Read Papantla Totonac Eksodo 27 Bible Online

Eksodo 27 - Papantla Totonac bible

Eksodo 27

¹"I bo mester traha e altar di palu di akasia, sinku kodo largu i sinku kodo hanchu; e altar mester ta firkant, i su haltura mester ta tres kodo.

²I bo mester traha su kachunan na su kuater skinanan; su kachunan mester forma un solo pida kune. I bo mester fur'e ku brons.

³I bo mester traha su hemchinan pa saka su shinishi, i su skopnan, su puncheronan, su forkinan i su weanan-pa-kandela; i bo mester traha tur su artikulonan-di-uzo di brons.

⁴I bo mester traha p'e un roster di brons, i na e net bo mester traha kuater renchi di brons na su kuater skinanan.

⁵I bo mester pone esaki bou di rant di e altar, parti abou, pa e net yega na mitar di e haltura di e altar.

⁶I bo mester traha baranan pa e altar, baranan di palu di akasia, i fura nan ku brons.

⁷I su baranan mester wordu pasa den e renchinan, asina ku e baranan lo keda na kada banda di e altar ora ta kargu'e.

⁸Bo mester traha e altar hol, di tabla; manera a wordu mustra na bo riba e seru, asina nan mester trah'e.

⁹"I bo mester traha e plenchi di e tabernakel. Na e parti suit mester tin pa e plenchi kortina di lino fini trosi, shen kodo largu na esun banda;

¹⁰i su binti pilarnan ku nan binti pianan mester ta di brons; e haknan di e pilarnan ku nan banchinan mester ta di plata.

¹¹I meskos, pa e largura di e parti nort mester tin kortina shen kodo largu, ku su binti pilarnan ku nan binti pianan di brons; e haknan di e pilarnan i nan banchinan mester ta di plata.

¹²"I pa e hanchura di e plenchi parti pabou mester tin kortina di sinkuenta kodo ku nan dies pilarnan i nan dies pianan.

¹³I e hanchura di e plenchi parti pariba mester ta sinkuenta kodo.

¹⁴E kortinanan pa esun banda di e entrada mester ta diesinku kodo, ku nan tres pilarnan i nan tres pianan.

¹⁵I pa e otro banda mester tin kortina di diesinku kodo, ku nan tres pilarnan i nan tres pianan.

¹⁶"I pa entrada di e plenchi mester tin un skerm di binti kodo largu di hilu blou, purpura i skarlata, i lino fini trosi, e obra di un wefdo-di-tela, ku nan kuater pilarnan i nan kuater pianan.

¹⁷Tur e pilarnan tur ront di e plenchi mester tin banchi di plata ku nan haknan di plata i nan pianan di brons.

¹⁸E largura di e plenchi mester ta shen kodo i su hanchura sinkuenta kodo tur kaminda, i su haltura sinku kodo di lino fini trosi, ku nan pianan di brons.

¹⁹Tur e artikulonan-di-uzo di e tabernakel ku ta wordu uza den tur su sirbishi, ku tur su stakanan, ku tur e stakanan pa e plenchi, mester ta di brons.

²⁰"I bo mester duna ordu na e yunan di Israel pa nan trese pa bo zeta puru di oleifi bati pa e lus, pa por laga un lampi sende kontinuamente.

²¹Den e tent di reunion, pafo di e velo ku tin dilanti di e testimonio, Aaron ku su yu hombernan mester perkura pa e lampi for di atardi te mainta dilanti di SENOR; esaki mester ta un statuto perpetuo pa e yunan di Israel durante di tur nan generashonnan.