Read Papantla Totonac Nehemias 2 Bible Online

Nehemias 2 - Papantla Totonac bible

Nehemias 2

¹I a sosode ku den luna di Nisan, den e di binti ana di rei Artaherhes, ora tabatin bina su dilanti, mi a kohe e bina i a duna rei esaki. I te awor aki nunka mi no tabata tristu den su presensia.

²Pesei rei a bisami: "Pakiko bo kara ta tristu ounke ku bo no ta malu? Esaki no ta nada otro sino tristesa di kurason." E ora ei mi a hana masha miedu.

³I mi a bisa rei: "Ku rei biba pa semper. Pakiko mi kara lo no ta tristu ora ku e stat, e luga di e tumbanan di mi tatanan, ta keda desola i su portanan a wordu destrui pa kandela?"

⁴E ora ei rei a bisami: "Kiko ta bo petishon?" Asina mi a hasi orashon na e Dios di shelu.

⁵I mi a bisa rei: "Si ta agrada rei, i si bo sirbido a hana grasia bo dilanti, mandami Juda, na e stat di e tumbanan di mi tatanan, pa mi rekonstruie."

⁶E ora ei rei a bisami, ku e reina sinta banda di dje: "Kuantu tempu bo biahe ta bai dura, i ki dia bo ta bolbe?" Asina a agrada rei di mandami, i mi a dun'e un tempu definitivo.

⁷I mi a bisa rei: "Si ta agrada rei, dunami kartanan pa e gobernadonan di e provinsianan na e otro banda di Riu Eufrates, pa nan lagami pasa te ora mi yega Juda,

⁸i un karta pa Asaf, e wardado di e mondi-sera di rei, pa e dunami palu pa traha balki pa e portanan di e forti ku ta keda banda di e tempel, pa e muraya di stat i pa e kas kaminda mi ta bai." I rei a dunami nan, pasobra e bon man di mi Dios tabata riba mi.

⁹E ora ei mi a bai serka e gobernadonan di e provinsianan na e otro banda di Riu Eufrates i a duna nan e kartanan di rei. Awor rei a manda ofisialnan di e ehersito i koredonan di kabai huntu ku mi.

¹⁰I ora Sanbalat e horonita i Tobias e ofisial amonita a tende esaki, esaki a desagrada nan masha ku un hende a bin pa buska e bienestar di e yunan di Israel.

¹¹Asina mi a yega Jerusalem i a keda tres dia ayanan.

¹²I den anochi mi a lanta, ami ku algun homber huntu ku mi. Mi no a bisa ningun hende kiko mi Dios a pone den mi kurason pa hasi pa Jerusalem; i no tabatin ningun bestia huntu ku mi, ku eksepshon di e bestia ku mi tabata kore ariba.

¹³Asina mi a sali bai den anochi na e Porta di Vaye den direkshon di e Pos di Dragon, i na e Porta di Mest, i a inspekta e murayanan di Jerusalem ku a wordu basha abou i su portanan ku a keda destrui pa kandela.

¹⁴Despues mi a sigui te na e Porta di Fuente i e Tanki di Awa di Rei, ma no tabatin luga pa e bestia ku mi tabata kore ariba pasa.

¹⁵Asina ta ku anochi mi a pasa dor di e vaye bai ariba i a inspekta e muraya. Despues mi a bolbe drenta e Porta di Vaye i a bin bek.

¹⁶I e ofisialnan no tabata sa unda mi a bai ni kiko mi a hasi; te ainda mi no a bisa e hudiunan, e saserdotenan, e nobelnan, e ofisialnan, ni e otronan ku tabata hasi e trabou.

¹⁷E ora ei mi a bisa nan: "Boso ta mira e situashon malu ku nos ta den, ku Jerusalem ta keda desola i su portanan kima pa kandela. Ban, laga nos rekonstrui e muraya di Jerusalem, pa nos no ta un reproche mas."

¹⁸I mi a konta nan kon e man di mi Dios tabata bon riba mi, i tambe tokante di e palabranan di rei ku el a papia ku mi. E ora ei nan a bisa: "Laga nos lanta i traha." Asina nan a pone man na e bon trabou.

¹⁹Ma ora Sanbalat e horonita, Tobias e ofisial amonita i Gesem e arabir a tende esaki, nan a hasi bofon di nos i a despresia nos i a bisa: "Kiko e kos aki ku boso ta hasi ta? Ta kontra rei boso ta rebeldia?"

²⁰Asina mi a kontesta nan i a bisa nan: "E Dios di shelu lo duna nos eksito; pesei nos, Su sirbidonan, lo lanta i traha, ma boso no tin ni parti, ni derecho, ni memoria na Jerusalem."