Read Papantla Totonac Esdras 9 Bible Online

Esdras 9 - Papantla Totonac bible

Esdras 9

¹Awor ora e kosnan aki a wordu kompleta, e prensnan a bin serka mi, bisando: "E pueblo di Israel i e saserdotenan i e levitanan no a separa nan mes for di e pueblonan di e teranan, pa loke ta trata nan abominashonnan, esta, for di e kananeonan, e heteonan, e ferezeonan, e jebuseonan, e amonitanan, e moabitanan, e egipsionan i e amoreonan.

²Pasobra nan a tuma algun di nan yu muhenan komo esposa pa nan mes i pa nan yu hombernan, asina ku e rasa santu a meskla ku e pueblonan di e teranan; di berdat, e mannan di e prensnan i e gobernantenan tabata esnan di prome pa hasi e infieldat aki."

³I ora mi a tende tokante di e asunto aki, mi a sker mi pana i mi mantel, i a ranka poko kabei for di mi kabes i mi barba, i mi a kai sinta tur babuka.

⁴E ora ei tur esnan ku tabata tembla pa e palabranan di e Dios di Israel pa motibu di e infieldat di e eksiliadonan a reuni serka mi; i mi a keda sinta tur babuka te na e ora di ofrenda di atardi.

⁵Ma na e ora di ofrenda di atardi mi a lanta for di mi umiyashon, ku mi pana i mantel gesker, i mi a kai na rudia i a habri mi mannan na SENOR mi Dios,

⁶i mi a bisa: "O mi Dios, mi tin berguensa, i mi ta sintimi umiya, i mi tin berguensa di hisa mi kara na Bo, mi Dios, pasobra nos inikidatnan a multiplika riba nos kabesnan, i nos kulpa a krese yega te na e shelunan.

⁷For di e dianan di nos tatanan te dia djawe nos kulpa tabata grandi, i pa motibu di nos inikidatnan, nos, nos reinan i nos saserdotenan a keda entrega den man di e reinan di e teranan, na spada, na koutiverio, na plunder i na berguensa publiko, manera ta awe.

⁸"Ma awor pa un momento kortiku grasia a wordu mustra for di SENOR nos Dios, pa laga pa nos un restante ku a skapa i pa duna nos un luga firme den Su luga santu, pa nos Dios por ilumina nos wowo i duna nos poko rebibamentu den nos sklabitut.

⁹Pasobra nos ta esklabu; sinembargo, den nos sklabitut nos Dios no a bandona nos, ma a mustra nos miserikordia den bista di e reinan di Persia, pa duna nos rebibamentu pa lanta e kas di nos Dios, pa restora su ruinanan i pa duna nos un muraya na Juda i Jerusalem.

¹⁰"I awor, nos Dios, kiko nos lo bisa despues di esaki? Pasobra nos a bandona Bo mandamentunan

¹¹ku Bo a ordena pa medio di Bo sirbidonan e profetanan, bisando: 'E tera ku boso ta drenta pa podera di dje ta un tera impuru, pa motibu di e sushedat di e pueblonan di e teranan, pa motibu di nan abominashonnan ku a yen'e di punta pa punta i pa motibu di nan impuresa.

¹²Asina anto, no duna boso yu muhenan na nan yu hombernan ni tuma nan yu muhenan pa boso yu hombernan; i no buska nan pas ni nan prosperidat nunka, pa boso por ta fuerte i kome e kosnan bon di e tera, i lagu'e komo un erensia pa boso yu hombernan pa semper.'

¹³"I despues di tur loke ku a bin riba nos pa motibu di nos mal echonan i nos gran kulpa, komo ku Abo nos Dios a kastiga nos menos ku nos inikidatnan ta merese, i a duna nos un restante ku a skapa, manera esaki,

¹⁴nos lo bolbe kibra Bo mandamentunan i imparenta ku e pueblonan ku ta komete e abominashonnan aki? Lo Bo no rabia ku nos te na e punto di destrukshon, te ora no tin restante mas ni ningun ku ta skapa?

¹⁵O SENOR Dios di Israel, Bo ta hustu, pasobra nos a keda komo un restante ku a skapa, manera ta awe. Mira, nos ta Bo dilanti den nos kulpa, pasobra ningun hende no por para Bo dilanti pa motibu di esaki."