Read Papantla Totonac Esther 9 Bible Online

Esther 9 - Papantla Totonac bible

Esther 9

¹Awor den e di diesdos luna (esta, luna di Adar), riba e di diestres dia, ora ku e ordu i dekreto di rei tabata bai wordu ehekuta, riba e dia ku e enemigunan di e hudiunan tabata spera di hana dominio riba nan, a sosode net kontrario, asina ku ta e hudiunan a hana dominio riba esnan ku tabata odia nan.

²E hudiunan a reuni den nan statnan den tur e provinsianan di rei Asuero, pa hasi un atentado riba esnan ku tabata kier a hasi nan dano; i ningun hende no por a para nan dilanti, pasobra henter e pueblo a hana miedu di nan.

³Asta tur e prensnan di e provinsianan, e satrapanan, e gobernadonan i esnan ku tabata atende e asuntonan di rei tabata yuda e hudiunan, pasobra temor pa Mardokeo a kai riba nan.

⁴Di berdat, Mardokeo tabata grandi den e kas di rei, i su fama a plama den tur e provinsianan, pasobra e homber Mardokeo a bira mas i mas grandi.

⁵Asina e hudiunan a derota tur nan enemigunan ku spada, i a mata i destrui nan; i nan a hasi manera nan tabata kier ku esnan ku tabata odia nan.

⁶I na e kapital Susa e hudiunan a mata i a destrui sinku shen homber,

⁷i nan a mata Parsandata, Dalfon, Aspata,

⁸Porata, Adalia, Aridata,

⁹Parmasta, Arisai, Aridai i Vaizata,

¹⁰e dies yu hombernan di Haman, yu homber di Hamedata, enemigu di e hudiunan; ma nan no a mishi ku e botin.

¹¹E dia ei e kantidat di hende ku a wordu mata na e kapital Susa a wordu reporta na rei.

¹²I rei a bisa reina Ester: "E hudiunan a mata i a destrui sinku shen homber i e dies yu hombernan di Haman na e kapital Susa. Ta kiko nan a hasi den e otro provinsianan di rei? Awor kiko ta bo petishon? Lo bo hana esei. I kiko mas bo ta desea? Esei tambe lo wordu hasi."

¹³E ora ei Ester a kontesta: "Si ta agrada rei, permiti e hudiunan ku ta na Susa hasi manan tambe konforme e dekreto di awe; i laga Haman su dies yu hombernan wordu kologa na e palu-di-horka."

¹⁴Asina rei a duna ordu pa esei sosode; i un dekreto a wordu publika na Susa, i nan a horka e dies yu hombernan di Haman.

¹⁵I e hudiunan ku tabata na Susa a reuni riba e di dieskuater dia di luna di Adar tambe, i a mata tres shen homber na Susa, ma nan no a mishi ku e botin.

¹⁶Awor e restu di e hudiunan ku tabata den e provinsianan di rei a reuni, pa defende nan bida i skapa di nan enemigunan, i pa mata setent'i sinku mil di esnan ku tabata odia nan; ma nan no a mishi ku e botin.

¹⁷Esaki a sosode riba e di diestres dia di luna di Adar, i riba e di dieskuater dia nan a sosega i a hasie un dia di fiesta i alegria.

¹⁸Ma e hudiunan ku tabata na Susa a reuni riba e di diestres i e di dieskuater dia di e mesun luna, i nan a sosega riba e di diesinku dia i a hasie un dia di fiesta i alegria.

¹⁹Pesei e hudiunan di e distriktonan pafo, ku tabata biba den e statnan sin muraya, a hasi e di dieskuater dia di luna di Adar un dia liber pa gosa i hasi fiesta i pa manda porshonnan di kuminda pa otro.

²⁰Despues Mardokeo a skirbi e kosnan aki, i el a manda karta pa tur hudiu den tur e provinsianan di rei Asuero, tantu esnan serka komo esnan leu,

²¹pa obliga nan selebra e di dieskuater dia di luna di Adar, i e di diesinku dia di e mesun luna, tur ana,

²²pasobra riba e dianan ei e hudiunan a skapa di nan enemigunan, i tabata un luna ku a kambia pa nan di tristesa pa alegria i di luto pa un dia di fiesta, pa nan hasi nan dianan di fiesta i alegria i di manda porshonnan di kuminda pa otro, i regalo pa e pobernan.

²³Asina e hudiunan a asepta pa sigui hasi loke nan a kuminsa hasi, i loke Mardokeo a skirbi nan.

²⁴Pasobra Haman, yu homber di Hamedata e agagita, atversario di tur hudiu, a traha komplot kontra e hudiunan pa destrui nan, i a tira Pur, esta, lot, pa tormenta nan i destrui nan.

²⁵Ma ora esaki a bin dilanti di rei, el a ordena pa medio di karta, pa e komplot di maldat, ku Haman a traha kontra e hudiunan, bolbe riba su mes kabes, i pa e ku su yu hombernan wordu kologa na e palu-di-horka.

²⁶Pesei nan a yama e dianan aki Purim, na e nomber Pur. I pa motibu di e instrukshonnan den e karta aki, tantu loke nan a mira relashona ku esaki, komo loke a sosode ku nan,

²⁷e hudiunan a stablese i a hasi un kustumber pa nan mes i pa nan desendientenan, i pa tur esnan ku a uni nan mes ku nan, pa no keda sin selebra e dos dianan aki tur ana, konforme nan regla i konforme nan tempu stipula.

²⁸Asina e dianan aki mester a wordu rekorda i selebra den tur generashon, tur famia, tur provinsia i tur stat; i e dianan aki di Purim no mester a keda sin wordu selebra entre e hudiunan, ni nan desendientenan no mester lubida nan nunka.

²⁹E ora ei reina Ester, yu muhe di Abihail, i Mardokeo e hudiu a skirbi ku tur outoridat pa konfirma e di dos karta aki tokante di Purim.

³⁰I Mardokeo a manda karta pa tur hudiu den e shent'i bint'i shete provinsianan di e reino di Asuero, esta, palabranan di pas i berdat,

³¹pa stablese e dianan di Purim aki na nan tempunan stipula, manera Mardokeo e hudiu i reina Ester a stablese pa nan, i manera nan a stablese pa nan mes i pa nan desendientenan, ku instrukshonnan pa nan tempunan di yunamentu i nan lamentashonnan.

³²I e ordu di Ester a stablese e kustumbernan aki di Purim, i esaki a wordu skirbi den e buki.