Read Papantla Totonac Eksodo 18 Bible Online

Eksodo 18 - Papantla Totonac bible

Eksodo 18

¹Awor Jetro, saserdote di Madian, Moises su suegro, a tende di tur loke Dios a hasi pa Moises i pa Su pueblo Israel, kon SENOR a saka Israel for di Egipto.

²I despues ku Moises a manda Sefora bai, Jetro, Moises su suegro, a tuma Sefora, esposa di Moises,

³i Sefora su dos yu hombernan. Un di e yu hombernan tabata yama Gerson, pasobra Moises a bisa: "Mi tabata un stranhero na un tera strano."

⁴I e otro tabata yama Eliezer, pasobra el a bisa: "E Dios di mi tata tabata mi yudansa i a librami di spada di Farao."

⁵Anto Jetro, Moises su suegro, a bin ku e yu hombernan i ku e esposa di Moises serka dje den desierto, kaminda e tabata kampa, na e seru di Dios.

⁶I el a manda bisa Moises: "Ami, bo suegro Jetro, ta bin serka bo ku bo esposa i su dos yu hombernan."

⁷E ora ei Moises a sali pa kontra ku su suegro, i Moises a buig te na suela i a sunch'e; i nan a puntra otro kon ta bai i a bai den tent.

⁸I Moises a konta su suegro tur loke SENOR a hasi ku Farao i ku e egipsionan pa kousa di Israel, tur e kontratiempo ku nan a pasa durante di e biahe, i kon SENOR a libra nan.

⁹I Jetro a gosa di tende di tur e bondat ku SENOR a hasi pa Israel dor di libra nan for di man di e egipsionan.

¹⁰I Jetro a bisa: "Bendishona sea SENOR, Kende a libra boso for di man di e egipsionan i for di man di F arao, i Kende a libra e pueblo for di man di e egipsionan.

¹¹Awor mi sa ku SENOR ta mas grandi ku tur e diosnan; esaki a keda proba dia nan a trata orguyosamente kontra e pueblo."

¹²E ora ei Jetro, Moises su suegro, a kohe un ofrenda kima i sakrifisionan pa Dios, i Aaron a bin ku tur e ansianonan di Israel pa kome un kuminda huntu ku Moises su suegro dilanti di Dios.

¹³I a sosode ku su manise Moises a sinta pa huzga e pueblo, i e pueblo tabata para ront di Moises for di mainta te atardi.

¹⁴Awor ora Moises su suegro a mira tur loke Moises tabata hasi ku e pueblo, el a bisa: "Ta kiko e kos aki ku bo ta hasi ku e pueblo? Pakiko ta abo so ta sinta komo hues i henter e pueblo ta para ront di bo for di mainta te atardi?"

¹⁵I Moises a bisa su suegro: "Pasobra e pueblo ta bin serka mi pa konsulta ku Dios.

¹⁶Ora nan tin un asunto, nan ta bin serka mi, i ami ta huzga entre esun i e otro, i ta hasi nan konose e statutonan di Dios i Su leinan."

¹⁷Ma Moises su suegro a bis'e: "E kos ei ku bo ta hasi no ta bon.

¹⁸Sigur-sigur bo ta bai keda morto kansa, tantu abo komo e pueblo aki ku ta huntu ku bo, pasobra e tarea ta muchu pisa pa bo; abo so no por hasie.

¹⁹Awor skuchami: lo mi dunabo konseho, i Dios sea ku bo. Abo sea e pueblo su representante dilanti di Dios i hiba e asuntonan serka Dios.

²⁰Anto sina nan e statutonan i leinan, i mustra nan e kaminda ku nan mester kana i e trabou ku nan mester hasi.

²¹Ademas, skohe for di den henter e pueblo hombernan kapas ku ta teme Dios, hombernan konfiabel, esnan ku ta odia ganashi desonesto; i pone esakinan riba nan komo lidernan di milnan, di shennan, di sinkuentanan i di diesnan.

²²I laga nan huzga e pueblo tur ora; i laga nan hiba tur asunto difisil serka bo, ma tur asunto simpel nan mes mester huzga. Asina lo ta mas fasil pa bo, i nan mester karga e peso huntu ku bo.

²³Si bo hasi e kos aki i Dios ordenabo asina, e ora ei lo bo por keda para, i henter e pueblo aki tambe lo bai nan luga na pas."

²⁴Asina Moises a skucha na su suegro i a hasi tur loke ku el a bisa.

²⁵Anto Moises a skohe hombernan kapas for di den henter Israel i a hasi nan kabesantenan di e pueblo, lidernan di milnan, di shennan, di sinkuentanan i di diesnan.

²⁶I nan tabata huzga e pueblo tur ora; e asuntonan difisil nan tabata hiba pa Moises, ma tur asunto simpel nan mes tabata huzga.

²⁷E ora ei Moises a tuma despedida di su suegro, i esaki a bai su mes tera.