Read Papantla Totonac Eksodo 13 Bible Online

Eksodo 13 - Papantla Totonac bible

Eksodo 13

¹E ora ei SENOR a papia ku Moises, bisando:

²"Santifika pa Mi tur primogenito, e prome yu ku nase di tur matris entre e yunan di Israel, tantu di hende komo di bestia; esaki ta pertenese na Mi."

³I Moises a bisa e pueblo: "Korda e dia aki riba kual boso a sali for di Egipto, for di e kas di sklabitut; pasobra ku un man poderoso SENOR a saka boso for di e luga aki. I boso no mester kome nada ku tin zurdeg aden.

⁴Riba e dia aki, den luna di Abib, boso ta bai sali.

⁵I lo sosode ku ora SENOR hibabo na tera di e kananeo, e heteo, e amoreo, e heveo i e jebuseo, kual El a hura na bo tatanan di dunabo, un tera ku tin lechi i miel na abundansia, bo mester warda e sirbishi aki den e luna aki.

⁶Shete dia bo mester kome pan sin zurdeg, i riba e di shete dia lo tin un fiesta na SENOR.

⁷Mester kome pan sin zurdeg durante di e shete dianan; i nada ku tin zurdeg aden no mag wordu mira serka bo; tampoko zurdeg no mag wordu mira serka bo den henter bo teritorio.

⁸I e dia ei bo mester konta bo yu homber, bisando: 'Ta pa motibu di loke SENOR a hasi pa mi dia ku mi a sali for di Egipto.'

⁹I esaki lo sirbi komo un senal pa bo riba bo man, i komo un rekordatorio riba bo frenta, pa e lei di SENOR ta den bo boka; pasobra ku un man poderoso SENOR a sakabo for di Egipto.

¹⁰Pesei di ana pa ana, na su tempu stipula, bo mester warda e ordenansa aki.

¹¹"Awor dia ku SENOR hibabo na tera di e kananeo, manera El a hura na bo i na bo tatanan, i E dunabo e tera ei,

¹²bo mester dedika na SENOR e prome yu ku nase di tur matris, i e prome yu ku nase di tur bestia ku bo tin; e bestianan machu ta pertenese na SENOR.

¹³Ma tur prome yu ku nase di un buriku bo mester redimi ku un lamchi, ma si bo no redimi esaki, e ora ei bo mester kibra su nek; i tur primogenito di hende entre bo yu hombernan bo mester redimi.

¹⁴"I lo sosode ku manan ora bo yu homber puntrabo, bisando: 'Kiko esaki ta?' e ora ei bo mester bis'e: 'Ku un man poderoso SENOR a saka nos for di Egipto, for di e kas di sklabitut.

¹⁵I a sosode ku ora Farao tabata hasi kos di kabesura i no kier a laga nos bai, SENOR a mata tur primogenito na tera di Egipto, tantu e primogenito di hende komo e primogenito di bestia. Pesei mi ta ofrese e bestianan machu na SENOR komo sakrifisio, e prome yu ku nase di tur matris, ma tur primogenito di mi yu hombernan mi ta redimi.'

¹⁶Asina esaki lo sirbi komo un senal na bo man i un filakteria na bo frenta, pasobra ku un man poderoso SENOR a saka nos for di Egipto."

¹⁷Awor a sosode ku ora F arao a laga e pueblo bai, Dios no a hiba nan pa e kaminda di e tera di e filisteonan, ounke ku esei tabata keda serka; pasobra Dios a bisa: "Pa e pueblo no kambia di idea ora nan mira guera i nan bai Egipto bek."

¹⁸Pa e motibu ei Dios a pasa e pueblo tur ront pa e kaminda di desierto den direkshon di Laman Kora; i e yunan di Israel a sali den ordu militar bai for di tera di Egipto.

¹⁹I Moises a kohe e wesunan di Jose bai ku nan, pasobra Jose a hasi e yunan di Israel hura solemnemente, bisando: "Dios lo bishita boso sigur, i boso mester bai ku mi wesunan for di akinan."

²⁰E ora ei nan a sali bai for di Sukot i a kampa na Etam, na rant di e desierto.

²¹I di dia SENOR tabata bai nan dilanti den un pilar di nubia pa guia nan riba kaminda, i anochi den un pilar di kandela pa duna nan lus, pa nan por a biaha di dia i anochi.

²²Di dia E no tabata kita e pilar di nubia, ni anochi e pilar di kandela, for di dilanti di e pueblo.