Read Papantla Totonac Nehemias 1 Bible Online

Nehemias 1 - Papantla Totonac bible

Nehemias 1

¹E palabranan di Nehemias, yu homber di Hakalias. Awor a sosode ku den luna di Kisleu, den e di binti ana, mientras ku mi tabata na sitadel Susa,

²Hanani, un di mi ruman hombernan, i algun homber di Juda a bin; i mi a puntra nan pa e hudiunan ku a skapa i ku a sobrebibi e koutiverio, i pa Jerusalem.

³I nan a bisami: "E restante ayanan den e provinsia, ku a sobrebibi e koutiverio, ta den gran aflikshon i reproche, i e muraya di Jerusalem ta basha abou i su portanan ta kima ku kandela."

⁴Awor a sosode ku ora mi a tende e palabranan aki, mi a kai sinta i a yora, i a tene rou pa hopi dia; i mi tabata yuna i hasi orashon dilanti di e Dios di shelu.

⁵I mi a bisa: "Mi ta rogaBo, O SENOR Dios di shelu, e Dios grandi i temibel, Kende ta preserva e aliansa i miserikordia pa esnan ku ta stim'E i ta warda Su mandamentunan,

⁶laga Bo orea ta atento awor i Bo wowonan habri pa skucha e orashon di Bo sirbido, ku mi ta hasi Bo dilanti awor, di dia i anochi, pa e yunan di Israel, Bo sirbidonan, konfesando e pikanan di e yunan di Israel, ku nos a hasi kontra Bo; ami i e kas di mi tata a peka.

⁷Nos a aktua na un manera masha korupto kontra Bo i no a warda e mandamentunan, ni e statutonan, ni e ordenansanan ku Bo a ordena Bo sirbido Moises.

⁸"Korda e palabra ku Bo a ordena Bo sirbido Moises, bisando: 'Si boso ta infiel, lo Mi plama boso entre e pueblonan.

⁹Ma si boso bolbe serka Mi i warda Mi mandamentunan i kumpli ku nan, ounke esnan di boso ku a wordu plama tabata keda na e parti mas aleha di e shelunan, lo Mi rekohe nan for di ayanan i hiba nan na e luga kaminda Mi a skohe pa Mi nomber permanese.'

¹⁰"I nan ta Bo sirbidonan i Bo pueblo ku Bo a redimi pa medio di Bo gran poder i pa medio di Bo man fuerte.

¹¹O Senor, mi ta rogaBo, laga Bo orea ta atento na e orashon di Bo sirbido i na e orashon di Bo sirbidonan, kende nan delisia ta pa tin temor di Bo nomber, i hasi Bo sirbido eksitoso awe, i lagu'e hana kompashon serka e homber aki."i Awor ami tabata e kopero di rei.