Read Papantla Totonac Eksodo 17 Bible Online

Eksodo 17 - Papantla Totonac bible

Eksodo 17

¹E ora ei henter e kongregashon di e yunan di Israel a sigui biaha di un luga pa otro bai for di e desierto di Sin, segun e ordu di SENOR, i nan a kampa na Refidim; ma no tabatin awa pa e pueblo bebe.

²Pesei e pueblo a pleita ku Moises i a bisa: "Duna nos awa pa nos bebe." I Moises a bisa nan: "Pakiko boso ta pleita ku mi? Pakiko boso ta pone SENOR na prueba?"

³Ma ayanan e pueblo tabatin set di awa; i nan a murmura kontra Moises i a bisa: "Awor, pakiko bo a saka nos for di Egipto pa mata nos, nos yunan i nos bestianan ku set?"

⁴Pesei Moises a sklama na SENOR, bisando: "Kiko lo mi hasi ku e pueblo aki? Djis aki nan ta piedrami."

⁵E ora ei SENOR a bisa Moises: "Pasa bai dilanti di e pueblo i hiba algun di e ansianonan di Israel huntu ku bo; i kohe den bo man e bara ku bo a dal riba Neil kune, i bai.

⁶Mira, lo Mi para bo dilanti aya riba e baranka na Horeb; i lo bo dal riba e baranka, i awa lo sali for di dje pa e pueblo bebe." I asina Moises a hasi den bista di e ansianonan di Israel.

⁷I el a yama e luga Masa i Meriba pa motibu di e pleitu di e yunan di Israel, i pasobra nan a pone SENOR na prueba, bisando: "SENOR ta meimei di nos, si of no?"

⁸E ora ei Amalek a bin bringa kontra Israel na Refidim.

⁹I Moises a bisa Josue: "Skohe hombernan pa nos i sali bai bringa kontra Amalek. Manan lo mi bai para riba kabes di e seru ku e bara di Dios den mi man."

¹⁰Asina Josue a hasi manera Moises a bis'e, i a bringa kontra Amalek; i Moises, Aaron i Hur a subi bai na kabes di e seru.

¹¹Asina a sosode ku ora Moises tabata tene su man na laira, Israel tabata prevalese, ma ora ku e tabata laga su man baha, Amalek tabata prevalese.

¹²Ma Moises su mannan tabata bira pisa. E ora ei nan a kohe un piedra pon'e bou di dje, i el a kai sinta riba esei; i Aaron ku Hur tabata sostene su mannan, esun na un banda i e otro na e otro banda. Asina su mannan a keda firme te ora solo a baha.

¹³Asina Josue a derota Amalek i su pueblo ku filo di spada.

¹⁴E ora ei SENOR a bisa Moises: "Skirbi esaki den un buki komo un konmemorashon, i perkura pa Josue tend'e, ku Ami lo kita e rekuerdo di Amalek kompletamente for di bou di shelu."

¹⁵I Moises a traha un altar i a yam'e: SENOR ta Mi Bandera;

¹⁶i el a bisa: "SENOR a hura; SENOR lo tin guera kontra Amalek di generashon pa generashon."