Read Papantla Totonac Eksodo 10 Bible Online

Eksodo 10 - Papantla Totonac bible

Eksodo 10

¹E ora ei SENOR a bisa Moises: "Bai serka Farao, pasobra Mi a hasi su kurason i kurason di su sirbidonan duru, pa Mi hasi e senalnan aki di Mi meimei di nan,

²i pa bo por konta, pa bo yu i pa bo nietu tende, kon Mi a hasi bofon di e egipsionan i kon Mi a hasi Mi senalnan meimei di nan, pa boso sa ku ta Ami ta SENOR."

³Anto Moises i Aaron a bai serka Farao i a bis'e: "Asina SENOR, e Dios di e hebreonan, ta bisa: 'Kuantu tempu mas lo bo nenga di umiya bo mes Mi dilanti? Laga Mi pueblo bai pa nan sirbiMi.

⁴Pasobra si bo nenga di laga Mi pueblo bai, mira, manan lo Mi trese tirakochi den bo teritorio.

⁵I nan lo tapa superfisio di e tera, asina ku ningun hende lo no por mira e tera. Tambe nan lo kome e sobra di loke a skapa--loke a sobra pa boso despues di e yobida di hagel--i nan lo kome tur palu ku ta spreit den boso kunuku.

⁶Anto nan lo yena bo kasnan, i e kasnan di tur bo sirbidonan i e kasnan di tur e egipsionan, algu ku ni bo tatanan ni bo welonan no a mira nunka, for di dia ku nan a bin riba tera te dia djawe.'" I el a bira bai laga Farao.

⁷I e sirbidonan di Farao a bis'e: "Kuantu tempu mas e homber aki lo ta un trampa pa nos? Laga e hombernan bai pa nan sirbi SENOR nan Dios. Bo no ta realisa ku Egipto a keda destrui?"

⁸Asina nan a hiba Moises i Aaron bek serka Farao, i el a bisa nan: "Bai, sirbi SENOR boso Dios! Ta ken ta esnan ku ta bai?"

⁹I Moises a bisa: "Nos ta bai ku nos muchanan i nos hende grandinan, ku nos yu hombernan i nos yu muhenan, ku nos tounan di bestia chikitu i nos krianan di baka nos lo bai, pasobra nos mester tene un fiesta na SENOR."

¹⁰E ora ei el a bisa nan: "Ku SENOR yuda boso, si algun dia mi laga boso i boso yu chikitunan bai! Tene kuidou, pasobra tin maldat den boso kabes.

¹¹Laga e hombernan so bai pa sirbi SENOR, pasobra ta esei ta loke boso ta desea." Asina nan a kore ku nan for di presensia di Farao.

¹²Anto SENOR a bisa Moises: "Ekstende bo man ofer di tera di Egipto pa e tirakochinan, pa nan bin riba tera di Egipto i kome tur yerba di e tera, tambe tur loke e hagel a laga."

¹³Asina Moises a ekstende su bara ofer di tera di Egipto, i SENOR a hiba un bientu di pariba riba e tera, henter e dia ei i henter e anochi ei; i ora ku a bira mainta, e bientu di pariba a hiba e tirakochinan.

¹⁴Anto e tirakochinan a bin riba henter e tera di Egipto i a keda den henter e teritorio di Egipto; nan tabata masha hopi mes. Nunka no tabatin tantu tirakochi asina, ni nunka mas lo no tin tantu asina.

¹⁵Pasobra nan tabata kubri superfisio di henter e tera, asina ku e tera a bira skur; i nan a kome tur yerba di e tera i tur fruta di e palunan ku e hagel a laga. Asina no a keda nada berde na palu ni na yerba di sabana den henter tera di Egipto.

¹⁶E ora ei pura Farao a manda yama Moises i Aaron, i el a bisa: "Mi a peka kontra SENOR boso Dios i kontra boso.

¹⁷Pesei anto, pa fabor, pordona mi pika esun biaha aki so, i hasi suplika na SENOR boso Dios, pa E kita a lo menos e morto aki for di mi."

¹⁸I Moises a sali bai laga F arao i a hasi suplika na SENOR.

¹⁹I SENOR a kambia e bientu pa un bientu di pabou masha duru mes ku a kohe e tirakochinan supla nan manda nan den Laman Kora. No a keda ni un tirakochi den henter e teritorio di Egipto.

²⁰Ma SENOR a hasi Farao su kurason duru, i e no a laga e yunan di Israel bai.

²¹E ora ei SENOR a bisa Moises: "Ekstende bo man na shelu, pa tin skuridat riba tera di Egipto, un skuridat ku bo por fula."

²²Asina Moises a ekstende su man na shelu, i tres dia largu tabatin un skuridat profundo na henter tera di Egipto.

²³Nan no tabata mira otro, ni ningun hende no a lanta for di su luga pa tres dia, ma tur yu di Israel si tabatin lus den nan luganan di biba.

²⁴E ora ei Farao a manda yama Moises i a bisa: "Bai sirbi SENOR; solamente, laga boso tounan di bestia chikitu i boso krianan di baka keda. Tambe boso yu chikitunan por bai ku boso."

²⁵Ma Moises a bisa: "Bo mester duna nos sakrifisionan i ofrendanan kima tambe, pa nos ofrese nan komo sakrifisio na SENOR nos Dios.

²⁶Pesei nos bestianan di kria tambe mester bai ku nos; ni un huf lo no ked'atras, pasobra nos lo kohe algun di nan pa sirbi SENOR nos Dios. I nos mes no sa ku kiko nos lo sirbi SENOR, te ora nos yega ayanan."

²⁷Ma SENOR a hasi Farao su kurason duru i e no tabata dispuesto pa laga nan bai.

²⁸E ora ei Farao a bisa Moises: "Bai for di mi! Perkura pa bo no mira mi kara mas, pasobra e dia ku bo mira mi kara, lo bo muri!"

²⁹I Moises a bisa: "Bo tin rason! Lo mi no mira bo kara nunka mas!"