Read Papantla Totonac Esther 6 Bible Online

Esther 6 - Papantla Totonac bible

Esther 6

¹E anochi ei rei no por a drumi. Pesei el a duna ordu pa trese e buki di registro, e kronikanan, i nan a wordu lesa pa rei.

²I a wordu hana skirbi loke Mardokeo a reporta tokante di Bigtan i Teres, dos di rei su eunukonan ku tabata wardado-di-porta, ku nan kier a hasi un atentado kontra rei Asuero.

³I rei a bisa: "Ki onor of distinshon a wordu duna na Mardokeo pa esaki?" Anto e sirbidonan di rei, ku tabata atend'e, a bisa: "Nada no a wordu hasi p'e."

⁴Asina rei a bisa: "Ta ken ta riba plenchi?" Awor net Haman a kaba di drenta e plenchi pafo di palasio di rei, pa papia ku rei pa laga horka Mardokeo na e palu-di-horka ku el a prepara p'e.

⁵I rei su sirbidonan a bis'e: "Ata Haman para riba plenchi." I rei a bisa: "Lagu'e drenta."

⁶Asina Haman a drenta i rei a bis'e: "Kiko mester hasi pa e homber ku rei ta desea di onra?" I Haman a bisa den su mes: "Ta ken rei lo a desea di onra mas ku ami?"

⁷E ora ei Haman a bisa rei: "Pa e homber ku rei ta desea di onra,

⁸laga nan trese un pana real ku rei a yega di bisti, i e kabai ku rei mes a kore, i riba kual su kabes un korona real a wordu poni;

⁹i laga entrega e pana i e kabai na un di rei su prensnan di mas nobel, i laga nan bisti e homber ku rei ta desea di onra, i pasa kune riba kabai riba e plasa di stat, i proklama su dilanti: 'Asina lo wordu hasi ku e homber ku rei ta desea di onra.'"

¹⁰E ora ei rei a bisa Haman: "Hasi lihe kohe e pana i e kabai manera bo a bisa, i hasi asina ku Mardokeo, e hudiu, kende ta sinta na porta di rei; no keda sin hasi nada di tur loke bo a bisa."

¹¹Asina Haman a kohe e pana i e kabai, i a bisti Mardokeo, i a pasa kune riba e plasa di stat, i a proklama su dilanti: "Asina lo wordu hasi ku e homber ku rei ta desea di onra."

¹²Despues Mardokeo a bolbe na e porta di rei. Ma Haman a bai kas pura, tur tristu, ku kabes tapa.

¹³I Haman a konta su esposa Zeres i tur su amigunan tur loke ku a pas'e. E ora ei su hombernan sabi i su esposa Zeres a bis'e: "Si Mardokeo, dilanti di kende bo a kuminsa kai kaba, ta di desendensia hudiu, lo bo no vens'e, ma lo bo kai su dilanti sigur."

¹⁴Mientras ku nan tabata papia kune ainda, e eunukonan di rei a yega i a hiba Haman pura na e bankete ku Ester a prepara.