Read Papantla Totonac Eksodo 22 Bible Online

Eksodo 22 - Papantla Totonac bible

Eksodo 22

¹"Si un homber horta un buey of un karne i mat'e of bend'e, e mester paga sinku buey pa esun buey, i kuater karne pa esun karne.

²"Si nan kohe un ladron ora ku e ta kibra drenta, i nan dal e, i e muri, lo no tin kulpa di sanger pa su motibu.

³Ma si esaki sosode despues ku solo a sali, lo tin kulpa di sanger pa su motibu. "E ladron siguramente mester hasi restitushon; si e no tin nada, e ora ei e mester wordu bendi pa su ladronisia.

⁴"Si loke el a horta wordu hana bibu den su poder, sea buey, buriku of karne, e mester paga dobel.

⁵"Si un hende laga su bestianan kome yerba den un kunuku of den un plantashon di wendruif, i laga nan los, asina ku nan ta kome yerba den kunuku di otro hende, e mester hasi restitushon di e miho di su mes kunuku i di e miho di su mes plantashon di wendruif.

⁶"Si un kandela sende i plama bai den mata di sumpina, asina ku mainshi mara, mainshi para den kunuku of e kunuku mes kima kaba na nada, esun ku a sende e kandela mester hasi restitushon sigur.

⁷"Si un hende duna su prohimo plaka of biennan warda p'e i nan horta esaki for di e homber su kas, si nan kohe e ladron, e mester paga dobel.

⁸Si nan no kohe e ladron, e ora ei dono di e kas mester presenta dilanti di e huesnan, pa determina si t'e a kohe propiedat di su bisina.

⁹Pasobra den tur klase di froude, sea pa buey, pa buriku, pa karne, pa pana of pa kualke kos ku a perde, di kual un hende ta bisa: 'Esaki ta di mi,' mester hiba kaso di tur dos partida dilanti di e huesnan; esun ku e huesnan kondena mester paga su prohimo dobel.

¹⁰"Si un hende duna su prohimo un buriku, un buey, un karne of kualke bestia tene p'e, i esaki muri of wordu herida of horta, sin ku ningun hende mira,

¹¹e ora ei un huramentu mester wordu hasi dilanti di SENOR, ku e prohimo no a pone man riba propiedat di e otro persona; i su dono mester asepta esaki, i e no tin mester di hasi restitushon.

¹²Ma si ta horta nan a hort'e for di dje, e mester hasi restitushon na e dono.

¹³Si e bestia a wordu habraka, lagu'e tres'e komo prueba; e no mester hasi restitushon pa loke a wordu habraka.

¹⁴"I si un hende fia un bestia serka su prohimo, i esaki keda herida of muri ora su dono no ta presente, e mester hasi restitushon kompleto.

¹⁵Si su dono ta presente, e no mester hasi restitushon; si e bestia ta gehur, e dono ta risibi e plaka di hur.

¹⁶"I si un homber sedusi un birgen ku no ta komprometi, i e drumi kune, e mester paga plaka-di-bruit pa e bira su esposa.

¹⁷Si su tata nenga apsolutamente di dun'e na e homber, e homber mester paga plaka konforme e plaka-di-bruit pa birgen.

¹⁸"No permiti pa un hasido di bruha keda na bida.

¹⁹"Ken ku tene relashon seksual ku un bestia mester wordu mata sigur.

²⁰"Esun ku ofrese sakrifisio na kualke dios, si no ta solamente na SENOR, mester wordu destrui kompletamente.

²¹"I no hasi malu na un stranhero, ni oprimie, pasobra boso tabata stranhero na tera di Egipto.

²²"No afligi ningun biuda ni werfano.

²³Si di un of otro manera bo afligie, i e sklama na Mi, lo Mi tende su sklamashon sigur;

²⁴i Mi rabia lo sende, i lo Mi mata boso ku spada; i boso esposanan lo bira biuda i boso yunan lo keda sin tata.

²⁵"Si bo fia plaka na Mi pueblo, na e pober ku ta serka bo, no hasi kune komo si fuera ta fiado di plaka bo ta; no kobr'e interes.

²⁶Si un dia bo tuma mantel di bo prohimo komo un promesa, bo tin di dun'e esaki bek prome ku solo baha,

²⁷pasobra esei ta su uniko kos pa tapa; ta su mantel pa tapa su kurpa. Den kiko otro e lo drumi? I lo sosode ku ora e sklama na Mi, Ami lo tend'e, pasobra Mi ta yen di kompashon.

²⁸"No maldishona Dios, ni maldishona un gobernante di bo pueblo.

²⁹"No tarda ku e ofrenda di bo kosecha i di bo tinashinan di bina. "E primogenito di bo yu hombernan bo mester dunaMi.

³⁰Hasi meskos ku bo buey i ku bo karne. Esaki mester keda shete dia serka su mama; riba e di ocho dia bo mester dunaMi esaki.

³¹"I boso mester ta hendenan santu pa Mi. Pesei, no kome kami habraka den kunuku; bo mester tir'e pa kacho.