Read Papantla Totonac Esther 1 Bible Online

Esther 1 - Papantla Totonac bible

Esther 1

¹Awor a sosode ku den e dianan di Asuero--e Asuero ku tabata reina for di India te na Etiopia riba shent'i bint'i shete provinsia--

²den e dianan ei ku rei Asuero tabata sinta riba su trono real ku tabata keda na e kapital Susa,

³den e di tres ana di su reinado, el a tene un bankete pa tur su prensnan i sirbidonan, e ofisialnan di ehersito di Persia i Media, e nobelnan i e prensnan di su provinsianan ku tabata den su presensia.

⁴I el a mustra e rikesanan di e gloria di su reino i e splendor di su gran mahestat durante di hopi dia, shent'i ochenta dia.

⁵I ora ku e dianan aki a pasa, rei a tene un bankete, ku a dura shete dia, riba e plenchi di e hofi di palasio di rei, pa henter e pueblo ku tabata presente na e kapital Susa, for di esun di mas haltu te na esun di mas umilde.

⁶Tabatin kortinanan di lino fini kolo blanku i lila, teni ku kordonnan di lino fini kolo purpura, pasa na renchinan di plata i kolumnanan di marmer, i sofanan di oro i plata riba un flur di mosaiko di porfido, marmer, parelmur i piedranan presioso.

⁷Bibida tabata wordu sirbi den kopa di oro, tur diferente for di otro, i e bina real tabata abundante, di akuerdo ku rei su generosidat.

⁸I e bebementu tabata sosode konforme e lei. No tabatin obligashon, pasobra t'asina rei a duna tur ofisial di su kas ordu pa nan hasi segun deseo di kada persona.

⁹Reina Vasti tambe a tene un bankete pa e muhenan den e palasio di rei Asuero.

¹⁰Riba e di shete dia, ora kurason di rei tabata alegre di bina, el a ordena Mehuman, Bizta, Harbona, Bigta, Abagta, Zetar i Karkas, e shete eunukonan ku tabata sirbi den presensia di rei Asuero,

¹¹pa trese reina Vasti dilanti di rei, ku su korona real bisti pa e pueblo i e prensnan mira su bunitesa, pasobra e tabata masha bunita.

¹²Ma reina Vasti a nenga di bin riba e ordu di rei ku e eunukonan a dun'e. E ora ei rei a rabia masha i su furia tabata kima den dje.

¹³E ora ei rei a bisa e hombernan sabi ku tabata konose e tempunan--pasobra tabata kustumber di rei pa papia asina dilanti di tur esnan ku tabata konose lei i hustisia,

¹⁴i ku tabata hopi yega na dje: Karsena, Setar, Admata, Tarsis, Meres, Marsena i Memukan, e shete prensnan di Persia i Media, kendenan tabatin entrada serka rei i ku tabata okupa e prome luga den reino.

¹⁵"Kiko mester hasi ku reina Vasti segun lei, komo ku e no a obedese e ordu di rei Asuero ku e eunukonan a dun'e?"

¹⁶I den presensia di rei i di e prensnan Memukan a bisa: "Reina Vasti no solamente a perhudika rei, sino tambe tur e prensnan i tur e pueblonan ku tin den tur e provinsianan di rei Asuero.

¹⁷Pasobra e komportashon di reina lo yega na konosementu di tur e muhenan, i lo hasi ku nan lo trata nan esposo ku despresio dor di bisa: 'Rei Asuero a duna ordu pa reina Vasti wordu tresi su dilanti, ma e no a bin.'

¹⁸I awe mes e damanan di Persia i Media ku a tende di reina su komportashon lo papia na mes manera ku tur e prensnan di rei, i lo tin masha hopi despresio i rabia.

¹⁹"Si esaki ta agrada rei, laga un dekreto real wordu saka dor di rei, i laga esaki wordu skirbi den e leinan di Persia i Media, asina ku e no por wordu revoka, ku Vasti no mag bin mas den presensia di rei Asuero, i laga rei duna Vasti su puesto real na un otro ku ta mas digno kune.

²⁰I ora ku e dekreto ku rei lo dikta wordu tendi den henter su reino, pasobra e reino ta grandi, e ora ei tur muhe, grandi i umilde, lo duna onor na nan esposonan."

²¹I e palabra aki a agrada rei i e prensnan, i rei a hasi manera Memukan a propone.

²²Asina el a manda karta pa tur e provinsianan di rei, pa kada provinsia konforme su moda di skirbi i pa kada pueblo konforme su idioma, ku tur homber mester manda den su mes kas, i papia idioma di su mes pueblo.