Read Papantla Totonac Esther 8 Bible Online

Esther 8 - Papantla Totonac bible

Esther 8

¹Riba e mesun dia ei rei Asuero a duna reina Ester e kas di Haman, enemigu di e hudiunan; i Mardokeo a presenta dilanti di rei, pasobra Ester a deklara kiko Mardokeo tabata di dje.

²I rei a kita su renchi di seyo, ku el a tuma bek for di Haman, duna Mardokeo. I Ester a pone Mardokeo riba e kas di Haman.

³E ora ei Ester a papia atrobe ku rei, a tira su kurpa abou na su pia, a yora i rogu'e pa anula e plan di maldat di Haman e agagita, i su komplot ku el a traha kontra e hudiunan.

⁴I rei a ekstende e septer di oro na Ester. Asina Ester a lanta para dilanti di rei.

⁵E ora ei el a bisa: "Si ta agrada rei, si mi a hana grasia su dilanti, si e asunto ta parse rei hustu i si mi ta agradabel den rei su bista, laga duna ordu por eskrito pa revoka e kartanan ku Haman, yu homber di Hamedata e agagita, a plania, kualnan el a skirbi pa destrui e hudiunan ku ta den tur provinsia di rei.

⁶Pasobra kon mi por para mira e kalamidat ku lo bin riba mi pueblo, i kon mi por para mira e destrukshon di mi hendenan?"

⁷Asina rei Asuero a bisa reina Ester i Mardokeo, e hudiu: "Mira, mi a duna Ester e kas di Haman, i Haman mes nan a kologa na e palu-di-horka, pasobra el a saka su man kontra e hudiunan.

⁸Awor boso skirbi e hudiunan na nomber di rei, manera ta parse bon den boso bista, i seya esaki ku e renchi di seyo di rei; pasobra un dekreto ku a wordu skirbi den nomber di rei i seya ku e renchi di seyo di rei no por wordu revoka."

⁹Asina e eskribanan di rei a wordu yama e tempu ei, den e di tres luna (esta, luna di Sivan), riba e di bint'i tres dia; i esaki a wordu skirbi konforme tur loke Mardokeo a ordena e hudiunan, e satrapanan, e gobernadonan i e prensnan di e provinsianan, for di India te na Etiopia, shent'i bint'i shete provinsia, na kada provinsia segun su moda di skirbi, i na kada pueblo segun su idioma, na e hudiunan tambe segun nan moda di skirbi i segun nan idioma.

¹⁰I el a skirbi den nomber di rei Asuero, i a sey'e ku e renchi di seyo di rei, i a manda kartanan ku mensaheronan riba kabai, kabainan kria den e stal real.

¹¹Den e kartanan rei a duna e hudiunan ku tabata den tur stat e derecho di reuni huntu i defende nan bida, pa destrui, pa mata i pa elimina henter e ehersito di kualke pueblo of provinsia ku ataka nan, tambe mucha chikitu i muhe, i plunder nan propiedatnan,

¹²riba un dia den tur e provinsianan di rei Asuero, e di diestres dia di e di diesdos luna, (esta, luna di Adar).

¹³Un kopia di e dekreto, ku mester a wordu proklama komo lei den kada provinsia, a wordu publika den tur e pueblonan, asina ku e hudiunan por a keda kla e dia ei pa venga nan mes riba nan enemigunan.

¹⁴E mensaheronan, pura i riba ordu di rei, a sali bai riba e kabainan real; i e dekreto a wordu publika na e kapital Susa.

¹⁵Despues Mardokeo a sali for di presensia di rei na pana real, blou i blanku, ku un korona grandi di oro i un pana di lino fini i purpura; i e stat Susa tabata grita i regosiha.

¹⁶Pa e hudiunan tabatin lus i alegria, goso i onor.

¹⁷I den kada provinsia i den tur stat, tur kaminda ku e ordu di rei i su dekreto a yega, tabatin alegria i goso serka e hudiunan, un fiesta i un dia liber. I hopi hende for di e pueblonan di e tera a bira hudiu, pasobra temor pa e hudiunan a kai riba nan.