Read Papantla Totonac Eksodo 1 Bible Online

Eksodo 1 - Papantla Totonac bible

Eksodo 1

¹Awor esakinan ta e nombernan di e yunan di Israel ku a bin Egipto huntu ku Jakob; kada un di nan a bin ku e hendenan di su kas:

²Ruben, Simeon, Levi i Juda;

³Isakar, Zabulon i Benjamin;

⁴Dan i Neftali, Gad i Aser.

⁵I e personanan ku a sali for di lomo di Jakob tabata setenta na tur, ma Jose tabata na Egipto kaba.

⁶I Jose a muri, i tur su ruman hombernan i henter e generashon ei.

⁷Awor e yunan di Israel tabata fruktifero i a oumenta masha i a multiplika bira masha poderoso mes, asina ku e tera a keda yen-yen di nan.

⁸I a lanta un rei nobo na Egipto ku no tabata konose Jose.

⁹I el a bisa su pueblo: "Mira, e pueblo di e yunan di Israel ta mas tantu i mas poderoso ku nos.

¹⁰Ban, laga nos trata nan ku sabiduria pa nan no multiplika, i den kaso di guera nan tambe uni nan mes ku esnan ku ta odia nos, i bringa kontra nos i bai for di e tera."

¹¹Pesei e egipsionan a pone kapatasnan riba nan pa afligi nan ku trabou pisa. I nan a traha pa Farao statnan di deposito, Piton i Rameses.

¹²Ma mas nan tabata afligi nan, mas nan tabata multiplika i mas nan tabata plama, asina ku e egipsionan tabata teme e yunan di Israel.

¹³I e egipsionan tabata obliga e yunan di Israel pa traha rigorosamente;

¹⁴i nan tabata amarga nan bida ku trabou pisa di trahamentu ku klei i klenku i ku tur sorto di trabou den kunuku, tur e trabou ku rigorosamente nan tabata impone riba nan.

¹⁵E ora ei rei di Egipto a papia ku e parteranan hebreo, di kualnan esun tabata yama Sifra i e otro Pua;

¹⁶i el a bisa: "Ora boso ta yuda e muhenan hebreo hana yu i boso ta mira nan riba banki di parto, e ora ei si ta yu homber, boso mester mat'e, ma si ta yu muhe, e mester keda na bida."

¹⁷Ma e parteranan tabata teme Dios i no tabata hasi manera rei di Egipto a ordena nan, ma a laga e mucha hombernan keda na bida.

¹⁸Pesei rei di Egipto a manda yama e parteranan i a bisa nan: "Pakiko boso a hasi e kos aki i a laga e mucha hombernan keda na bida?"

¹⁹I e parteranan a bisa Farao: "Pasobra e muhenan hebreo no ta manera e muhenan egipsio; nan ta balente, i nan ta duna lus prome ku partera yega serka nan."

²⁰Asina Dios a trata bon ku e parteranan, i e pueblo a multiplika bira masha poderoso.

²¹I a sosode ku pasobra e parteranan tabata teme Dios, El a duna nan un famia.

²²E ora ei Farao a ordena henter su pueblo, bisando: "Tur yu homber ku nase boso mester tira den Neil, i tur yu muhe boso mester laga keda na bida."