Read Papantla Totonac 2 Kronikanan 8 Bible Online

2 Kronikanan 8 - Papantla Totonac bible

2 Kronikanan 8

¹Awor a sosode ku na fin di e binti ananan den kualnan Salomon a traha e kas di SENOR i su mes kas,

²el a traha e statnan ku Huram a dun'e, i a stablese e yunan di Israel ayanan.

³E ora ei Salomon a bai Hamat-soba i a kaptur'e.

⁴I el a traha Tadmor den desierto i tur e statnan di deposito ku el a traha na Hamat.

⁵Tambe el a traha Bet-horon-ariba i Bet-horon-abou, statnan fortifika ku muraya, porta i bara;

⁶i Baalat i tur e statnan di deposito ku Salomon tabatin, i tur e statnan pa su garoshinan i e statnan pa su koredonan di kabai, i tur loke Salomon tabata desea di traha na Jerusalem, na Libano, i na henter e tera bou di su dominio.

⁷Henter e pueblo ku a resta di e heteonan, e amoreonan, e ferezeonan, e heveonan i e jebuseonan, ku no tabata pertenese na Israel,

⁸esta, for di nan desendientenan ku a keda despues di nan na e tera ku e yunan di Israel no a destrui, eseinan Salomon a hasi trahado forsa te dia djawe.

⁹Ma Salomon no a hasi ningun di e yunan di Israel esklabu pa hasi su trabou; nan tabata hombernan di guera, su kapitannan prinsipal, i komandantenan di su garoshinan i su koredonan di kabai.

¹⁰I esakinan tabata e ofisialnan prinsipal di rei Salomon, dos shent'i sinkuenta ku tabata goberna e pueblo.

¹¹E ora ei Salomon a trese Farao su yu muhe for di e stat di David na e kas ku el a traha p'e, pasobra el a bisa: "Mi esposa no mester biba den e kas di David, rei di Israel, pasobra e luganan kaminda e arka di SENOR a drenta ta santu."

¹²Anto Salomon a ofrese ofrendanan kima na SENOR riba e altar di SENOR ku el a traha dilanti di e veranda;

¹³i a hasi asina konforme e regla di tur dia, i a ofrese nan konforme e mandamentu di Moises, pa e dianan di sabat, pa e dianan di luna nobo, i pa e tres fiestanan anual--e Fiesta di Pan Sin Zurdeg, e Fiesta di Simannan, i e Fiesta di Tabernakelnan.

¹⁴Awor konforme e ordenansa di su tata David, el a nombra e divishonnan di e saserdotenan pa nan sirbishi, i e levitanan pa nan responsabilidatnan di duna alabansa i sirbi dilanti di e saserdotenan, konforme e regla di tur dia, i e wardadonan-di-porta, segun nan divishonnan na kada porta; pasobra David, e homber di Dios, a ordena asina.

¹⁵I nan no a bandona e mandamentu di rei pa sigui e saserdotenan i levitanan di ningun manera, ni tokante di e depositonan.

¹⁶Asina tur e trabou di Salomon a wordu kumpli, for di e dia di ponementu di fundeshi di e kas di SENOR, te e dia ku el a termina. Asina e kas di SENOR a keda kla.

¹⁷E ora ei Salomon a bai Ezion-geber i Elot na kosta di laman, na tera di Edom.

¹⁸I pa medio di su sirbidonan Huram a mand'e barkunan i sirbidonan ku tabata konose laman; i nan a bai Ofir huntu ku e sirbidonan di Salomon, i a kohe for di ayanan kuater shent'i sinkuenta talento di oro, i a trese nan pa rei Salomon.