Read Papantla Totonac 2 Kronikanan 7 Bible Online

2 Kronikanan 7 - Papantla Totonac bible

2 Kronikanan 7

¹Awor ora Salomon a kaba di hasi orashon, kandela a baha for di shelu i a kima e ofrenda kima i e sakrifisionan kaba ku nan; i e gloria di SENOR a yena e kas.

²I e saserdotenan no por a drenta den e kas di SENOR, pasobra e gloria di SENOR a yena e kas di SENOR.

³I ora tur e yunan di Israel a mira e kandela ta baha i e gloria di SENOR riba e kas, nan a buig te abou, ku nan kara te na suela, i nan a adora i a duna alabansa na SENOR, bisando: "Di berdat E ta bon, di berdat Su miserikordia ta pa semper."

⁴E ora ei rei i henter e pueblo a ofrese sakrifisio dilanti di SENOR.

⁵I rei Salomon a ofrese un sakrifisio di bint'i dos mil buey i shent'i binti mil karne. Asina rei i henter e pueblo a dedika e kas di Dios.

⁶I e saserdotenan tabata para na nan puesto i e levitanan ku e instrumentnan di muzik pa SENOR, ku rei David a traha pa duna alabansa na SENOR--"pasobra Su miserikordia ta pa semper"--ki ora ku e tabata duna alabansa pa medio di nan ministerio, mientras ku nan dilanti e saserdotenan tabata toka trompet; i henter Israel tabata para.

⁷E ora ei Salomon a konsagra e parti meimei di e plenchi ku tabata dilanti di e kas di SENOR, pasobra einan el a ofrese e ofrendanan kima i e vet di e ofrendanan di pas, pasobra e altar di brons ku Salomon a traha no tabata por a kontene e ofrenda kima, e ofrenda di mainshi i e vet.

⁸Asina e tempu ei Salomon a selebra e fiesta shete dia largu, i henter Israel huntu kune, un asamblea masha grandi mes, ku a bin for di e entrada di Hamat te na e roi di Egipto.

⁹I riba e di ocho dia nan a tene un asamblea solem, pasobra nan a selebra e dedikashon di e altar shete dia largu, i tambe e fiesta shete dia largu.

¹⁰Anto riba e di bint'i tres dia di e di shete luna el a manda e pueblo bai na nan tentnan, regosihando i kontentu di kurason pa motibu di e bondat ku SENOR a mustra David i Salomon i Su pueblo Israel.

¹¹Asina Salomon a kaba e kas di SENOR i e palasio di rei; i ku eksito el a kompleta tur loke e tabatin plania pa hasi den e kas di SENOR i den su palasio.

¹²E ora ei SENOR a parese na Salomon den anochi i a bis'e: "Mi a tende bo orashon i a skohe e luga aki pa Mi mes komo un kas di sakrifisio.

¹³"Ora Mi sera e shelunan i no tin awaseru, of Mi ordena tirakochi pa devora e tera, of Mi manda pestilensia meimei di Mi pueblo,

¹⁴si Mi pueblo ku ta wordu yama na Mi nomber umiya nan mes i hasi orashon, i buska Mi kara i bira for di nan mal kamindanan, e ora ei lo Mi tende for di shelu, i lo pordona nan pika i kura nan tera.

¹⁵Awor Mi wowo lo ta habri i Mi orea atento na e orashon hast den e luga aki.

¹⁶Pasobra awor Mi a skohe i a konsagra e kas aki, pa Mi nomber por ta ayanan pa semper, i Mi wowo i Mi kurason lo ta ayanan kontinuamente.

¹⁷"I pa loke t'abo, si bo kana Mi dilanti manera bo tata David a kana, pa hasi konforme tur loke Mi a ordenabo i bo warda Mi statutonan i Mi ordenansanan,

¹⁸e ora ei lo Mi stablese bo trono real manera Mi a sera aliansa ku bo tata David, bisando: 'Lo bo no falta un homber pa goberna na Israel.'

¹⁹"Ma si boso bira bai i bandona Mi statutonan i Mi mandamentunan ku Mi a pone boso dilanti, i bai sirbi otro diosnan i adora nan,

²⁰e ora ei lo Mi ranka boso ku rais ku tur for di Mi tera ku Mi a duna boso, i e kas aki ku Mi a konsagra pa Mi nomber lo Mi tira for di Mi bista, i lo Mi hasie un proverbio i un refran entre tur pueblo.

²¹Pa loke ta e kas aki ku tabata halsa, ken ku pasa banda di dje lo keda asombra i bisa: 'Pakiko SENOR a hasi asina ku e tera aki i ku e kas aki?'

²²I nan lo bisa: 'Pasobra nan a bandona SENOR, e Dios di nan tatanan, Kende a saka nan for di tera di Egipto, i nan a adopta otro diosnan i a adora nan i a sirbi nan, pesei El a trese tur e kalamidat aki riba nan.'"