Read Papantla Totonac Nehemias 5 Bible Online

Nehemias 5 - Papantla Totonac bible

Nehemias 5

¹Awor tabatin un gran klamor di e pueblo i di nan esposanan kontra nan rumannan hudiu.

²Pasobra tabatin esnan ku tabata bisa: "Nos mes, nos yu hombernan i nos yu muhenan, ta hopi; pesei, laga nos buska mainshi pa nos kome i keda na bida."

³I tabatin otronan ku tabata bisa: "Nos a hipoteka nos terenonan, nos kunukunan di wendruif i nos kasnan pa nos hana mainshi pa motibu di e hamber."

⁴Tambe tabatin esnan ku tabata bisa: "Nos a fia plaka riba nos terenonan i nos kunukunan di wendruif, pa paga belasting di rei.

⁵I awor nos karni ta meskos ku karni di nos rumannan, nos yunan meskos ku nan yunan. I mira, nos ta forsa nos yu hombernan i nos yu muhenan pa ta esklabu, i algun di nos yu muhenan ta esklabu kaba, i nos no por hasi nada pa motibu ku nos terenonan i nos kunukunan di wendruif ta pertenese na otro hende."

⁶I mi a rabia masha tantu mes ora mi a tende nan klamor i e palabranan aki.

⁷Anto mi a pensa e kos bon i a akusa e nobelnan i e gobernantenan i a bisa nan: "Boso ta eksigi fiamentu ku interes, kada un for di su ruman!" Pesei mi a yama un asamblea grandi kontra nan.

⁸I mi a bisa nan: "Te asina leu ku nos tabata por, nos a redimi nos rumannan hudiu ku a wordu bendi ku e nashonnan. Awor, boso ta bai bende boso rumannan pa nan wordu bendi ku nos?" Anto nan a keda ketu i no tabata por a kontesta nada.

⁹Atrobe mi a bisa: "Loke boso ta hasi no ta bon. No t'asina ku boso mester kana den e temor di nos Dios pa motibu di e reproche di e nashonnan, nos enemigunan?

¹⁰I na mes manera ami, mi ruman hombernan i mi sirbidonan ta fia e pueblo plaka i mainshi. Pa fabor, laga nos pone un fin na e fiamentu ku interes aki.

¹¹Pa fabor, duna nan nan terenonan, nan kunukunan di wendruif, nan hofinan di oleifi i nan kasnan bek awe mes, tambe e di shen parti di e plaka i di e mainshi, e bina nobo i e zeta ku boso ta eksigi for di nan."

¹²Anto nan a bisa: "Nos lo debolbe esaki i lo no eksigi nada for di nan. Nos lo hasi eksaktamente manera bo ta bisa." Asina mi a yama e saserdotenan i a pone nan bou di huramentu, ku nan lo hasi segun e promesa aki.

¹³Tambe mi a sakudi e parti-dilanti di mi pana i a bisa: "Ku asin'aki Dios sakudi tur homber saka for di su kas i for di su propiedatnan, kendenan no ta kumpli ku e promesa aki. I ku asin'aki e keda sakudi i bashi." I henter e asamblea a bisa: "Amen!" I nan a alaba SENOR. Anto e pueblo a hasi segun e promesa aki.

¹⁴Ademas, for di e dia ku mi a keda nombra komo nan gobernado na tera di Juda, for di e di binti ana te na e di trint'i dos ana di rei Artaherhes, pa diesdos ana, ni ami ni mi rumannan no a kome kuminda di gobernado.

¹⁵Ma e gobernadonan di antes, ku tabata prome ku mi, a pone karga riba e pueblo, i nan a tuma pan i bina for di nan, fuera di kuarenta siklo di plata. Asta nan sirbidonan tabata domina e pueblo. Ma ami no a hasi asina, pa motibu di e temor di Dios.

¹⁶I tambe mi a keda riba e trabou di e muraya aki. Nos no a kumpra ningun tereno, i tur mi sirbidonan a reuni ayanan pa e trabou.

¹⁷Ademas, na mi mesa tabatin shent'i sinkuenta hudiu i ofisial, fuera di esnan ku a bin serka nos for di e nashonnan ku tabata ront di nos.

¹⁸Awor loke a wordu prepara pa kada dia tabata un buey i seis karne di e mihonan ku tin. Tambe nan a prepara parhanan pa mi. I un biaha den kada dies dia nan tabata provee tur sorto di bina na abundansia. Tog, ku tur esaki mi no a eksigi kuminda di gobernado, pasobra e trabou forsa tabata pisa riba e pueblo aki.

¹⁹Korda di mi, O mi Dios, pa bon, segun tur loke mi a hasi pa e pueblo aki.