Read Papantla Totonac Nehemias 6 Bible Online

Nehemias 6 - Papantla Totonac bible

Nehemias 6

¹Awor a sosode ku ora Sanbalat, Tobias, Gesem e arabir i e restu di nos enemigunan a hana sa ku mi a bolbe lanta e muraya, i ku no a keda ningun buraku den dje--ounke ku na e tempu ei ainda mi no a pone e portanan den e entradanan--

²Sanbalat i Gesem a manda bisami: "Ban, laga nos reuni huntu na un di e pueblitonan den e sabana di Ono." Ma nan tabatin plan di hasimi dano.

³Asina mi a manda mensaheronan serka nan, bisando: "Mi ta hasiendo un gran trabou i mi no por bin. Pakiko e trabou mester stop mientras ku mi ta lagu'e pa bin serka boso?"

⁴I kuater biaha nan a manda mensaheronan serka mi na e manera aki, i mi a kontesta nan na e mesun manera.

⁵E ora ei, pa di sinku biaha, Sanbalat a manda su sirbido serka mi na e mesun manera, ku un karta habri den su man.

⁶Den dje tabata para skirbi: "Tin rumor ta kore entre e nashonnan, i Gasmu ta bisa ku abo i e hudiunan tin plan di rebeldia; ta pesei boso ta bolbe lanta e muraya. I segun e rumornan aki abo ta bai bira nan rei.

⁷Tambe bo a nombra profetanan pa proklama na Jerusalem tokante di bo: 'Tin un rei na Juda!' I awor rei lo hana sa di e rumornan aki. Pesei, bin awor; laga nos delibera huntu."

⁸Anto mi a manda bis'e: "Kosnan asin'aki manera bo ta bisa no ta sosode. Ma ta bo mes kurason ta inventa nan."

⁹Pasobra nan tur tabata trata di spanta nos, bisando: "Nan lo wordu deskurasha den e trabou i e trabou lo no wordu hasi." Ma awor, O Dios, fortalese mi mannan.

¹⁰I ora mi a drenta kas di Semaias, yu homber di Delaia, yu homber di Mehetabel, kende tabata sera den kas, el a bisa: "Laga nos reuni den e kas di Dios, den e tempel, i laga nos sera e portanan di tempel, pasobra nan ta bin pa matabo, i nan ta bin anochi pa matabo."

¹¹Ma mi a kontesta: "Un homber manera ami mester hui? I un hende manera ami por bai den tempel pa skapa su bida? Mi no ta bai paden."

¹²E ora ei mi a komprende ku siguramente Dios no a mand'e, sino ku el a papia e profesia aki kontra mi, pasobra Tobias i Sanbalat a kontrat'e.

¹³Pa e motibu aki e tabata kontrata, pa mi hana miedu i aktua asina, i hasi pika, asina ku nan por a hana un mal raport di mi, pa nan por ponemi na berguensa.

¹⁴O mi Dios, korda riba Tobias i Sanbalat segun e echonan aki di nan, i tambe Noadias, e profeta muhe, i sobra di e profetanan ku tabata trata di spantami.

¹⁵Asina e muraya a keda kla riba e di bint'i sinku dia di luna di Elul, den sinkuent'i dos dia.

¹⁶I ora tur nos enemigunan a tende esaki i tur e nashonnan ront di nos a mira esaki, nan a perde animo, pasobra nan a rekonose ku e trabou aki a wordu kumpli ku e yudansa di nos Dios.

¹⁷Tambe den e dianan ei e nobelnan di Juda a manda hopi karta pa Tobias, i e kartanan di Tobias a bin pa nan.

¹⁸Pasobra hopi hende na Juda tabata liga na dje pa medio di huramentu, pasobra e tabata yerno di Sekanias, yu homber di Ara, i su yu homber Johanan a kasa ku yu muhe di Mesulam, yu homber di Berekias.

¹⁹Ademas, nan tabata papia den mi presensia di su bon obranan i tabata bis'e loke mi a papia. Anto Tobias a manda karta pa spantami.