Read Papantla Totonac Eksodo 19 Bible Online

Eksodo 19 - Papantla Totonac bible

Eksodo 19

¹Den e di tres luna despues ku e yunan di Israel a sali for di tera di Egipto, riba e mesun dia ei, nan a yega na e desierto di Sinai.

²Despues ku nan a sali for di Refidim, nan a yega na e desierto di Sinai i a kampa den e desierto; i ayanan Israel a kampa dilanti di e seru.

³Anto Moises a subi bai serka Dios, i for di e seru SENOR a yam'e, bisando: "Asina bo mester bisa kas di Jakob i konta e yunan di Israel:

⁴'Boso mes a mira kiko Mi a hasi ku e egipsionan, i kon Mi a karga boso riba hala di aguila hiba boso serka Mi.

⁵Awor anto, si di berdat boso kier obedese Mi bos i warda Mi aliansa, e ora ei boso lo ta un tesoro pekuliar riba tur pueblo, pasobra henter tera ta di Mi;

⁶i boso lo ta pa Mi un reino di saserdotenan i un nashon santu.' Esakinan ta e palabranan ku bo mester papia ku e yunan di Israel."

⁷Asina Moises a bin i a yama e ansianonan di e pueblo i a pone nan dilanti tur e palabranan aki ku SENOR a orden'e.

⁸E ora ei henter e pueblo a kontesta pareu i a bisa: "Tur loke SENOR a bisa, nos lo hasi!" I Moises a hiba kontesta di e pueblo bek pa SENOR.

⁹Anto SENOR a bisa Moises: "Mira, lo Mi bin serka bo den un nubia diki, pa e pueblo tende ora Mi ta papia ku bo, i tambe kere den bo pa semper." E ora ei Moises a konta SENOR loke e pueblo a bisa.

¹⁰Tambe SENOR a bisa Moises: "Bai serka e pueblo i konsagra nan awe i manan, i laga nan laba nan pananan;

¹¹i laga nan ta kla pa e di tres dia, pasobra riba e di tres dia SENOR lo baha riba Seru Sinai den bista di henter e pueblo.

¹²I pone limitenan tur ront pa e pueblo, bisando: 'Perkura pa boso no subi e seru ni yega na su pia; ken ku yega na e seru mester wordu mata sigur.

¹³Ningun man no mag mishi ku e persona ei, ma sigur-sigur e mester wordu piedra of traspasa ku flecha; sea bestia of hende, e no mester keda na bida.' Te ora nan supla kachu di karne chubatu ku un zonidu largu e pueblo mag subi e seru."

¹⁴Asina Moises a baha for di e seru bai serka e pueblo i a konsagra e pueblo, i nan a laba nan pananan.

¹⁵I el a bisa e pueblo: "Perkura pa boso ta kla pa e di tres dia; no aserka boso esposanan."

¹⁶Asina a sosode ku riba e di tres dia, ora ku a bira mainta, tabatin strena i lamper i un nubia diki riba e seru i un zonidu masha duru mes di trompet, asina ku henter e pueblo ku tabata den e kampamentu tabata tembla.

¹⁷I Moises a saka e pueblo for di e kampamentu pa kontra ku Dios, i nan tabata para na pia di e seru.

¹⁸Awor Seru Sinai tabata tur na huma, pasobra SENOR a baha riba dje den kandela; i su huma tabata subi manera huma di fornu, i henter e seru tabata sakudi masha duru mes.

¹⁹Ora ku e zonidu di trompet a bira mas i mas duru, Moises a papia i Dios a kontest'e ku strena.

²⁰I SENOR a baha riba Seru Sinai, riba kabes di e seru, i SENOR a yama Moises bin riba kabes di e seru, i Moises a subi bai.

²¹E ora ei SENOR a bisa Moises: "Baha, spierta e pueblo pa nan no kibra pasa bin serka SENOR pa nan mira SENOR, i hopi di nan perese.

²²I tambe, laga e saserdotenan ku ta aserka SENOR konsagra nan mes, pa SENOR no kibra sali kontra nan."

²³I Moises a bisa SENOR: "E pueblo no por subi bin riba Seru Sinai, pasobra Bo a spierta nos, bisando: 'Pone limitenan ront di e seru i konsagr'e.'"

²⁴E ora ei SENOR a bis'e: "Baha i bolbe subi, abo i Aaron huntu ku bo; ma no laga e saserdotenan i e pueblo kibra pasa bin serka SENOR, pa E no kibra sali kontra nan."

²⁵Asina Moises a baha bai serka e pueblo i a bisa nan esaki.