Read Papantla Totonac 2 Kronikanan 9 Bible Online

2 Kronikanan 9 - Papantla Totonac bible

2 Kronikanan 9

¹Awor ora reina di Saba a tende di e fama di Salomon, el a bin Jerusalem pa pone Salomon na prueba ku preguntanan difisil. E tabata kompana pa un grupo masha grandi, ku kamelnan karga ku speserei i un kantidat grandi di oro i piedra presioso; i ora ku el a yega serka Salomon, el a papia kune di tur loke tabatin riba su kurason.

²I Salomon a kontesta tur su preguntanan; no tabatin nada ku tabata muchu difisil pa Salomon splika reina di Saba.

³I ora reina di Saba a mira e sabiduria di Salomon, e kas ku el a traha,

⁴e kuminda na su mesa, e ordu di sinta di su ofisialnan, e manera di sirbi di su sirbidonan i nan pana di bisti, su koperonan i nan pana di bisti, i su trapi ku e tabata subi pa bai e kas di SENOR, el a keda boka habri.

⁵E ora ei el a bisa rei: "Tabata berdat loke mi a tende na mi mes tera tokante di bo palabranan i bo sabiduria.

⁶Sinembargo, mi no a kere nan palabranan te ora mi a bin i a mira ku mi mes wowo. I mira, ni mitar di e grandesa di bo sabiduria nan no a kontami. Bo ta surpasa e palabranan ku mi a tende.

⁷Ki bendishona bo hombernan ta, ki bendishona e sirbidonan di bo aki ta, ku kontinuamente ta para bo dilanti i ta tende bo sabiduria.

⁸Bendishona sea SENOR bo Dios, Kende tabatin delisia den bo, i a ponebo riba Su trono komo rei pa SENOR bo Dios; pasobra bo Dios a stima Israel i a stablese nan pa semper, pesei El a hasibo rei riba nan, pa hasi huisio i hustisia."

⁹E ora ei reina di Saba a duna rei shent'i binti talento di oro i un kantidat masha grandi di speserei i piedra presioso; nunka tabatin speserei asina manera esnan ku reina di Saba a duna rei Salomon.

¹⁰I e sirbidonan di Huram i e sirbidonan di Salomon ku tabata trese oro for di Ofir, tambe a trese palu di sandalo i piedra presioso.

¹¹I for di e palunan di sandalo rei a traha trapi pa e kas di SENOR i pa rei su palasio, i salterio i arpa pa e kantadonan; nunka algu asina no a wordu mira na tera di Juda.

¹²I rei Salomon a duna reina di Saba tur loke ku e tabata desea, tur loke el a pidi, muchu mas ku loke el a trese pa rei. E ora ei el a bai bek na su mes pais huntu ku su sirbidonan.

¹³Awor e peso di oro ku a drenta pa Salomon den un ana tabata seis shent'i sesent'i seis talento di oro,

¹⁴fuera di loke e negoshantenan i komersiantenan a trese; i tur e reinan di Arabia i e gobernantenan di e pais a trese oro i plata pa Salomon.

¹⁵I rei Salomon a traha dos shen eskudo grandi di oro bati, i a uza seis shen siklo di oro bati pa kada eskudo grandi.

¹⁶I el a traha tres shen eskudo di oro bati i a uza tres shen siklo di oro pa kada eskudo, i rei a pone nan den e kas di mondi-sera di Libano.

¹⁷Ademas, rei a traha un trono grandi di ivor i a fur'e ku oro puru.

¹⁸I e trono tabatin seis tret, i un banki-pa-pia traha di oro, pega na e trono; i tabatin man na kada banda di e asiento i dos leon para banda di e mannan.

¹⁹I tabatin diesdos leon para einan na kada banda riba e seis tretnan; nada similar no a wordu traha pa ningun otro reino.

²⁰I tur e kopanan di bebe di rei Salomon tabata di oro i tur e artikulonan-di-uzo di e kas di e mondi-sera di Libano tabata di oro puru; plata no tabata wordu konsidera di balor den e dianan di Salomon.

²¹Pasobra rei tabatin barkunan ku tabata bai Tarsis ku e sirbidonan di Huram; un biaha den kada tres ana e barkunan di Tarsis tabata bin trese oro, plata, ivor, makaku i pouwis.

²²Asina rei Salomon a surpasa tur e reinan di tera den rikesa i den sabiduria.

²³I tur e reinan di tera tabata buska e presensia di Salomon, pa tende su sabiduria ku Dios a pone den su kurason.

²⁴I tur hende tabata trese su regalo, artikulonan di plata i di oro, pana pa bisti, arma, speserei, kabai i mula, kada ana un sierto kantidat.

²⁵Awor Salomon tabatin kuater mil stal pa kabai i garoshi, i diesdos mil koredo di kabai; i el a stashona nan den e statnan di garoshi i serka rei na Jerusalem.

²⁶I e tabata gobernante riba tur e reinan for di Riu Eufrates te na e tera di e filisteonan i te na e frontera di Egipto.

²⁷I rei a hasi plata mes komun ku piedra na Jerusalem, i el a hasi palu di seda mes abundante ku palu di sikamor ku ta krese den vaye.

²⁸I nan tabata trese kabai pa Salomon for di Egipto i for di tur tera.

²⁹Awor e demas echonan di Salomon, for di prome te delaster, nan no ta para skirbi den e buki di profeta Natan, i den e profesia di Ahias e silonita, i den e vishonnan di Ido e mirado, tokante di Jeroboam, yu homber di Nabat?

³⁰I Salomon a reina kuarenta ana na Jerusalem riba henter Israel.

³¹I Salomon a bai sosega serka su tatanan i a wordu dera den e stat di su tata David, i su yu homber Roboam a reina na su luga.