Read Papantla Totonac Nehemias 13 Bible Online

Nehemias 13 - Papantla Totonac bible

Nehemias 13

¹Riba e dia ei nan a lesa na bos haltu for di e buki di Moises pa e pueblo tende; i den dje a wordu hana skirbi ku nunka ningun amonita ni moabita mag drenta den e asamblea di Dios,

²pasobra nan no a bin topa e yunan di Israel ku pan i awa, ma a kontrata Balaam kontra nan pa maldishona nan. Sinembargo, nos Dios a kambia e maldishon den bendishon.

³Asina a sosode ku ora nan a tende e lei, nan a eksklui tur stranhero for di Israel.

⁴Awor prome ku esaki saserdote Eliasib, kende a keda nombra riba e kambernan di e kas di nos Dios, siendo famia di Tobias,

⁵a prepara un kamber grandi p'e, kaminda antes nan tabata pone e ofrendanan di mainshi, e sensia, e artikulonan-di-uzo i e diesmonan di mainshi, bina i zeta ku nan mester a duna e levitanan, e kantadonan i e wardadonan-di-porta, i e kontribushonnan pa e saserdotenan.

⁶Ma durante di tur e tempu aki mi no tabata na Jerusalem, pasobra den e di trint'i dos ana di Artaherhes, rei di Babilonia, mi a bai serka rei. Ma despues di algun tempu, mi a pidi rei permit pa bai,

⁷i mi a bin Jerusalem i a hana sa di e maldat ku Eliasib a hasi pa Tobias, dor di prepara un kamber p'e riba e plenchinan di e kas di Dios.

⁸I e kos a desgustami masha; pesei mi a benta tur Tobias su kosnan di kas for di e kamber.

⁹E ora ei mi a duna ordu i nan a limpia e kambernan; i mi a bolbe pone ayanan e artikulonan-di-uzo di e kas di Dios, huntu ku e ofrendanan di mainshi i e sensia.

¹⁰Tambe mi a deskubri ku e porshonnan di e levitanan no a wordu duna na nan, asina ku e levitanan i e kantadonan ku tabata hasi e sirbishi a sali bai, kada un pa su mes kunuku.

¹¹Asina mi a reprende e ofisialnan i a bisa: "Pakiko e kas di Dios ta keda bandona?" E ora ei mi a reuni nan huntu i a manda nan bek na nan post.

¹²E ora ei henter Juda a trese e diesmo di e mainshi, e bina i e zeta den e depositonan.

¹³I mi a nombra saserdote Selemias, Sadok, e eskriba, i Pedaias di e levitanan pa tuma enkargo di e depositonan, i fuera di nan tabatin Hanan, yu homber di Zakur, yu homber di Matanias; pasobra nan a wordu konsidera di ta konfiabel, i tabata nan tarea pa parti pa nan rumannan.

¹⁴Pa esaki, O mi Dios, korda di mi, i no paga kita mi echonan fiel ku mi a hasi pa e kas di mi Dios i pa su sirbishinan.

¹⁵Den e dianan ei mi a mira na Juda algun hende ku tabata trapa e bakinan-di-pers-wendruif riba dia di sabat, i ku tabata karga saku di trigo pone riba buriku, tambe bina, wendruif, figo i tur sorto di karga; i nan tabata trese nan na Jerusalem riba dia di sabat. Asina mi a spierta nan tokante di e dia ei ku nan tabata bende kuminda.

¹⁶Tambe hombernan di Tiro ku tabata biba ayanan, tabata trese piska i tur sorto di merkansia, i bende nan ku e yu hombernan di Juda riba sabat, asta na Jerusalem.

¹⁷E ora ei mi a reprende e nobelnan di Juda i a bisa nan: "Kiko e kos malu aki ta ku boso ta hasi, ku boso ta profana e dia di sabat?

¹⁸No t'asina ei boso tatanan tambe a hasi, ku nos Dios a trese tur e kalamidat aki riba nos i riba e stat aki? Tog boso ta anadi na e furia riba Israel dor di profana dia di sabat."

¹⁹I a sosode ku net ora tabata bira skur na e portanan di Jerusalem, prome ku sabat, mi a ordena pa sera e portanan i pa no habri nan te despues di sabat. E ora ei mi a stashona algun di mi sirbidonan na e portanan, pa ningun karga no drenta riba dia di sabat.

²⁰Un of dos biaha e negoshantenan i komersiantenan di tur sorto di merkansia a pasa nochi pafo di Jerusalem.

²¹E ora ei mi a spierta nan i a bisa nan: "Pakiko boso ta pasa nochi dilanti di e muraya? Si boso bolbe hasi asina, lo mi uza forsa kontra boso." For di e tempu ei nan no a bin mas riba dia di sabat.

²²I mi a ordena e levitanan pa nan purifika nan mes i bin komo wardado-di-porta pa santifika e dia di sabat. Pa motibu di esaki tambe korda di mi, O mi Dios, i tene kompashon di mi konforme e grandesa di Bo miserikordia.

²³Den e dianan ei mi a mira tambe ku e hudiunan tabata kasa ku muhenan di Asdod, Amon i Moab.

²⁴Di nan yunan mitar tabata papia lenga di Asdod, i ni un di nan no por a papia lenga di Juda, sino lenga di su mes pueblo so.

²⁵Asina mi a pleita ku nan i a maldishona nan i a dal algun di nan, ranka nan kabei i hasi nan hura na Dios: "Boso lo no duna boso yu muhenan na nan yu hombernan, ni tuma nan yu muhenan pa boso yu hombernan, ni pa boso mes.

²⁶No ta pa motibu di e kosnan aki Salomon, rei di Israel, a peka? Tog entre e hopi nashonnan no tabatin un rei manera e, i e tabata stima pa su Dios, i Dios a hasie rei di henter Israel; sinembargo, e muhenan stranhero a hasi asta Salomon komete pika.

²⁷Nos mester tende di boso anto ku boso a komete tur e maldat grandi aki, i a aktua ku infieldat kontra nos Dios dor di kasa ku muhenan stranhero?"

²⁸I un di e yu hombernan di Joiada, yu homber di sumosaserdote Eliasib, tabata yerno di Sanbalat e horonita; pesei mi a kore kune.

²⁹Korda di nan, O mi Dios, pasobra nan a profana e saserdosio i e aliansa di e saserdosio i di e levitanan.

³⁰Asina mi a purifika nan di tur kos stranhero i a pone responsabilidatnan pa e saserdotenan i e levitanan, kada un den su tarea,

³¹i mi a perkura pa e provishon di palu na tempunan stipula i pa e prome frutanan. Korda di mi, O mi Dios, pa bon.