Read Papantla Totonac Esdras 6 Bible Online

Esdras 6 - Papantla Totonac bible

Esdras 6

¹E ora ei rei Dario a saka un dekreto, i nan a hasi investigashon den e archivonan, kaminda e tesoronan tabata warda na Babilonia.

²I den e forti na Akmeta, ku ta keda den e provinsia di Media, nan a hana un rol, i tabatin lo siguiente skirbi riba dje: "Memorandum--

³"Den e prome ana di rei Siro, rei Siro a saka un dekreto: 'Tokante di e kas di Dios na Jerusalem, laga e tempel, e luga kaminda sakrifisionan ta wordu ofresi, wordu rekonstrui, i laga su fundeshinan ta firme poni. Su haltura mester ta sesenta kodo i su hanchura sesenta kodo,

⁴ku tres kareda di piedra masha grandi mes i un kareda di balki. I laga e gastu wordu paga for di e luga-di-warda-tesoro real.

⁵I tambe laga e artikulonan-di-uzo di oro i di plata di e tempel di Dios, ku Nabukodonosor a kohe for di e tempel na Jerusalem i a hiba Babilonia, wordu debolbi na nan luga den e tempel na Jerusalem, i abo mes pone nan den e kas di Dios.'

⁶"Pesei anto, Tatnai, gobernado di e provinsia na e otro banda di Riu Eufrates, Setar-boznai i boso kompaneronan, e ofisialnan di e provinsianan na e otro banda di Riu Eufrates, keda leu di einan.

⁷No stroba e trabou aki riba e kas di Dios. Laga e gobernado di e hudiunan i e ansianonan di e hudiunan rekonstrui e kas aki di Dios na su sitio.

⁸"Ademas, mi ta saka un dekreto tokante di loke boso mester hasi pa e ansianonan aki di Juda den e rekonstrukshon di e kas aki di Dios: "For di e luga-di-warda-tesoro real, for di e belasting di e provinsianan na e otro banda di Riu Eufrates, e gastu kompleto mester wordu paga na e hendenan aki; i hasi esei sin tarda.

⁹I kiko ku tin mester, tantu bishe machu, karne chubatu of lamchi komo ofrenda kima na e Dios di shelu, i trigo, salu, bina i zeta, manera e saserdotenan na Jerusalem pidi, mester duna nan esaki tur dia sin falta,

¹⁰pa nan ofrese sakrifisionan aseptabel na e Dios di shelu i hasi orashon pa bida di rei i su yu hombernan.

¹¹"I mi a saka un dekreto ku ken ku viola e ordu aki, mester ranka un balki for di su kas i hork'e na dje i mester hasi su kas un monton di sushi pa motibu di esaki.

¹²I ku e Dios, Kende a hasi Su nomber biba ayanan, destrui kualkier rei of pueblo ku trata di kambia esaki, esta, pa destrui e kas aki di Dios na Jerusalem. "Ami, Dario, a saka e dekreto aki; laga kumpli kune ku tur diligensia!"

¹³E ora ei Tatnai, gobernado di e provinsia na e otro banda di Riu Eufrates, Setar-boznai i nan kompaneronan, a kumpli ku e dekreto ku tur diligensia, meskos ku rei Dario a ordena.

¹⁴I e ansianonan di e hudiunan tabatin eksito den konstrukshon dor di e profesia di profeta Hageo i Zakarias, yu homber di Ido. I nan a kaba di konstrui konforme e ordu di e Dios di Israel i e dekreto di Siro, Dario i Artaherhes, rei di Persia.

¹⁵I e tempel aki a keda kla riba e di tres dia di luna di Adar; esaki tabata e di seis ana di e reinado di rei Dario.

¹⁶I e yunan di Israel, e saserdotenan, e levitanan i e restu di e eksiliadonan, a selebra dedikashon di e kas aki di Dios ku goso.

¹⁷I pa dedikashon di e tempel aki di Dios nan a ofrese shen bishe machu, dos shen karne chubatu, kuater shen lamchi, i komo un ofrenda pa pika pa henter Israel, diesdos kabritu chubatu, segun e kantidat di e tribunan di Israel.

¹⁸E ora ei nan a nombra e saserdotenan den nan divishonnan i e levitanan den nan ordunan pa e sirbishi di Dios na Jerusalem, manera ta para skirbi den e buki di Moises.

¹⁹I e eksiliadonan a selebra Pasku riba e di dieskuater dia di e prome luna.

²⁰Pasobra huntu e saserdotenan i e levitanan a purifika nan mes; nan tur a keda purifika. E ora ei nan a mata e lamchi di Pasku pa tur e eksiliadonan, tantu pa nan rumannan, e saserdotenan, komo pa nan mes.

²¹I e yunan di Israel ku a bolbe for di eksilio i tur esnan ku a aparta nan mes for di e impuresa di e nashonnan di e tera pa uni nan mes ku nan, pa buska SENOR Dios di Israel, a kome e Pasku.

²²I ku goso nan a selebra e Fiesta di Pan Sin Zurdeg shete dia largu, pasobra SENOR a hasi nan regosiha i a kambia kurason di rei di Asiria pa ku nan, pa enkurasha nan den e trabou riba e kas di Dios, e Dios di Israel.