Read Papantla Totonac Eksodo 12 Bible Online

Eksodo 12 - Papantla Totonac bible

Eksodo 12

¹Awor SENOR a bisa Moises i Aaron na tera di Egipto:

²"E luna aki lo ta e kuminsamentu di lunanan pa boso; e mester ta e prome luna di ana pa boso.

³Papia ku henter kongregashon di Israel, bisando: 'Riba e di dies dia di e luna aki kada un di nan mester kohe un lamchi pa su mes, segun e hendenan di e kasnan di nan tatanan, un lamchi pa e hendenan di kada kas.

⁴Awor si e hendenan di kas ta muchu poko pa un lamchi, e ora ei e homber ku su bisina mas serka di su kas mester kohe un lamchi segun e kantidat di persona den kas; konforme loke kada hende por kome, boso mester parti e lamchi.

⁵Boso lamchi mester ta un bestia machu sin defekto, di un ana; boso por koh'e for di e karnenan of for di e kabritunan.

⁶I ward'e te na e di dieskuater dia di e mesun luna; e ora ei henter e asamblea di e kongregashon di Israel mester mat'e ora nochi ta sera.

⁷Ademas, nan mester kohe un poko di e sanger i pone esaki na e dos koseinnan na banda i na esun ariba di porta di e kasnan kaminda nan ta kome e lamchi.

⁸I nan mester kome e karni e mesun anochi ei, geroster riba kandela; i nan mester kom'e ku pan sin zurdeg i ku yerba marga.

⁹No kom'e kuru ni herebe den awa, sino mas bien geroster riba kandela, tantu su kabes komo su patanan, huntu ku su shirishiri.

¹⁰I no laga nada di dje te su manise, ma tur loke sobra di dje te su manise boso mester kima ku kandela.

¹¹Awor, asina boso mester kom'e: ku boso hep faha, boso sandalia na boso pia i ku boso baston den boso man; i kom'e pura-pura. Ta e Pasku di SENOR.

¹²'Pasobra lo Mi pasa dor di tera di Egipto riba e anochi ei, i lo Mi mata tur primogenito na tera di Egipto, tantu hende komo bestia; i kontra tur e diosnan di Egipto lo Mi ehekuta huisio--Ami ta SENOR.

¹³I e sanger lo ta un senal pa boso na e kasnan kaminda boso ta biba; i ora Mi mira e sanger, lo Mi pasa boso forbei, i ningun plaga lo no bin riba boso pa destrui boso dia ku Mi dal tera di Egipto.

¹⁴'Awor e dia aki mester ta un konmemorashon pa boso, i boso mester selebr'e komo un fiesta na SENOR; durante di tur boso generashonnan boso mester selebr'e komo un ordenansa pa semper.

¹⁵Shete dia boso mester kome pan sin zurdeg. Ma riba e prome dia kaba boso mester saka e zurdeg for di boso kasnan; pasobra ken ku kome un kos ku tin zurdeg aden, for di e prome dia te ku e di shete dia, e persona ei mester wordu korta kita for di Israel.

¹⁶I riba e prome dia boso mester tene un konvokashon santu, i un otro konvokashon santu riba e di shete dia; ningun trabou no mester wordu hasi riba e dianan aki, ku eksepshon di loke tur hende mester kome--esei so boso mag prepara.

¹⁷'I warda e Fiesta di Pan Sin Zurdeg, pasobra riba e mesun dia aki Mi a saka boso ehersitonan for di tera di Egipto; pesei boso mester warda e dia aki durante di tur boso generashonnan komo un ordenansa pa semper.

¹⁸Den e prome luna, riba e di dieskuater dia di e luna den ora di anochi, boso mester kome pan sin zurdeg, te na e di bint'i un dia di e luna den ora di anochi.

¹⁹Durante di shete dia zurdeg no mag wordu hana den boso kasnan; pasobra ken ku kome loke tin zurdeg aden, e persona ei mester wordu korta kita for di e kongregashon di Israel, sea ku e ta stranhero of yu di tera.

²⁰No kome nada ku tin zurdeg aden; den tur boso luganan di biba boso mester kome pan sin zurdeg.'"

²¹E ora ei Moises a manda yama tur e ansianonan di Israel i a bisa nan: "Bai i kohe pa boso mes lamchinan segun boso famianan i mata e lamchi di Pasku.

²²I kohe un boshi di hisop i dop esaki den e sanger ku tin den e punchero, i pone un poko di e sanger ku tin den e punchero na e kosein ariba i na e dos koseinnan na banda di e porta; i ningun di boso no mag sali for di porta di su kas te ora dia habri.

²³Pasobra SENOR lo pasa pa mata e egipsionan; i ora ku E mira e sanger na e kosein ariba i na e dos koseinnan na banda di e porta, SENOR lo pasa e porta forbei i lo no permit! e destruido drenta den boso kasnan pa mata boso.

