Read Papantla Totonac Eksodo 25 Bible Online

Eksodo 25 - Papantla Totonac bible

Eksodo 25

¹E ora ei SENOR a papia ku Moises, bisando:

²"Bisa e yunan di Israel pa tuma un ofrenda pa Mi; for di kada homber ku ta duna for di e boluntat di su kurason boso mester tuma Mi ofrenda.

³I esaki ta e ofrenda ku boso mester tuma for di nan: oro, plata i brons,

⁴hilu blou, purpura i skarlata, lino fini, lana di kabritu,

⁵kueru di karne chubatu tina kora, kueru di dolfein, palu di akasia,

⁶zeta pa e lus, spesereinan pa e zeta di unshon i pa e sensia aromatiko,

⁷piedra di oneks i piedra pa montura, pa e efod i pa e pechero.

⁸"I laga nan traha un santuario pa Mi, pa Mi keda biba meimei di nan.

⁹Konforme tur loke Mi ta bai mustrabo, manera e diseno di e tabernakel i e diseno di tur su artikulonan-di-uzo, asina boso mester trah'e.

¹⁰"I nan mester traha un arka di palu di akasia, dos kodo i mei largu, un kodo i mei hanchu i un kodo i mei haltu.

¹¹I bo mester fur'e ku oro puru; paden i pafo bo mester fur'e i traha un leishi di oro ront di dje.

¹²I bo mester basha kuater renchi di oro p'e i pega nan na su kuater pianan, i mester tin dos renchi na esun banda di dje i dos renchi na e otro banda di dje.

¹³I bo mester traha bara di palu di akasia i fura nan ku oro.

¹⁴I bo mester pasa e baranan den e renchinan na e bandanan di e arka, pa karga e arka kune.

¹⁵E baranan mester keda den e renchinan di e arka; no mester saka nan for di dje.

¹⁶I bo mester pone den e arka e testimonio ku lo Mi dunabo.

¹⁷"I bo mester traha un propisiatorio di oro puru, dos kodo i mei largu i un kodo i mei hanchu.

¹⁸I bo mester traha dos kerubin di oro; traha nan di oro bati-ku-martiu, na e dos puntanan di e propisiatorio.

¹⁹I bo mester traha un kerubin na esun punta i un kerubin na e otro punta; traha e kerubinnan di un solo pida ku e propisiatorio na su dos puntanan.

²⁰I e kerubinnan mester tin nan halanan habri manda ariba, asina kubriendo e propisiatorio ku nan halanan. E kerubinnan mester ta kara pa otro, mirando den direkshon di e propisiatorio.

²¹I bo mester pone e propisiatorio riba e arka, i pone e testimonio ku lo Mi dunabo den e arka.

²²I einan lo Mi reuni ku bo, i for di ariba di e propisiatorio, for di meimei di e dos kerubinnan ku tin riba e arka di testimonio, lo Mi papia ku bo tokante di tur loke Mi lo dunabo komo mandamentu pa e yunan di Israel.

²³"I bo mester traha un mesa di palu di akasia, dos kodo largu, un kodo hanchu i un kodo i mei haltu.

²⁴I bo mester fur'e ku oro puru i traha un leishi di oro tur ront di dje.

²⁵I bo mester traha un rant p'e di hanchura di un man; i traha un leishi di oro pa e rant ront di dje.

²⁶I bo mester traha kuater renchi di oro p'e i pone renchi na e kuater skinanan ku tin na e kuater pianan.

²⁷E renchinan mester ta pega ku e rant komo kosnan pa tene e baranan pa karga e mesa kune.

²⁸I bo mester traha e baranan di palu di akasia i fura nan ku oro, pa por karga e mesa kune.

²⁹I bo mester traha su tayonan, su kucharanan, su kanikanan i su komchinan, pa basha e ofrendanan di bibida kune; traha nan di oro puru.

³⁰I bo mester pone e pan di e Presensia riba e mesa Mi dilanti kontinuamente.

³¹"Anto bo mester traha un kandela di oro puru. E kandela, su base i su pia mester wordu traha di oro bati-ku-martiu. Su kelkinan, su konopinan di flor i su flornan mester ta di un solo pida kune.

³²E mester tin seis brasa ta sali for di su bandanan; tres brasa di e kandela for di esun banda i tres brasa di e kandela for di e otro banda.

³³Tres kelki mester wordu traha den forma di flor di amandel na esun brasa, ku un konopi di flor i un flor, i tres kelki traha den forma di flor di amandel na e otro brasa, ku un konopi di flor i un flor--asina pa seis brasa ku ta sali for di e kandela;

³⁴i na e kandela kuater kelki, traha den forma di flor di amandel ku su konopinan di flor i su flornan.

³⁵I mester tin un konopi di flor bou di e prome par di brasa ku ta sali for di dje, i un konopi di flor bou di e di dos par di brasa ku ta sali for di dje; i un konopi di flor bou di e di tres par di brasa ku ta sali for di dje, pa e seis brasanan ku ta sali for di e kandela.

³⁶Nan konopinan di flor i nan brasanan mester ta di un solo pida ku e kandela; e kos kompleto mester ta un solo pida, bati-ku-martiu for di oro puru.

³⁷"E ora ei bo mester traha su shete lampinan; i nan mester pone su lampinan di tal manera ku nan ta lusa e espasio dilanti di dje.

³⁸I su kosnan-pa-paga-lampi i nan skalchinan mester ta di oro puru.

³⁹E mester wordu traha di un talento di oro puru, huntu ku tur e artikulonan-di-uzo aki.

⁴⁰I mira pa bo traha nan konforme e diseno ku a wordu mustra na bo riba e seru.