Read Papantla Totonac Esther 3 Bible Online

Esther 3 - Papantla Totonac bible

Esther 3

¹Despues di e susesonan aki rei Asuero a halsa Haman, yu homber di Hamedata e agagita, i a promov'e i a stablese su outoridat riba tur e prensnan ku tabata huntu kune.

²I tur rei su sirbidonan ku tabata na porta di rei tabata buig te na suela i duna omenahe na Haman; pasobra asina rei a ordena tokante di dje. Ma Mardokeo no a buig ni a duna omenahe.

³E ora ei rei su sirbidonan ku tabata na porta di rei a bisa Mardokeo: "Pakiko bo ta transgresa ordu di rei?"

⁴Awor a sosode ku despues ku nan a papia tur dia kune i e no kier a skucha nan, nan a konta Haman esaki pa mira si Mardokeo lo a mantene su mes den loke ku e ta bisa; pasobra el a bisa nan ku e tabata hudiu.

⁵Ora Haman a ripara ku Mardokeo no a buig te na suela ni a dun'e omenahe, Haman a yena ku furia.

⁶Ma e no a keda satisfecho pa hasi un atentado kontra Mardokeo so, pasobra nan a kont'e kual tabata e pueblo di Mardokeo; pesei Haman a buska pa destrui tur e hudiunan, e pueblo di Mardokeo ku tabata den henter e reino di Asuero.

⁷Den e prome luna, ku ta luna di Nisan, den e di diesdos ana di rei Asuero, Pur, esta, lot, a wordu tira dilanti di Haman, pa kada dia i pa kada luna, te na e di diesdos luna, esta, luna di Adar.

⁸E ora ei Haman a bisa rei Asuero: "Tin un sierto pueblo plama i distribui meimei di e pueblonan den tur e provinsianan di bo reino; nan leinan ta diferente for di esnan di tur otro pueblo, i nan no ta warda e leinan di rei. Pesei no ta na rei su benefisio pa laga nan keda.

⁹Si ta agrada rei, laga saka un dekreto pa nan wordu destrui, i lo mi paga dies mil talento di plata den man di esnan enkarga ku e asuntonan di rei, pa pone den e luganan-di-warda-tesoro di rei."

¹⁰E ora ei rei a kita su renchi di seyo for di su man duna Haman, yu homber di Hamedata e agagita, enemigu di e hudiunan.

¹¹I rei a bisa Haman: "E plata ta di bo, i e pueblo tambe, pa hasi ku nan manera bo hana ta bon."

¹²E ora ei e eskribanan di rei a wordu yama riba e di diestres dia di e prome luna, i a wordu skirbi na e satrapanan di rei, na e gobernadonan ku tabata riba kada provinsia i na e prensnan di kada pueblo, manera Haman a ordena, kada provinsia segun su moda di skirbi i kada pueblo segun su idioma. Esaki a wordu skirbi den nomber di rei Asuero i seya ku e renchi di seyo di rei.

¹³I e kartanan a wordu manda ku mensaheronan na tur e provinsianan di rei, pa destrui, pa mata i pa elimina tur hudiu, tantu hoben komo bieu, muhe i mucha, den un dia, riba e di diestres dia di e di diesdos luna, ku ta luna di Adar, i pa gara nan propiedat komo botin.

¹⁴Un kopia di e dokumento ku mester a wordu proklama komo lei den tur provinsia a wordu publika pa tur e pueblonan, pa nan tene nan mes kla pa e dia ei.

¹⁵Riba ordu di rei e mensaheronan a sali bai pura, mientras ku e dekreto a wordu proklama na e kapital Susa; i mientras ku rei i Haman a kai sinta pa bebe, e stat Susa tabata den konfushon.