²⁴"I boso mester selebra e evento aki komo un ordenansa pa boso i boso yunan pa semper.

²⁵I lo sosode ku ora boso bai den e tera ku SENOR lo duna boso, manera El a priminti, boso mester sigui selebra e sirbishi aki.

²⁶I lo sosode ku ora boso yunan bisa boso: 'Kiko e sirbishi aki ta nifika pa boso?'

²⁷ku boso mester bisa: 'Ta un sakrifisio di Pasku na SENOR, Kende a pasa e kasnan di e yunan di Israel na Egipto forbei ora ku El a mata e egipsionan, ma a libra nos kasnan.'" I e pueblo a buig te na suela i a adora.

²⁸E ora ei e yunan di Israel a bai i a hasi asina; meskos ku SENOR a ordena Moises i Aaron, asina nan a hasi.

²⁹Awor a sosode ku mei anochi SENOR a mata tur e primogenitonan na tera di Egipto, for di e primogenito di Farao ku tabata sinta riba su trono te na e primogenito di e katibu ku tabata den kashot, i tur primogenito di e bestianan di kria.

³⁰I Farao a lanta den anochi, e ku tur su sirbidonan i tur e egipsionan; i tabatin un gran klamor na Egipto, pasobra no tabatin ni un kas ku no tabatin un morto aden.

³¹E ora ei Farao a manda yama Moises i Aaron anochi i a bisa: "Lant'ariba, bai for di meimei di mi pueblo, tantu boso komo e yunan di Israel; i bai, sirbi SENOR, manera boso a bisa.

³²Tuma tantu boso tounan di bestia chikitu komo boso krianan di baka, manera boso a bisa, i bai, i bendishona ami tambe."

³³I e egipsionan tabata pura e pueblo pa nan hasi lihe bai for di e tera, pasobra nan tabata bisa: "Nos tur ta bai muri."

³⁴Asina e pueblo a kohe nan mansa prome ku a pone zurdeg aden, i a hiba esaki den nan komchinan-pa-traha-mansa mara den nan pananan riba nan skouder.

³⁵Awor e yunan di Israel a hasi konforme e palabra di Moises, pasobra nan a pidi e egipsionan artikulonan di plata, artikulonan di oro, i pana;

³⁶i SENOR a duna e pueblo grasia den bista di e egipsionan, asina ku nan a duna nan nan petishon. Asina nan a plunder e egipsionan.

³⁷Awor e yunan di Israel a biaha for di Rameses bai Sukot, mas o menos seis shen mil homber na pia, sin konta mucha aden.

³⁸I tambe un multitut di tur klase di hende a bai ku nan, i nan tounan di bestia chikitu i krianan di baka, un kantidat masha grandi di bestia di kria.

³⁹I nan a traha pan buskuchi sin zurdeg ku e mansa ku nan a bin kune for di Egipto. Pasobra no tabatin zurdeg den dje, komo ku e egipsionan a kore ku nan for di Egipto i nan no por a tarda mas, ni nan no a prepara kuminda pa nan mes.

⁴⁰Awor e tempu ku e yunan di Israel a biba na Egipto tabata kuater shent'i trinta ana.

⁴¹I a sosode ku na fin di kuater shent'i trinta ana, eksaktamente riba e dia ei, tur e ehersitonan di SENOR a sali for di tera di Egipto.

⁴²Esaki ta un anochi di warda pa SENOR, pasobra El a saka nan for di tera di Egipto; e anochi aki ta pa SENOR, pa tur e yunan di Israel warda durante di tur nan generashonnan.

⁴³I SENOR a bisa Moises i Aaron: "Esaki ta e ordenansa di Pasku: "Ningun stranhero no mag kome di dje;

⁴⁴ma tur esklabu ku un hende a kumpra pa plaka mag kome di dje, despues ku bo a sirkumsid'e.

⁴⁵Un stranhero of un sirbido kontrata no mag kome di dje.

⁴⁶"Mester kom'e den un kas so; bo no mag hiba nada di e karni pafo di e kas, ni bo no mag kibra ni un wesu di dje.

⁴⁷Henter e kongregashon di Israel mester selebra esaki.

⁴⁸"Ma si un stranhero keda biba pa un tempu serka bo i ta selebra e Pasku di SENOR, laga tur su hende hombernan wordu sirkumsida, i e ora ei lagu'e yega serka pa selebra Pasku; i e lo ta komo un yu di tera. Ma ningun persona insirkumsida no mag kome di dje.

⁴⁹E mesun lei ta konta pa tantu e yu di tera komo pa e stranhero ku ta keda biba pa un tempu meimei di boso."

⁵⁰Anto tur e yunan di Israel a hasi asina; nan a hasi meskos ku SENOR a ordena Moises i Aaron.

⁵¹I a sosode ku riba e mesun dia ei SENOR a saka e yunan di Israel for di tera di Egipto segun nan ehersitonan.