Read Papantla Totonac Esdras 8 Bible Online

Esdras 8 - Papantla Totonac bible

Esdras 8

¹Awor esakinan ta e kabesnan di e kasnan di nan tatanan i e genealogia di esnan ku a bai huntu ku mi for di Babilonia durante di e reinado di rei Artaherhes:

²di e yu hombernan di Finees, Gerson; di e yu hombernan di Itamar, Daniel; di e yu hombernan di David, Hatus;

³di e yu hombernan di Sekanias, kende tabata di e yu hombernan di Paros, Zakarias, i huntu kune 150 homber ku tabata riba e lista genealogiko;

⁴di e yu hombernan di Pahat-moab, Elioenai, yu homber di Zeraias, i huntu kune 200 homber;

⁵di e yu hombernan di Sekanias, e yu homber di Jahaziel, i huntu kune 300 homber;

⁶i di e yu hombernan di Adin, Ebed, yu homber di Jonatan, i huntu kune 50 homber;

⁷i di e yu hombernan di Elam, Jesaias, yu homber di Atalias, i huntu kune 70 homber;

⁸i di e yu hombernan di Sefatias, Zebadias, yu homber di Mikael, i huntu kune 80 homber;

⁹di e yu hombernan di Joab, Obadias, yu homber di Jehiel, i huntu kune 218 homber;

¹⁰i di e yu hombernan di Selomit, e yu homber di Josifias, i huntu kune 160 homber;

¹¹i di e yu hombernan di Bebai, Zakarias, yu homber di Bebai, i huntu kune 28 homber;

¹²i di e yu hombernan di Azgad, Johanan, yu homber di Hakatan, i huntu kune 110 homber;

¹³i di e yu hombernan di Adonikam, e ultimonan, esakinan ta nan nombernan: Elifelet, Jeiel i Semaias, i huntu ku nan 60 homber;

¹⁴i di e yu hombernan di Bigvai: Utai i Zabud, i huntu ku nan 70 homber.

¹⁵Awor mi a reuni nan na e riu ku ta kore pasa Ahava, kaminda nos a kampa tres dia; i ora mi a opserva e pueblo i e saserdotenan, mi no a hana ni un levita ayanan.

¹⁶Pesei mi a manda buska Eliezer, Ariel, Semaias, Elnatan, Jarib, Elnatan, Natan, Zakarias i Mesulam, hombernan lider, i Joiarib i Elnatan, sinadonan.

¹⁷I mi a manda nan serka Ido, e homber lider na e luga ku yama Kasifia; i mi a bisa nan kiko nan mester bisa Ido i su ruman hombernan, e sirbidonan di tempel na e luga ku yama Kasifia, esta, pa trese sirbidonan serka nos pa e kas di nos Dios.

¹⁸I konforme e bon man di nos Dios riba nos, nan a trese pa nos un homber di komprendementu, di e yu hombernan di Mahli, yu homber di Levi, yu homber di Israel, es desir, Serebias, huntu ku su yu hombernan i ruman hombernan, diesocho homber;

¹⁹i Hasabias ku Jesaias di e yu hombernan di Merari, huntu ku su ruman hombernan i nan yu hombernan, binti homber;

²⁰i dos shent'i binti di e sirbidonan di tempel ku David i e prensnan a duna pa e sirbishi di e levitanan, tur di nan indika pa nan nomber.

²¹E ora ei mi a proklama un yunamentu aya na Riu Ahava, pa nos umiya nos mes dilanti di nos Dios pa buska di djé un biahe sigur pa nos, nos yu chikitunan i tur nos propiedatnan.

²²Pasobra mi tabatin berguensa pa pidi rei trupanan i koredonan di kabai pa proteha nos kontra e enemigu na kaminda, pasobra nos a bisa rei: "E man di nos Dios ta pa bon riba tur esnan ku ta busk'E, ma Su poder i Su rabia ta kontra tur esnan ku ta bandon'E."

²³Asina nos a yuna i a buska nos Dios tokante di e asunto aki, i El a skucha nos petishon.

²⁴E ora ei mi a aparta diesdos di e saserdotenan lider: Serebias i Hasabias, i huntu ku nan dies di nan ruman hombernan;

²⁵i mi a pisa pa nan e plata, e oro i e artikulonan-di-uzo, e ofrenda pa e kas di nos Dios, ku rei i su konseheronan, su prensnan, i henter Israel presente ayanan, a ofrese.

²⁶Asina mi a pisa seis shent'i sinkuenta talento di plata, artikulonan-di-uzo di plata na balor di shen talento i talentonan di oro, den nan man,

²⁷i binti komchi di oro, na balor di mil drakma, i dos artikulo-di-uzo di brons fini i lombrante, presioso manera oro.

²⁸E ora ei mi a bisa nan: "Boso ta santu pa SENOR, i e artikulonan-di-uzo ta santu; i e plata i oro ta un ofrenda boluntario na SENOR Dios di boso tatanan.

²⁹Vigila i kuida nan te ora boso pisa nan dilanti di e saserdotenan lider, e levitanan, i e kabesnan di e kasnan di e tatanan di Israel na Jerusalem, den e kambernan di e kas di SENOR."

³⁰Asina e saserdotenan i e levitanan a asepta e plata i oro i e artikulonan-di-uzo ku nan a pisa, pa hiba nan Jerusalem na e kas di nos Dios.

³¹Despues nos a biaha di Riu Ahava riba e di diesdos dia di e prome luna pa bai Jerusalem; i e man di nos Dios tabata riba nos, i El a libra nos for di man di e enemigu i di e atrakadonan na kaminda.

³²Asina nos a yega Jerusalem i a keda tres dia ayanan.

³³I riba e di kuater dia e plata i e oro i e artikulonan-di-uzo a wordu pisa den e kas di nos Dios den man di Meremot, yu homber di saserdote Urias, i Eleazar, yu homber di Finees, tabata huntu kune; i e levitanan Jozabad, yu homber di Jesua, i Noadias, yu homber di Binui, tabata huntu ku nan.

³⁴E tempu ei tur kos a wordu konta i pisa; i henter e peso a wordu nota.

³⁵E eksiliadonan ku a bin for di koutiverio a ofrese ofrendanan kima na e Dios di Israel: diesdos bishe machu pa henter Israel, nobent'i seis karne chubatu, setent'i shete lamchi, diesdos kabritu chubatu komo un ofrenda pa pika. Tur esaki tabata un ofrenda kima na SENOR.

³⁶E ora ei nan a entrega e dekretonan di rei na e satrapanan di rei, i na e gobernadonan den e provinsianan na e otro banda di Riu Eufrates; i esakinan a sostene e pueblo i e kas di Dios.