Read Papantla Totonac Nehemias 9 Bible Online

Nehemias 9 - Papantla Totonac bible

Nehemias 9

¹Awor riba e di bint'i kuater dia di e luna aki e yunan di Israel a reuni ku yunamentu, ku pana-di-saku bisti i ku tera riba nan kurpa.

²I e desendientenan di Israel a separa nan mes for di tur stranhero, a bai para i a konfesa nan pikanan i e inikidatnan di nan tatanan.

³Mientras ku nan tabata para na nan luga, nan tabata lesa for di e buki di e lei di SENOR nan Dios pa un di kuater parti di dia; i pa un otro di kuater parti nan tabata konfesa i adora SENOR nan Dios.

⁴Awor Jesua, Bani, Kadmiel, Sebanias, Buni, Serebias, Bani i Kenani tabata para riba e plataforma di e levitanan, i nan tabata sklama na bos haltu na SENOR nan Dios.

⁵E ora ei e levitanan, Jesua, Kadmiel, Bani, Hasabnias, Serebias, Hodias, Sebanias i Petaias a bisa: "Lanta, bendishona SENOR boso Dios pa semper i semper!" "O ku Bo nomber glorioso sea bendishona i halsa riba tur bendishon i alabansa!

⁶Ta abo so ta SENOR. Abo a traha e shelunan, e shelu di shelunan ku henter nan ehersito, e tera i tur loke tin riba dje, e lamannan i tur loke tin den nan. Ta Abo ta duna bida na nan tur, i e ehersito selestial ta buig Bo dilanti.

⁷"Ta Abo ta SENOR Dios, Kende a skohe Abram i a sak'e for di Ur di e kaldeonan, i a dun'e e nomber Abraham.

⁸I Abo a hana su kurason fiel dilanti di Bo, i a sera un aliansa kune pa dun'e e tera di e kananeo, di e heteo i e amoreo, di e ferezeo, e jebuseo i e gergeseo-- pa duna esaki na su desendientenan. I Abo a kumpli ku Bo promesa, pasobra Bo ta hustu.

⁹"Bo a mira e aflikshon di nos tatanan na Egipto, i a tende nan sklamashon na Laman Kora.

¹⁰E ora ei Bo a hasi senalnan i maraviyanan kontra Farao, kontra tur su sirbidonan i kontra henter e pueblo di su tera; pasobra Bo tabata sa ku nan tabata aktua ku arogansia pa ku nan, i Bo a traha un nomber pa Bo mes, manera ta awe.

¹¹I Bo a parti e laman nan dilanti, asina nan a pasa meimei di e laman riba tera seku; i nan persiguidonan Bo a tira den e profundidatnan, manera un piedra den awanan brutu.

¹²I ku un pilar di nubia Bo a guia nan di dia, i ku un pilar di kandela anochi, pa lusa pa nan e kaminda ku nan mester a pasa.

¹³"E ora ei Bo a baha riba Seru Sinai, i a papia ku nan for di shelu; Bo a duna nan ordenansanan hustu i leinan berdadero, statutonan i mandamentunan bon.

¹⁴Asina Bo a hasi nan konose Bo sabat santu, i a duna nan mandamentunan, statutonan i lei, pa medio di Bo sirbido Moises.

¹⁵Pan for di shelu Bo a provee pa nan pa sasia nan hamber, i awa for di un baranka Bo a saka pa nan pa nan set, i Bo a bisa nan drenta pa podera di e tera ku Bo a hura di duna nan.

¹⁶"Ma nan, nos tatanan, a aktua ku arogansia; nan a bira kabesura i no kier a skucha Bo mandamentunan.

¹⁷I nan a nenga di skucha, i no a korda riba Bo obranan maraviyoso ku Bo a hasi meimei di nan; asina nan a bira kabesura i a nombra un lider pa nan bolbe na nan sklabitut na Egipto. Ma Bo ta un Dios di pordon, yen di grasia i kompashon, Kende no ta rabia lihe, i ta abunda den miserikordia; i Bo no a bandona nan.

¹⁸Asta ora nan a traha pa nan mes un bishe di metal basha, i a bisa: 'Esaki ta boso Dios ku a saka boso for di Egipto,' i a komete blasfemia pisa.

¹⁹"Abo, den Bo gran kompashon, no a bandona nan den desierto; e pilar di nubia no a laga nan di dia, pa guia nan riba nan kaminda, ni e pilar di kandela anochi, pa lusa pa nan e kaminda ku nan mester a pasa.

²⁰I Bo a duna Bo bon Spiritu pa instrui nan; Bo mana Bo no a kita for di nan boka, i Bo a duna nan awa pa nan set.

