Read Papantla Totonac Esther 5 Bible Online

Esther 5 - Papantla Totonac bible

Esther 5

¹Awor a sosode ku riba e di tres dia Ester a bisti su pananan real i a bai para riba e plenchi paden di rei su palasio, dilanti di rei su salanan, i rei tabata sinta riba su trono real den e sala real, enfrente di e entrada di palasio.

²I a sosode ku ora rei a mira reina Ester para riba e plenchi, el a hana grasia den su bista; i rei a ekstende na Ester e septer di oro ku e tabatin den su man. Asina Ester a hala serka i a toka punta di e septer.

³E ora ei rei a bis'e: "Ki ta molestiabo, reina Ester? I kiko ta bo deseo? Lo e wordu duna na bo, asta mitar di e reino."

⁴I Ester a bisa: "Si ta agrada rei, laga rei i Haman bin awe na e bankete ku mi a prepara pa rei."

⁵Anto rei a bisa: "Trese Haman lihe pa nos hasi manera Ester ta desea." Asina rei i Haman a bin na e bankete ku Ester a prepara.

⁶I mientras ku nan tabata bebe bina na e bankete, rei a bisa Ester: "Kiko ta bo petishon, pasobra lo bo han'e. I kiko ta bo deseo? Lo e wordu kumpli, te asta mitar di e reino."

⁷Asina Ester a kontesta i a bisa: "Mi petishon i mi deseo ta:

⁸si mi a hana grasia den bista di rei, i si ta agrada rei pa kumpli ku mi petishon i hasi loke mi ta desea, anto ku rei i Haman bin na e bankete ku lo mi prepara pa nan, i manan lo mi hasi manera rei ta bisa."

⁹Anto e dia ei Haman a sali bai kontentu i ku alegria den su kurason; ma ora Haman a mira Mardokeo na porta di rei, i ku e no a lanta para p'e ni tembla su dilanti, Haman a yena ku rabia riba Mardokeo.

¹⁰Sinembargo, Haman a domina su mes i a bai su kas. Anto, despues di a yama su amigunan i su esposa Zeres huntu,

¹¹Haman a konta nan di e gloria di su rikesa, di e kantidat di su yu hombernan, di tantu biaha ku rei a elogi'e, i kon rei a hals'e riba e prensnan i sirbidonan di rei.

¹²Tambe Haman a bisa: "Asta reina Ester no ta laga ningun otro hende sino ami so bin huntu ku rei na e bankete ku el a prepara; i pa manan tambe mi ta invita serka dje huntu ku rei.

¹³Tog tur esaki no ta sirbimi di nada tanten ku mi ta mira Mardokeo, e hudiu, ta sinta na porta di rei."

¹⁴E ora ei su esposa Zeres i tur su amigunan a bis'e: "Laga traha un palu-di-horka di sinkuenta kodo haltu i pidi rei manan mainta pa laga horka Mardokeo na dje; despues bai bankete ku rei kontentu asina." I e konseho a agrada Haman; asina el a laga traha e palu di horka.