Read Papantla Totonac Eksodo 16 Bible Online

Eksodo 16 - Papantla Totonac bible

Eksodo 16

¹Despues nan a sali for di Elim, i henter e kongregashon di e yunan di Israel a yega na e desierto di Sin, ku ta keda meimei di Elim i Sinai, riba e di diesinku dia di e di dos luna despues ku nan a sali for di tera di Egipto.

²I henter e kongregashon di e yunan di Israel tabata murmura den desierto kontra Moises i Aaron.

³I e yunan di Israel a bisa nan: "Miho nos a muri na man di SENOR na tera di Egipto, tempu ku nos tabata sinta banda di e weanan di karni, tempu ku nos tabata kome pan yena nos barika; pasobra boso a saka nos trese nos den e desierto aki pa laga henter e asamblea muri di hamber."

⁴E ora ei SENOR a bisa Moises; "Mira, lo Mi laga pan yobe for di shelu pa boso; i tur dia e pueblo mester sali rekohe e porshon pa un dia, pa Mi pone nan na prueba, si nan ta kana den Mi lei, si of no.

⁵I lo sosode ku riba e di seis dia, ora nan ta prepara loke nan ta hiba paden, esaki lo ta dos biaha mas tantu ku loke nan ta rekohe tur otro dia."

⁶Asina Moises i Aaron a bisa tur e yunan di Israel: "Atardi boso lo sa ku ta SENOR a saka boso for di tera di Egipto;

⁷i mainta boso lo mira e gloria di SENOR, pasobra E ta tende boso murmurashon kontra SENOR; i ta kiko nos ta, ku boso ta murmura kontra nos?"

⁸I Moises a bisa: "Esaki lo sosode ora SENOR duna boso karni pa kome na ora di atardi i pan pa yena boso barika mainta; pasobra SENOR ta tende boso murmurashon ku kual boso ta murmura kontra djé. I ta kiko nos ta? Boso murmurashon no ta kontra nos, sino kontra SENOR."

⁹E ora ei Moises a bisa Aaron: "Bisa henter e kongregashon di e yunan di Israel: 'Hala serka bin dilanti di SENOR, pasobra El a tende boso murmurashon.'"

¹⁰I a sosode ku ora Aaron tabata papia ku henter e kongregashon di e yunan di Israel, nan a wak den direkshon di e desierto, i mira, e gloria di SENOR a parese den e nubia.

¹¹I SENOR a papia ku Moises, bisando:

¹²"Mi a tende e murmurashon di e yunan di Israel. Papia ku nan i bisa: 'Ora nochi ta sera boso lo kome karni i mainta boso lo yena boso barika ku pan; i boso lo sa ku ta Ami ta SENOR boso Dios.'"

¹³Asina a sosode ku atardi a bin patrishi, i nan a tapa e kampamentu, i mainta tabatin un lag di serena tur ront di e kampamentu.

¹⁴Ora ku e lag di serena a verdamp, mira, riba superfisio di e desierto tabatin un kos fini manera skama, fini manera frost riba suela.

¹⁵Ora ku e yunan di Israel a mira esaki, nan a bisa otro: "Kiko esaki ta?" Pasobra nan no tabata sa kiko e tabata. I Moises a bisa nan: "Ta e pan ku SENOR a duna boso pa kome.

¹⁶Esaki ta loke SENOR a ordena: 'Rekohe di dje, tur hende segun su nesesidat; boso mester kohe un omer pa kada persona, segun e kantidat di persona ku kada un di boso tin den su tent.'"

¹⁷I e yunan di Israel a hasi asina, i algun a rekohe hopi i algun poko.

¹⁸Ora nan a midie ku un omer, esun ku a rekohe hopi no tabatin di mas, i esun ku a rekohe poko no tabata falta nada; tur hende a rekohe segun nesesidat di kada un.

¹⁹Anto Moises a bisa nan: "Ningun hende no laga nada di dje te su manise."

²⁰Ma nan no a skucha Moises i algun a laga parti di dje te su manise, i esei a kria bichi i a bomba; i Moises a rabia ku nan.

²¹I tur mainta nan tabata rekohe esaki, tur hende segun su nesesidat; ma ora solo tabata kuminsa bira kayente, e tabata dirti.

²²Awor a sosode ku riba e di seis dia nan a rekohe dos bes mas tantu pan, dos omer pa kada un. Ora tur e lidernan di e kongregashon a bin konta Moises esaki,

²³el a bisa nan: "Esaki ta loke SENOR tabata kier men: Manan ta dia di warda sabat, un sabat santu na SENOR. Horna loke boso kier horna i herebe loke boso kier herebe, i tur loke sobra, pone esei un banda pa ward'e te su manise."

²⁴Asina nan a pon'e un banda te su manise, manera Moises a ordena, i e no a bomba, ni e no a kria bichi tampoko.

²⁵I Moises a bisa: "Kom'e awe, pasobra awe ta un sabat pa SENOR; awe boso lo no han'e pafo den sabana.

²⁶Seis dia boso mester rekoh'e, ma e di shete dia, ku ta dia di sabat, lo no tin nada."

²⁷I a sosode ku riba e di shete dia algun hende di e pueblo a sali pa rekohe, ma nan no a hana nada.

²⁸E ora ei SENOR a bisa Moises: "Kuantu tempu mas boso ta nenga di warda Mi mandamentunan i Mi leinan?

²⁹Mira, SENOR a duna boso sabat; pesei riba e di seis dia E ta duna boso pan pa dos dia. Tur hende keda na su luga; no laga ningun hende sali bai for di su luga riba e di shete dia."

³⁰Asina e pueblo a sosega riba e di shete dia.

³¹I kas di Israel a yam'e mana. E tabata blanku manera simia di koriander, i e tabata smak manera oblea ku miel.

³²E ora ei Moises a bisa: "Esaki ta loke SENOR a ordena: 'Yena un omer ku e mana pa e keda warda durante di tur boso generashonnan, pa nan mira e pan ku Mi a duna boso di kome den desierto, tempu ku Mi a saka boso for di tera di Egipto.'"

³³I Moises a bisa Aaron: "Kohe un butishi i pone un omer di mana aden, i pone esaki dilanti di SENOR, pa e keda warda durante di tur boso generashonnan."

³⁴Manera SENOR a ordena Moises, asina Aaron a pon'e dilanti di e Testimonio, pa e keda warda.

³⁵I kuarenta ana e yunan di Israel a kome mana, te ora nan a yega na un tera habita; nan a kome mana te ora nan a yega na e frontera di tera di Kanaan.

³⁶Awor un omer ta un desimo parti di un efa.