Read Papantla Totonac Esther 4 Bible Online

Esther 4 - Papantla Totonac bible

Esther 4

¹Ora Mardokeo a hana sa di tur loke ku a wordu hasi, el a sker su pananan, a bisti pana di saku i shinishi i a sali bai den sentro di e stat, i a grita yora amargamente.

²I el a yega te na e porta di rei, pasobra ningun hende no tabatin mag di drenta e porta di rei ku pana di saku bisti.

³I den kada provinsia ku e ordu i dekreto di rei a yega, tabatin gran lamentashon entre e hudiunan, ku yunamentu, yoramentu i sklamamentu; i hopi tabata drumi riba pana di saku i shinishi.

⁴E ora ei Ester su sirbientenan i su eunukonan a bin kont'e, i e reina a keda masha angustia. I el a manda pana pa Mardokeo bisti, pa e kita e pana di saku for di su kurpa, ma Mardokeo no a asepta nan.

⁵E ora ei Ester a manda yama Hatak, un di e eunukonan di rei ku rei a nombra pa sirbi Ester, i a orden'e pa bai serka Mardokeo pa hana sa kiko a pasa i pakiko tabata asina.

⁶Asina Hatak a sali bai serka Mardokeo na e plasa di stat dilanti di e porta di rei.

⁷I Mardokeo a kont'e tur loke a pasa kune, i e suma eksakto di plaka ku Haman a priminti di paga pa pone den e luga-di-warda-tesoro di rei pa destrui e hudiunan.

⁸Tambe Mardokeo a dun'e un kopia di e teksto di e dokumento ku a wordu publika na Susa pa destrui nan, pa e mustra Ester i pon'e na haltura, i pa orden'e pa bai serka rei, pa pidi su fabor i pa rogu'e pa su pueblo.

⁹I Hatak a bin bek i a konta Ester loke Mardokeo a bisa.

¹⁰E ora ei Ester a papia ku Hatak i a orden'e pa bisa Mardokeo:

¹¹"Tur e sirbidonan di rei i e pueblo di e provinsianan di rei sa ku kualkier homber of muhe ku bin serka rei den e plenchi paden sin ku el a wordu yama, ta un lei so tin p'e: e mester wordu mata. Solamente si rei ekstende e septer di oro na dje, e por biba. I ami no a wordu yama pa bin serka rei e trinta dianan aki."

¹²I nan a konta Mardokeo tur loke Ester a bisa.

¹³E ora ei Mardokeo a bisa nan pa kontesta Ester asina: "No pensa ku abo ku ta den palasio di rei tin mas chens di skapa ku tur e otro hudiunan.

¹⁴Pasobra si bo keda ketu awor aki, alivio i liberashon lo bin pa e hudiunan for di un otro kaminda, ma abo i e kas di bo tata lo perese. I ken sa ku no ta pa un tempu manera esaki bo a bira reina?"

¹⁵E ora ei Ester a bisa nan pa kontesta Mardokeo asina:

¹⁶"Bai, reuni tur e hudiunan ku tin na Susa, i yuna pa mi; no kome ni bebe pa tres dia, ni di dia ni anochi. Ami ku mi sirbientenan tambe lo yuna na mes manera. I asina lo mi bai serka rei, lokual no ta konforme e lei; i si mi perese, mi ta perese."

¹⁷Asina Mardokeo a bai i a hasi manera Ester a orden'e.