Read Papantla Totonac Eksodo 14 Bible Online

Eksodo 14 - Papantla Totonac bible

Eksodo 14

¹Awor SENOR a papia ku Moises, bisando:

²"Bisa e yunan di Israel pa bai bek i kampa dilanti di Pi-hahirot, entre Migdol i laman; boso mester kampa dilanti di Baal-zefon, enfrente di dje, pega ku laman.

³Pasobra Farao lo bisa di e yunan di Israel: 'Nan ta kana dwal sin destino den e tera; desierto a sera nan aden.'

⁴Asina lo Mi hasi Farao su kurason duru, i e lo persigui nan; i Ami lo wordu onra atraves di Farao i henter su ehersito, i e egipsionan lo sa ku ta Ami ta SENOR." I asina nan a hasi.

⁵Ora nan a bisa rei di Egipto ku e pueblo a hui, kurason di Farao i di su sirbidonan a kambia pa ku e pueblo, i nan a bisa: "Ta kiko e kos ku nos a hasi aki, ku nos a laga Israel bai, asina ku nan no ta sirbi nos mas?"

⁶Anto el a prepara su garoshi i a hiba su pueblo huntu kune;

⁷i el a hiba seis shen di e garoshinan di mas miho, i tur e otro garoshinan di Egipto, ku ofisialnan pa manda riba nan tur.

⁸I SENOR a hasi Farao, rei di Egipto, su kurason duru, i el a persigui e yunan di Israel, kendenan tabata sali bai ku tur konfiansa.

⁹E ora ei e egipsionan a persigui nan ku tur e kabainan i garoshinan di Farao, ku su koredonan di kabai i su ehersito, i nan a alkansa nan kaminda nan tabata kampa, pega ku laman, banda di Pi-hahirot, dilanti di Baal-zefon.

¹⁰I ora Farao a yega serka, e yunan di Israel a hisa kara wak, i mira, e egipsionan tabata marcha bin nan tras, i nan a spanta masha, i e yunan di Israel a sklama na SENOR.

¹¹Anto nan a bisa Moises: "Ta graf no tabatin na Egipto ku bo a saka nos pa bin muri den desierto? Pakiko bo a trata asin'aki ku nos i a saka nos for di Egipto?

¹²No ta esaki ta e palabra ku nos a papia ku boso na Egipto, bisando: 'Laga nos na pas i laga nos sirbi e egipsionan'? Pasobra miho nos sirbi e egipsionan ku muri den desierto."

¹³Ma Moises a bisa e pueblo: "No tene miedu! Para firme i mira e salbashon di SENOR ku E lo prepara pa boso awe; pasobra e egipsionan ku boso a mira awe, hamas i nunka boso lo bolbe mira nan.

¹⁴SENOR lo bringa pa boso i boso lo keda ketu."

¹⁵E ora ei SENOR a bisa Moises: "Pakiko bo ta sklama na Mi? Bisa e yunan di Israel pa sigui dilanti.

¹⁶I pa loke t'abo, lanta bo bara i ekstende bo man ofer di e laman i dividie, i e yunan di Israel lo pasa meimei di e laman riba tera seku.

¹⁷I Ami, mira, lo Mi hasi e egipsionan su kurason duru, asina ku nan lo drenta nan tras; i lo Mi wordu onra atraves di Farao i henter su ehersito, atraves di su garoshinan i su koredonan di kabai.

¹⁸E ora ei e egipsionan lo sa ku ta Ami ta SENOR, ora Mi wordu onra atraves di F arao, atraves di su garoshinan i su koredonan di kabai."

¹⁹I e Angel di Dios, Kende tabata bai dilanti di e kampamentu di Israel, a kita bai nan tras; i e pilar di nubia a kita for di nan dilanti i a bai para nan tras.

²⁰Asina e pilar di nubia a keda entre e kampamentu di Egipto i e kampamentu di Israel; i tabatin un nubia huntu ku e skuridat, tog el a duna klaridat anochi. Asina ku esun no a yega serka e otro henter anochi.

²¹E ora ei Moises a ekstende su man ofer di e laman; i henter anochi SENOR a hasi e laman retira pa medio di un bientu fuerte di pariba, i a hasi e laman bira tera seku. Asina e awanan a keda dividi.

²²I e yunan di Israel a pasa meimei di e laman riba tera seku, i e awanan tabata pa nan manera un muraya na nan man drechi i na nan man robes.

²³Anto e egipsionan a persigui nan, i tur Farao su kabainan, su garoshinan i su koredonan di kabai a drenta nan tras te meimei di laman.

²⁴I a sosode ku, na ora di vigilia di mainta, SENOR a wak e ehersito di e egipsionan for di e pilar di kandela i nubia, i El a trese konfushon den e ehersito di e egipsionan.

²⁵I El a hasi nan wil di garoshi slep, i El a hasi ku nan tabata kore ku difikultat; pesei e egipsionan a bisa: "Laga nos hui pa Israel, pasobra SENOR ta bringa pa nan kontra e egipsionan."

²⁶E ora ei SENOR a bisa Moises: "Ekstende bo man ofer di e laman, pa e awanan bin bek riba e egipsionan, riba nan garoshinan i riba nan koredonan di kabai."

²⁷Asina Moises a ekstende su man ofer di e laman i ora dia tabata habri e laman a bolbe na su estado normal, mientras ku e egipsionan tabata hui bai stret den dje; e ora ei SENOR a derota e egipsionan meimei di laman.

²⁸I e awanan a bolbe i a tapa e garoshinan i e koredonan di kabai, i tambe henter Farao su ehersito ku a bai den laman nan tras; ni un di nan no a skapa.

²⁹Ma e yunan di Israel a kana riba tera seku meimei di laman, i e awanan tabata pa nan manera un muraya na nan man drechi i na nan man robes.

³⁰Asina SENOR a salba Israel e dia ei for di man di e egipsionan, i Israel a mira e egipsionan morto kantu di laman.

³¹I ora ku Israel a mira e poder grandi ku Dios a uza kontra e egipsionan, e pueblo a teme SENOR, i nan a kere den SENOR i den Su sirbido Moises.