Read Papantla Totonac Eksodo 23 Bible Online

Eksodo 23 - Papantla Totonac bible

Eksodo 23

¹"No plama rumor falsu; no tene man ku hende malbado komo un testigu malisioso.

²"No sigui e mayoria den hasimentu di maldat, ni testifika den un pleitu, asina ku bo ta bira bai tras di e mayoria, pa perverti hustisia;

³i no faborese un hende pober den su pleitu.

⁴"Si bo topa bo enemigu su buey of su buriku ku a perde kaminda, bo mester hib'e bek p'e sigur.

⁵Si bo mira e buriku di un hende ku ta odiabo drum! bou di su karga sin por lanta bek, no laga un hende asina sin yudansa; bo mester yud'e deskargu'e sigur.

⁶"No perverti e hustisia ku bo ruman den nesesidat tin derecho di hana den su pleitu.

⁷Keda leu for di un akusashon falsu, i no mata e hende inosente ni esun hustu, pasobra lo Mi no hustifika e kulpabel.

⁸"I no tuma plaka pasa bou di mesa, pasobra plaka pasa bou di mesa ta siega esnan ku ta mira i ta perverti kaso di e hustu.

⁹"I no oprimi hende stranhero, komo ku boso mes sa kon un stranhero ta sinti, pasobra boso tambe tabata stranhero na tera di Egipto.

¹⁰"I pa seis ana bo mester sembra bo kunuku i rekohe su kosecha,

¹¹ma e di shete ana bo mester lagu'e sosega i lagu'e keda para, asina ku esnan di bo pueblo ku ta den nesesidat por kome; i tur loke nan laga e bestianan di kunuku por kome. Hasi meskos ku bo kunuku di wendruif i ku bo hofi di oleifi.

¹²" Seis dia bo mester hasi bo trabou, ma e di shete dia bo mester stop di traha, pa asina bo buey i bo buriku por sosega, i e yu homber di bo esklabu muhe i e stranhero por hala rosea.

¹³"Awor enkuanto tur loke Mi a bisa boso, boso sea alerta; i no menta nomber di otro diosnan, ni no laga nan wordu tendi for di boso boka.

¹⁴"Tres biaha pa ana boso mester selebra un fiesta pa Mi.

¹⁵"Warda e Fiesta di Pan Sin Zurdeg; shete dia largu bo mester kome pan sin zurdeg, manera Mi a ordenabo, na e tempu stipula den luna di Abib, pasobra ta den e luna ei bo a sali for di Egipto. "I ningun hende no mag presenta Mi dilanti man bashi.

¹⁶"I warda e Fiesta di Kosecha, e prome frutanan di bo trabounan di loke bo sembra den kunuku. "Tambe e Fiesta di Rekohementu na fin di ana, ora bo ta rekohe e fruta di bo trabounan for di kunuku.

¹⁷"Tres biaha pa ana tur bo hende hombernan mester presenta dilanti di Senor DIOS.

¹⁸"No ofrese e sanger di Mi sakrifisio huntu ku pan ku zurdeg. "Ni e vet di Mi fiesta no mester keda para henter anochi te mainta.

¹⁹"Hiba e miho di e prome frutanan di bo tera den e kas di SENOR bo Dios. "No herebe un yu di kabritu den lechi di su mama.

²⁰"Mira, Mi ta bai manda un Angel bo dilanti pa wardabo na kaminda, i pa hibabo na e luga ku Mi a prepara.

²¹Paga bon tino na djé i obedese Su bos; no sea rebelde kontra djé, pasobra E lo no pordona boso transgreshon, komo ku Mi nomber ta den djé.

²²Ma si di berdat bo kier obedese Su bos i hasi tur loke Mi bisa, e ora ei Ami lo ta un enemigu pa bo enemigunan i un atversario pa bo atversarionan.

²³Pasobra Mi Angel lo bai bo dilanti i hibabo na e tera di e amoreonan, e heteonan, e ferezeonan, e kananeonan, e heveonan i e jebuseonan; i lo Mi destrui nan kompletamente.

²⁴No adora nan diosnan, ni sirbi nan, ni hasi konforme nan echonan. Bo mester derota nan kompletamente i kibra nan pilarnan sagrado na pida-pida.

²⁵Ma sirbi SENOR boso Dios, i E lo bendishona boso pan i boso awa; i lo Mi kita enfermedat for di meimei di boso.

²⁶Ningun muhe lo no perde barika ni lo no ta steril na bo tera; lo Mi kompleta e kantidat di bo dianan.

²⁷"Lo Mi manda Mi teror bo dilanti i konfundi tur pueblo kaminda bo yega, i lo Mi hasi tur bo enemigunan hui pa bo.

²⁸I lo Mi manda maribomba bo dilanti, pa nan kore ku e heveonan, e kananeonan i e heteonan for di bo dilanti.

²⁹Lo Mi no kore ku nan for di bo dilanti den un solo ana, pa e tera no bira desola i e bestianan di mondi no bira muchu hopi pa bo.

³⁰Ma poko-poko lo Mi kore ku nan for di bo dilanti, te ora bo oumenta sufisientemente pa podera di e tera.

³¹"I lo Mi stablese bo frontera for di Laman Kora te na e laman di e filisteonan, i for di e desierto te na Riu Eufrates; pasobra lo Mi entrega e habitantenan di e tera den bo man, i lo bo kore ku nan for di bo dilanti.

³²No sera ningun aliansa ku nan ni ku nan diosnan.

³³No permit! nan biba na bo tera, pa nan no hasibo peka kontra Mi; pasobra si bo sirbi nan diosnan, esaki lo ta un trampa pa bo sigur."