Read Papantla Totonac Eksodo 21 Bible Online

Eksodo 21 - Papantla Totonac bible

Eksodo 21

¹"Awor esakinan ta e ordenansanan ku bo mester pone nan dilanti.

²"Si bo kumpra un esklabu hebreo, e mester sirbi seis ana largu, ma e di shete ana e mester sali liber, sin paga nada.

³Si e bin su so, e mester sali bai su so; si e ta esposo di un esposa, su esposa mester sali bai huntu kune.

⁴Si su shon dun'e un esposa, i esaki hana yu hombernan of yu muhenan p'e, e esposa ku su yunan lo pertenese na e shon di e esposa, i e homber mester sali bai su so.

⁵"Ma si e esklabu bisa bon kla: 'Mi stima mi shon, mi esposa i mi yunan; mi no kier sali liber,'

⁶e ora ei su shon mester hib'e dilanti di e huesnan. Despues e shon mester hib'e na e porta of na e kosein-di-porta, i su shon mester bora su orea ku prim; i e esklabu mester sirbie pa semper.

⁷"I si un homber bende su yu muhe komo esklabu, esaki no mester sali liber manera e esklabunan homber ta hasi.

⁸Si e no ta agrada su shon ku a destin'e pa su mes, e ora ei e shon mester lagu'e wordu redimi. E no tin outoridat pa bend'e ku un pueblo stranhero, pa motibu ku el a trata kune na un manera traishonero.

⁹I si e destin'e pa su yu homber, e mester trat'e segun e derecho di yu muhe.

¹⁰Si e tuma un otro muhe pa su mes, e no mag redusi su kuminda, su pana ni su derechonan matrimonial.

¹¹I si e homber no hasi e tres kosnan aki p'e, e mester sali liber, sin paga plaka.

¹²"Esun ku dal un hende asina ku e ta muri mester wordu mata sigur.

¹³Ma si e no a hasi esaki intenshonalmente, ma ta Dios a lagu'e kai den su man, e ora ei Ami lo stipula un luga pa boso na unda e mester hui bai.

¹⁴Ma si un hende aktua ku engano pa ku su prohimo i mat'e ku astusia, bo mester kit'e for di Mi altar, pa e muri.

¹⁵"I esun ku dal su tata of su mama mester wordu mata sigur.

¹⁶"I esun ku sekuestra un hende, sea ku e ta bend'e of e wordu hana den su poder, mester wordu mata sigur.

¹⁷"I esun ku maldishona su tata of su mama mester wordu mata sigur.

¹⁸"I ora hombernan tin un pleitu i esun dal e otro ku piedra of ku moketa i e no muri, ma keda na kama,

¹⁹si e lanta kana ront pafo ku su garoti, e ora ei esun ku a dal e lo keda sin hana kastigu; solamente, e mester paga pa e dianan ku esun ku el a dal no por a traha, i perkura p'e te ora ku el a kura kompletamente.

²⁰"I si un hende dal su esklabu homber of muhe ku un bara i e muri na su man, e mester wordu kastiga.

²¹Ma si e esklabu sobrebibi un of dos dia, ningun vengansa no mester wordu tuma; pasobra ta su propiedat e ta.

²²"I si hombernan ta bringa ku otro i nan dal un muhe na estado, asina ku e ta perde su yu, ma no tin otro dano, e ora ei e homber mester paga but sigur manera esposo di e muhe eksigi di dje; i e mester paga manera e huesnan disidi.

²³Ma si tin otro dano, e ora ei bo mester pone komo kastigu bida pa bida,

²⁴wowo pa wowo, djente pa djente, man pa man, pia pa pia,

²⁵kima pa kima, herida pa herida, golpi pa golpi.

²⁶"I si un hende dal su esklabu homber of muhe den su wowo i destrui esaki, e mester lagu'e sali liber pa motibu di su wowo.

²⁷I si e dal su esklabu homber of muhe bula un djente, e mester lagu'e sali liber pa motibu di su djente.

²⁸"I si un buey kacha un homber of un muhe mata, e buey mester wordu piedra sigur, i hende no mag kome su karni; ma dono di e buey no mester hana kastigu.

²⁹Ma si un buey anteriormente tabatin kustumber di kacha i su dono a wordu spierta, i sinembargo e no ta ser'e, i e buey mata un homber of un muhe, e buey mester wordu piedra i su dono tambe mester wordu mata.

³⁰Si plaka di reskate wordu eksigi di dje, e ora ei pa redenshon di su bida e mester duna loke nan eksigi di dje.

³¹Sea ku e buey kacha un yu homber of un yu muhe, mester wordu hasi kune segun e mesun regla aki.

³²Si e buey kacha un esklabu homber of muhe, e dono mester duna dono di e esklabu trinta siklo di plata, i e buey mester wordu piedra.

³³"I si un homber habri un pos of koba un pos i keda sin tap'e, i un buey of buriku kai aden,

³⁴dono di e pos mester hasi restitushon; e mester duna plaka na dono di e bestia morto, i e bestia morto mester bira di dje.

³⁵"I si un hende su buey herida esun di un otro hende, i esaki muri, e ora ei nan mester bende e buey bibu i parti e plaka i tambe parti e buey morto.

³⁶Ma si ta konosi ku e buey anteriormente tabatin kustumber di kacha i tog su dono no a ser'e, siguramente e dono mester paga buey pa buey, i e bestia morto mester bira di dje.