Read Papantla Totonac Esther 7 Bible Online

Esther 7 - Papantla Totonac bible

Esther 7

¹Awor rei i Haman a bin pa bebe bina serka reina Ester.

²I riba e di dos dia tambe, ora nan tabata bebe nan bina na e bankete, rei a bisa Ester: "Kiko ta bo petishon, reina Ester? Lo bo han'e. I kiko ta bo deseo? E lo wordu kumpli, asta mitar di e reino."

³E ora ei reina Ester a kontesta i a bisa: "Si mi a hana grasia den bo bista, O rei, i si ta agrada rei, laga mi bida wordu duna na mi komo mi petishon, i mi pueblo komo mi deseo;

⁴pasobra nos a wordu bendi, ami i mi pueblo, pa wordu destrui, pa wordu mata i pa wordu elimina. Awor si ta komo esklabu so nos a wordu bendi, homber i muhe, lo mi a keda ketu, pasobra nos aflikshon no por wordu kompara ku e dano ku rei lo sufri pa motibu di esaki."

⁵E ora ei rei Asuero a puntra reina Ester: "Ta ken e ta, i na unda e ta, esun ku lo a tribi di hasi tal kos?"

⁶I Ester a bisa: "Un atversario i un enemigu, e malbado Haman aki ta!" E ora ei Haman a spanta masha dilanti di rei i reina.

⁷I rei a lanta den su furia for di e bankete di bina i a bai den e hofi di e palasio; ma Haman a keda pa suplika reina Ester pa su bida, pasobra el a mira ku rei a tuma un desishon fatal kontra dje.

⁸Awor ora rei a bolbe for di e hofi di palasio na e luga kaminda nan tabata bebe bina, Haman a kai riba e sofa kaminda Ester tabata. Anto rei a bisa: "Asta reina e kier viola, anto ku ami den kas?" Asina ku e palabra aki a sali for di boka di rei, nan a tapa kara di Haman.

⁹E ora ei Harbona, un di e eunukonan ku tabata sirbi rei, a bisa: "Ata e palu-di-horka di sinkuenta kodo haltu ku Haman a traha pa Mardokeo, kende a papia na fabor di rei, ta para na e kas di Haman." Anto rei a bisa: "Kologa Haman na dje."

¹⁰Asina nan a kologa Haman na e palu-di-horka ku el a prepara pa Mardokeo, i rei su rabia a baha.