Read Papantla Totonac Esdras 4 Bible Online

Esdras 4 - Papantla Totonac bible

Esdras 4

¹Awor ora ku e enemigunan di Juda i Benjamin a tende ku e hendenan di e eksilio tabata traha un tempel pa e SENOR Dios di Israel,

²nan a bin serka Zorobabel i e kabesnan di e kasnan di e tatanan, i a bisa nan: "Laga nos traha huntu ku boso, pasobra nos, meskos ku boso, ta buska boso Dios; i nos tabata sakrifika na djé for di e dianan di Esarhadon, rei di Asiria, kende a trese nos akinan."

³Ma Zorobabel i Jesua i e restu di e kabesnan di e kasnan di e tatanan di Israel a bisa nan: "Boso no tin nada di hasi ku nos den trahamentu di un kas pa nos Dios, ma nos mes lo traha huntu pa e SENOR Dios di Israel, manera rei Siro, rei di Persia, a ordena nos."

⁴E ora ei e pueblo di e tera a deskurasha e pueblo di Juda, i a hinka miedu den nan pa traha,

⁵i a kontrata konseheronan kontra nan pa hasi nan plan frakasa durante di tur e dianan di Siro, rei di Persia, te na e reinado di Dario, rei di Persia.

⁶Awor durante di e reinado di Asuero, na kuminsamentu di su reinado, nan a skirbi un akusashon kontra e habitantenan di Juda i Jerusalem.

⁷I den e dianan di Artaherhes, rei di Persia, Bislam, Mitridates, Tabeel i e restu di su kompaneronan a skirbi Artaherhes; i e teksto di e karta tabata skirbi na arameo i tradusi for di arameo.

⁸Rehum, e komandante, i Simsai, e eskriba, a skirbi rei Artaherhes un karta kontra Jerusalem asin'aki:i

⁹Rehum, e komandante, i Simsai, e eskriba, i e restu di nan kompaneronan, e huesnan i e gobernadonan menor, e ofisialnan, e sekretarionan, e hombernan di Erek, e babilonionan, e hombernan di Susa, esta, e elamitanan,

¹⁰i e restu di e nashonnan ku e gran i onorabel Asnapar a deporta i a stablese den e stat di Samaria, i den e restu di e region na e otro banda di Riu Eufrates.

¹¹I awor esaki ta kopia di e karta ku nan a manda p'e.i "Na rei Artaherhes:i "Di Bo sirbidonan, e hombernan den e region na e otro banda di Riu Eufrates:

¹²"I awor laga esaki ta konosi na rei, ku e hudiunan ku a sali for di bo a yega serka nos na Jerusalem; nan ta rekonstrui e stat rebelde i malbado, i ta terminando e murayanan i ta drechando e fundeshinan.

¹³"Awor, laga esaki ta konosi na rei, ku si e stat ei wordu rekonstrui i e murayanan keda kla, nan lo no paga ni tributo, ni impuesto, ni tol mas; i esaki lo kousa dano na e reinan.

¹⁴Awor pasobra nos ta hana manteneshon di palasio, i no ta pas pa nos mira rei wordu desonra, pesei nos a manda pone rei na haltura,

¹⁵pa un investigashon por wordu hasi den e bukinan di registro di bo tatanan. I lo bo deskubri den e bukinan di registro, i hana sa ku e stat ei ta un stat rebelde i ku e ta hasi dano na reinan i na provinsianan, i ku den pasado nan a lanta revolushon den dje. Pesei e stat ei a wordu destrui.

¹⁶Nos ta pone rei na haltura ku si e stat ei wordu rekonstrui i e murayanan keda kla, lo resulta ku e provinsia na e otro banda di Riu Eufrates lo no keda di bo."

¹⁷E ora ei rei a manda un kontesta:i "Pa Rehum, e komandante, pa Simsai, e eskriba, i pa e restu di nan kompaneronan ku ta biba na Samaria, i pa e restu di e provinsianan na e otro banda di Riu Eufrates:i "Pas.

¹⁸"I awor e dokumento ku boso a manda pa nos a wordu lesa na un manera bon kla mi dilanti.

¹⁹I mi a saka un dekreto, i un investigashon a wordu hasi, i a wordu deskubri ku den pasado e stat ei a lanta kontra e reinan, i ku tabatin rebeldia i lantamentu kontinuamente den dje,

²⁰ku reinan poderoso a goberna riba Jerusalem, ku a goberna tur e provinsianan na e otro banda di Riu Eufrates, i ku tributo, impuesto i tol a wordu paga na nan.

²¹Asina, saka awor un dekreto pa hasi e hendenan aki stop di traha, pa e stat no wordu rekonstrui te ora ami saka un dekreto.

²²I tene kuidou pa boso no neglisha di kumpli ku esaki; pakiko dano mester resulta den pierde pa e reinan?"

²³E ora ei asina ku e kopia di e dokumento di rei Artaherhes a wordu lesa dilanti di Rehum i Simsai, e skriba, i nan kompaneronan, nan a bai pura serka e hudiunan na Jerusalem, i a stop nan ku poder di arma.

²⁴Anto e trabou na e kas di Dios na Jerusalem a stop, i esaki a keda para te na e di dos ana di e reinado di Dario, rei di Persia.