Read Papantla Totonac Eksodo 2 Bible Online

Eksodo 2 - Papantla Totonac bible

Eksodo 2

¹Awor un homber di kas di Levi a kasa ku un yu muhe di Levi.

²I e muhe a sali na estado i a hana un yu homber; i ora ku el a mira ku e yu tabata bunita, el a skond'e tres luna largu.

³Ma ora ku e no por a skond'e mas, el a kohe un makutu di rit i a klafati'e ku asfalt i breu. E ora ei el a pone e yu aden i a pon'e meimei di e richinan kantu di Neil.

⁴I su ruman muhe tabata para na un distansia pa wak kiko lo a bai pasa kune.

⁵E ora ei yu muhe di Farao a bin pa bana den Neil. I su sirbientenan tabata kana kantu di Neil; i el a mira e makutu meimei di e richinan i a manda su sirbiente bai koh'e.

⁶Ora ku el a habrie, el a mira e mucha, i at'e mucha tabata yora. I el a hana duele di dje i a bisa: "Esaki ta un di e muchanan hebreo."

⁷E ora ei e mucha su ruman muhe a bisa yu muhe di Farao: "Bo kier mi bai yama un menchi pa bo serka e muhenan hebreo, pa e kria e yu na pechu pa bo?"

⁸I yu muhe di Farao a bis'e: "Si, bai." Asina e mucha muhe a bai yama mama di e mucha.

⁹E ora ei yu muhe di Farao a bis'e: "Tuma e yu aki, kri'e na pechu pa mi i lo mi dunabo bo pago." Asina e muhe a tuma e mucha i a kri'e.

¹⁰I e mucha a krese bira grandi, i el a hib'e pa yu muhe di Farao i el a bira su yu. I el a dun'e e nomber Moises i a bisa: "Pasobra mi a sak'e for di awa."

¹¹Awor a sosode ku tempu Moises a krese bira grandi, el a sali bai serka su rumannan i a mira nan trabou pisa; i el a mira un egipsio ta bati un hebreo, un di su rumannan.

¹²I el a wak pariba, wak pabou, i ora ku el a mira ku no tabatin ningun hende eibanda, el a dal e egipsio mata i a skond'e den santu.

¹³I su manise el a sali bai, i mira, dos hebreo tabata bringa ku otro; i el a bisa esun ku tabatin falta: "Pakiko bo ta dal bo kompanero?"

¹⁴Ma el a bisa: "Ta ken a hasibo prens of hues riba nos? Bo tin idea di matami manera bo a mata e egipsio?" E ora ei Moises a hana miedu i a bisa: "E asunto aki sigur a sali na kla."

¹⁵Ora Farao a tende di e asunto aki, el a trata di mata Moises. Ma Moises a hui bai for di presensia di Farao i a bai biba na tera di Madian; i el a kai sinta banda di un pos.

¹⁶Awor e saserdote di Madian tabatin shete yu muhe; i nan a bin pa saka awa i a yena e bakinan pa duna e karnenan di nan tata awa.

¹⁷E ora ei e wardadonan di karne a bin i a kore ku nan, ma Moises a lanta i a yuda nan i a duna nan karnenan awa.

¹⁸Ora ku e mucha muhenan a yega serka nan tata Reuel, el a bisa: "Di kon boso a bin asina lihe awe?"

¹⁹I nan a bisa: "Un egipsio a libra nos for di man di e wardadonan di karne; tambe el a saka awa pa nos i a duna e karnenan awa."

²⁰I el a bisa su yu muhenan: "Unda e ta anto? Pakiko boso a laga e homber ked'atras? Invit'e pa bin kome."

²¹I Moises tabata dispuesto pa keda biba serka e homber, i el a duna Moises su yu muhe Sefora.

²²I Sefora a duna lus na un yu homber i Moises a dun'e e nomber Gerson, pasobra el a bisa: "Mi a bira un stranhero na un tera strano."

²³Awor a sosode ku den kurso di e temporada largu ei rei di Egipto a muri. I e yunan di Israel tabata suspira den nan mes pa motibu di sklabitut, i nan tabata sklama; i nan sklamashon pa yudansa pa motibu di sklabitut a subi yega serka Dios.

²⁴Asina Dios a tende nan kehamentu, i Dios a korda riba Su aliansa ku Abraham, Isaak i Jakob.

²⁵I Dios a mira e yunan di Israel i Dios a tene kuenta ku nan situashon.