²¹Di berdat, kuarenta ana Bo a provee pa nan den desierto i nan no tabatin falta di nada; nan pana no a gasta, ni nan pianan no a hincha.

²²"Tambe Bo a duna nan reinonan i pueblonan, i Bo a duna esakinan na nan komo frontera. I nan a podera di tera di Sehon, rei di Hesbon, i di tera di Og, rei di Basan.

²³I Bo a multiplika nan yu hombernan manera e streanan di shelu, i Bo a trese nan na e tera ku Bo a bisa nan tatanan pa drenta i podera di dje.

²⁴Asina nan yu hombernan a drenta i a podera di e tera. I nan dilanti Bo a hasi e habitantenan di e tera, e kananeonan, somete. I Bo a entrega nan den nan man, huntu ku nan reinan i e pueblonan di e tera, pa hasi ku nan manera nan tabata kier.

²⁵I nan a kaptura statnan fortifika i un tera fertil. Nan a podera di kasnan yen di tur sorto di kos bon, posnan koba, kunukunan di wendruif, hofinan di oleifi, palunan di fruta na abundansia. Asina nan a kome, yena barika, i a bira gordo i a gosa di Bo gran bondat.

²⁶"Ma nan a bira desobedesido i a rebeldia kontra Bo, i a tira Bo lei tras di nan lomba i a mata Bo profetanan ku a spierta nan pa nan bolbe serka Bo, i nan a komete blasfemianan pisa.

²⁷Pesei Bo a entrega nan den man di nan opresornan ku tabata oprimi nan. Ma ora nan a sklama na Bo den e tempu di nan angustia, Bo a tende for di shelu, i konforme Bo gran kompashon, Bo a duna nan libradonan ku a libra nan for di man di nan opresornan.

²⁸"Ma asina ku nan tabatin sosiegu, nan a bolbe hasi malu Bo dilanti; pesei Bo a laga nan den man di nan enemigunan, asina ku nan tabatin dominio riba nan. Ora nan a bolbe sklama na Bo, Bo a tende for di shelu, i hopi biaha Bo a reskata nan konforme Bo miserikordia.

²⁹"Bo a spierta nan pa hasi nan bolbe na Bo lei. Tog nan a aktua ku arogansia i no a skucha Bo mandamentunan, ma a peka kontra Bo ordenansanan, pa medio di kualnan un hende, si e kumpli ku nan, lo biba; i nan a hisa nan skouder di rebeldia i a hasi nan nek steif i no kier a skucha.

³⁰Sinembargo, Bo a soporta nan hopi ana, i a spierta nan dor di Bo Spiritu pa medio di Bo profetanan; tog nan no kier a skucha; pesei Bo a entrega nan den man di e pueblonan di e teranan.

³¹Sinembargo, den Bo gran kompashon Bo no a kaba ku nan ni a bandona nan, pasobra Bo ta un Dios di grasia i kompashon.

³²"Pesei anto, nos Dios, e Dios grandi, poderoso i temibel, Kende ta warda aliansa i miserikordia, no laga parse insignifikante Bo dilanti, tur e sufrimentu ku a bin riba nos, riba nos reinan, nos prensnan, nos saserdotenan, nos profetanan, nos tatanan i riba henter Bo pueblo, for di e dianan di e reinan di Asiria te dia djawe.

³³Sinembargo, Bo ta hustu den tur loke ku a bin riba nos; pasobra Bo a trata ku fieldat, ma nos a aktua ku maldat;

³⁴pasobra nos reinan, nos lidernan, nos saserdotenan i nos tatanan no a warda Bo lei, ni a paga atenshon na Bo mandamentunan i Bo spiertamentunan, ku Bo a spierta nan kune.

³⁵Ma nan, den nan mes reino, apesar di Bo gran bondat ku Bo a duna nan, apesar di e tera espasioso i riku ku Bo a pone nan dilanti, no a sirbiBo ni a bira for di nan echonan malu.

³⁶"Mira, awe nos ta esklabu, i pa loke ta e tera ku Bo a duna nos tatanan, pa kome di su frutanan i di su abundansia, mira, nos ta esklabu den dje.

³⁷I su kosecha abundante ta pa e reinan ku Bo a pone riba nos pa motibu di nos pikanan; nan ta goberna tambe riba nos kurpanan i riba nos bestianan, manera nan ta desea; asina nos ta den gran angustia.

³⁸"Awor pa motibu di tur esaki nos ta sera un pakto por eskrito; i riba e dokumento seya tin e nombernan di nos lidernan, nos levitanan i nos saserdotenan."