Read Papantla Totonac Eksodo 15 Bible Online

Eksodo 15 - Papantla Totonac bible

Eksodo 15

¹E ora ei Moises i e yunan di Israel a kanta e kantika aki na SENOR i a bisa: "Lo mi kanta na SENOR, pasobra E ta grandemente halsa. E kabai i su koredo El a tira den laman.

²SENOR ta mi fortalesa i mi kantika, i El a bira mi salbashon; E ta mi Dios, i lo mi alab'E, e Dios di mi tata, i lo mi glorifik'E.

³SENOR ta un guerero; SENOR ta Su nomber.

⁴Farao su garoshinan i su ehersito El a benta den laman; i su miho kapitannan a wordu hoga den Laman Kora.

⁵E abismonan ta tapa nan; nan a senk bai den e profundidatnan manera piedra.

⁶"Bo man drechi, O SENOR, ta mahestuoso den poder. Bo man drechi, O SENOR, ta kibra e enemigu na pida-pida.

⁷I den e grandesa di Bo ekselensia Bo ta derota esnan ku lanta kontra Bo; Bo ta manda Bo rabia ardiente, i esei ta kaba ku nan manera bagas.

⁸I dor di e rosea di Bo nanishi e awanan a wordu montona, e koridanan di awa a lanta para manera un monton; e abismonan a kuaha den kurason di laman.

⁹"E enemigu a bisa: 'Lo mi persigui, lo mi alkansa, lo mi parti e botin; mi deseo lo ta kumpli kontra nan. Lo mi saka mi spada, mi man lo destrui nan.'

¹⁰Bo a supla ku Bo bientu, laman a tapa nan; nan a senk manera chumbu den e awanan poderoso.

¹¹"Ken ta manera Bo entre e diosnan, O SENOR? Ken ta manera Bo, mahestuoso den santidat, temibel den gloria, obrando maraviyanan?

¹²Bo a saka Bo man drechi, tera a traga nan.

¹³"Den Bo miserikordia Bo a guia e pueblo ku Bo a redimi; den Bo fortalesa Bo a guia nan na Bo habitashon santu.

¹⁴E pueblonan a tende, nan ta tembla; ansha a gara e habitantenan di Filistea.

¹⁵E ora ei e hefenan di Edom a desmaya; e lidernan di Moab, temblamentu ta gara nan; tur e habitantenan di Kanaan a dirti bai.

¹⁶Teror i spantu ta kai riba nan; dor di e grandesa di Bo brasa nan ta ketu manera piedra, te ora Bo pueblo a pasa, O SENOR, te ora ku e pueblo ku Bo a kumpra a pasa.

¹⁷Abo lo hiba nan i planta nan den e seru di Bo erensia, e luga, O SENOR, ku Abo a traha komo Bo luga di biba, e santuario, O SENOR, ku Bo mannan a stablese.

¹⁸SENOR lo reina pa semper i semper."

¹⁹Ora ku e kabainan di F arao ku su garoshinan i su koredonan di kabai a bai den laman, SENOR a hasi e awanan di laman bin bek riba nan; ma e yunan di Israel a kana riba tera seku pasa meimei di laman.

²⁰E ora ei Miriam e profeta, Aaron su ruman muhe, a kohe un tamburein den su man, i tur e muhenan a sali su tras ku tamburein i ku baliamentu.

²¹I Miriam a kontesta nan: "Kanta na SENOR, pasobra E ta grandemente halsa; e kabai ku su koredo El a tira den laman."

²²E ora ei Moises a hiba Israel for di Laman Kora i nan a sali bai den e desierto di Shur; i nan a kana tres dia den desierto sin hana awa.

²³I ora nan a yega Mara, nan no por a bebe e awanan di Mara, pasobra nan tabata marga; pesei nan a yama e luga ei Mara.

²⁴I e pueblo tabata murmura kontra Moises, bisando: "Kiko nos mester bebe?"

²⁵E ora ei Moises a sklama na SENOR, i SENOR a mustr'e un palu; i Moises a tira esaki den e awanan, i e awanan a bira dushi. Ayanan SENOR a duna nan un statuto i un ordenansa, i ayanan SENOR a pone nan na prueba.

²⁶I El a bisa: "Si bo skucha atentamente na e bos di SENOR bo Dios, i hasi loke ta korekto den Su bista, i duna oido na Su mandamentunan, i warda tur Su statutonan, ningun di e malesanan ku Mi a pone riba e egipsionan lo Mi no pone riba bo; pasobra Ami, SENOR, ta bo Sanador."

²⁷Despues nan a yega Elim kaminda tabatin diesdos fuente di awa i setenta palu di dadel, i nan a kampa ayanan kantu di awa.