Read Papantla Totonac Eksodo 11 Bible Online

Eksodo 11 - Papantla Totonac bible

Eksodo 11

¹Awor SENOR a bisa Moises: "Un plaga mas lo Mi trese riba Farao i riba Egipto; despues di esei e lo laga boso bai for di akinan. Ora ku e laga boso bai, e lo kore ku boso saka boso kompletamente for di akinan.

²Papia awor pa e pueblo tende, pa tur homber pidi su bisina i tur muhe pidi su bisina artikulonan di plata i artikulonan di oro."

³I SENOR a duna e pueblo grasia den bista di e egipsionan. Ademas, e homber Moises mes tabata masha respeta na tera di Egipto, tantu den bista di Farao su sirbidonan komo den bista di e pueblo.

⁴I Moises a bisa: "Asina SENOR ta bisa: 'Mei anochi Mi ta sali bai meimei di Egipto,

⁵i tur primogenito na tera di Egipto lo muri, for di e primogenito di Farao ku ta sinta riba su trono, te na e primogenito di e mucha muhe esklabu ku ta para tras di mulina, i tur primogenito di e bestianan di kria.

⁶Ademas, lo tin un gran klamor na henter tera di Egipto, manera no tabatin nunka antes i manera lo no tin nunka mas.

⁷Ma kontra ningun di e yunan di Israel kacho lo no blaf, ni kontra hende ni kontra bestia, pa boso komprende kon SENOR ta hasi distinshon entre Egipto i Israel.'

⁸I tur e sirbidonan aki di bo lo bin serka mi i buig te na suela mi dilanti, bisando: 'Bai, abo i henter e pueblo ku ta siguibo,' i despues di esei lo mi bai." I masha rabia mes Moises a sali bai laga Farao.

⁹E ora ei SENOR a bisa Moises: "Farao lo no skuchabo, asina ku Mi maraviyanan lo wordu multiplika na tera di Egipto."

¹⁰I Moises i Aaron a hasi tur e maraviyanan aki dilanti di Farao; sinembargo, SENOR a hasi Farao su kurason duru, i e no a laga e yunan di Israel bai for di su tera.