Abo nan orashon i nan suplika for di shelu, i sostene nan kousa.

³⁶"Ora nan peka kontra Bo (pasobra no tin ningun hende ku no ta peka) i Bo ta rabia ku nan i ta entrega nan na un enemigu, asina ku nan ta hiba nan komo katibu na un tera leu of serka,

³⁷si nan pensa bon na e tera kaminda nan a wordu hiba komo katibu, i repent! i hasi suplika na Bo na e tera di nan koutiverio, bisando: 'Nos a peka, nos a komete inikidat i a hasi maldat';

³⁸si nan bolbe serka Bo ku henter nan kurason i ku henter nan alma na e tera di nan koutiverio, kaminda nan a wordu hiba komo katibu, i hasi orashon den direkshon di nan tera ku Bo a duna nan tatanan, i e stat ku Bo a skohe, i den direkshon di e kas ku mi a traha pa Bo nomber,

³⁹e ora ei tende nan orashon i suplikanan for di shelu, for di Bo luga di biba, sostene nan kousa i pordona Bo pueblo ku a peka kontra Bo.

⁴⁰"Awor, O mi Dios, mi ta pidiBo, laga Bo wowo ta habri i Bo orea atento na e orashon hasi den e luga aki.

⁴¹"Asina anto, O SENOR Dios, lanta i drenta e luga di Bo sosiegu, Abo ku e arka di Bo fortalesa. Laga Bo saserdotenan, O SENOR Dios, ta bisti ku salbashon i laga Bo santunan regosiha den loke ta bon.

⁴²O SENOR Dios, no rechasa Bo ungi; korda Bo miserikordia na Bo sirbido David."