Read Papantla Totonac Eksodo 26 Bible Online

Eksodo 26 - Papantla Totonac bible

Eksodo 26

¹"Ademas, bo mester traha e tabernakel di dies kortina di lino fini trosi, i hilu blou, purpura i skarlata; bo mester traha nan ku kerubin, e obra di un trahado eksperto.

²E largura di kada kortina mester ta bint'i ocho kodo, i e hanchura di kada kortina, kuater kodo; tur e kortinanan mester tin e mesun midi.

³Sinku kortina mester wordu pega na otro; i e otro sinku kortinanan mester wordu pega na otro.

⁴I bo mester traha lus blou na rant di e kortina di mas pafo den e prome set, i traha nan meskos na rant di e ultimo kortina den e di dos set.

⁵Traha sinkuenta lus den esun kortina, i traha sinkuenta lus na rant di e kortina ku ta den e di dos set; e lusnan mester ta un enfrente di otro.

⁶Anto traha sinkuenta klem di oro, i pega e kortinanan na otro ku e klemnan, pa e tabernakel keda tur na un.

⁷"E ora ei bo mester traha kortina di lana di kabritu komo un tent ofer di e tabernakel; traha diesun kortina na tur.

⁸E largura di kada kortina mester ta trinta kodo i e hanchura di kada kortina, kuater kodo; e diesun kortinanan mester tin e mesun midi.

⁹I bo mester pega sinku kortina na otro, hasi nan un set, i pega e otro seis kortinanan na otro, hasi nan un set, i dobla e di seis kortina na dos na e parti dilanti di e tent.

¹⁰I traha sinkuenta lus na rant di e kortina ku ta esun ultimo na e prome set, i sinkuenta lus na rant di e kortina ku ta esun ultimo na e di dos set.

¹¹E ora ei bo mester traha sinkuenta hak di brons, i pasa e haknan den e lusnan i pega e tent na otro, pa e keda tur na un.

¹²Anto e parti ku ta kologa, ku a resta di e kortinanan di e tent, e mitar kortina ku a resta, mester keda kologa na parti patras di e tabernakel.

¹³I e kodo na esun banda i e kodo na e otro banda, di loke a resta den e largura di e kortinanan di e tent, mester keda kologa na e bandanan di e tabernakel, na esun banda i na e otro banda, pa tap'e.

¹⁴I bo mester traha pa e tent un kapa di kueru di karne chubatu tina kora, i un kapa di kueru di dolfein riba esaki.

¹⁵"Anto e tablanan pa e tabernakel bo mester traha di palu di akasia, para regt.

¹⁶E largura di kada tabla mester ta dies kodo, i e hanchura di kada tabla mester ta un kodo i mei.

¹⁷Mester tin dos penchi pa kada tabla, pa pega nan na otro; asina bo mester hasi pa tur e tablanan di e tabernakel.

¹⁸I bo mester traha e tablanan pa e tabernakel, binti tabla pa e parti suit.

¹⁹I traha kuarenta pia di plata bou di e binti tablanan, dos pia bou di un tabla pa su dos penchinan i dos pia bou di un otro tabla pa su dos penchinan;

²⁰i pa e otro banda di e tabernakel, e banda nort, binti tabla;

²¹i nan kuarenta pianan di plata: dos pia bou di un tabla i dos pia bou di un otro tabla.

²²I pa e parti patras di e tabernakel, parti pabou, bo mester traha seis tabla.

²³I bo mester traha dos tabla pa e skinanan di e tabernakel, parti patras.

²⁴Nan mester ta pega na otro na e parti abou i pega na otro na e parti ariba, ku un renchi. Asina mester ta pa nan tur dos. Nan mester forma e dos skinanan.

²⁵I mester tin ocho tabla ku nan pianan di plata, dieseis pia: dos pia bou di esun tabla i dos pia bou di e otro tabla.

²⁶"E ora ei bo mester traha baranan di palu di akasia, sinku pa e tablanan di esun banda di e tabernakel,

²⁷sinku bara pa e tablanan di e otro banda di e tabernakel, i sinku bara pa e tablanan di e banda patras di e tabernakel, parti pabou.

²⁸Anto e bara di meimei mester pasa dor di e tablanan, net meimei, di punta pa punta.

²⁹Bo mester fura e tablanan ku oro i traha nan renchinan di oro pa tene e baranan kune; i fura e baranan ku oro.

³⁰"E ora ei bo mester lanta e tabernakel konforme su plan ku a wordu mustra na bo riba e seru.

³¹"I bo mester traha un velo di hilu blou, purpura i skarlata, i lino fini trosi. E mester wordu traha ku kerubin, e obra di un trahado eksperto.

³²I bo mester kologu'e na kuater pilar di palu di akasia, fura ku oro. Nan haknan tambe mester ta di oro, riba kuater pia di plata.

³³I bo mester kologa e velo bou di e haknan i hiba e arka di testimonio eiden, tras di e velo; i e velo mester sirbi pa bo komo un separashon entre e luga santu i e luga santisimo.

³⁴I bo mester pone e propisiatorio riba e arka di testimonio den e luga santisimo.

³⁵I bo mester pone e mesa pafo di e velo i e kandela enfrente di e mesa parti suit di e tabernakel, i pone e mesa na e banda nort.

³⁶"I bo mester traha un skerm pa e entrada di tent, di hilu blou, purpura i skarlata, i lino fini trosi, e obra di un wefdo-di-tela.

³⁷I bo mester traha sinku pilar di palu di akasia pa e skerm i fura nan ku oro; nan haknan tambe mester ta di oro; i bo mester basha sinku pia di brons pa nan.