Read Papantla Totonac Eksodo 28 Bible Online

Eksodo 28 - Papantla Totonac bible

Eksodo 28

¹"E ora ei trese serka bo, bo ruman homber Aaron i su yu hombernan: Nadab, Abiu, Eleazar ku Itamar, huntu kune, for di entre e yunan di Israel, pa sirbiMi komo saserdote.

²I bo mester traha pananan santu pa bo ruman homber Aaron, pa gloria i pa bunitesa.

³I bo mester papia ku tur e personanan eksperto ku Mi a yena ku e spiritu di sabiduria, pa nan traha Aaron su pananan, pa konsagr'e pa e sirbiMi komo saserdote.

⁴I esakinan ta e pananan ku nan mester traha: un pechero, un efod, un mantel i un tunika borda, un tulban i un faha, i nan mester traha pananan santu pa bo ruman homber Aaron ku su yu hombernan, pa e sirbiMi komo saserdote.

⁵I nan mester kohe e hilu di oro i e hilu blou, purpura i skarlata, i e lino fini.

⁶"Nan mester traha e efod di oro, di hilu blou, purpura i skarlata, i lino fini trosi, e obra di e trahado eksperto.

⁷E efod mester tin dos strep-di-skouder pega na su dos puntanan, i asina e lo keda pega na otro.

⁸I e banchi masha fini gewef ku tin na dje mester ta di e mesun kalidat di obra, di e mesun material: di oro, di hilu blou, purpura i skarlata, i lino fini trosi.

⁹"I bo mester kohe dos piedra di oneks i graba e nombernan di e yunan di Israel riba nan,

¹⁰seis di nan nombernan riba esun piedra, i e nombernan di e seisnan ku a resta riba e otro piedra, segun e ordu di nan nasementu.

¹¹Manera un hoyero ta graba un seyo, asina bo mester graba e dos piedranan segun e nombernan di e yunan di Israel, i pega nan den montura di oro filigrana.

¹²I bo mester pone e dos piedranan na e strepnan-di-skouder di e efod, komo piedranan di konmemorashon pa e yunan di Israel, i Aaron mester karga nan nombernan dilanti di SENOR riba su dos skoudernan komo un konmemorashon.

¹³I bo mester traha monturanan di filigrana di oro,

¹⁴i dos kadena di oro puru; bo mester traha nan manera kordon trosi i pega e kadenanan, ku a wordu trosi manera kordon, na e monturanan di filigrana.

¹⁵"I bo mester traha un pechero di huisio, e obra di un wefdo-di-tela eksperto; manera e obra di e efod bo mester trah'e: di oro, di hilu blou, purpura i skarlata, i lino fini trosi bo mester trah'e.

¹⁶E mester ta firkant i dobla na dos, un span largu i un span hanchu.

¹⁷I bo mester pega kuater kareda di piedra na dje; e prome kareda mester ta un kareda di rubi, topasio i esmeralda;

¹⁸i e di dos kareda: un turkesa, un safiro i un djamanta;

¹⁹i e di tres kareda: un yasinto, un agata i un amatista;

²⁰i e di kuater kareda: un berilo, un oneks i un yaspe; nan mester wordu pega den filigrana di oro.

²¹I e piedranan mester ta segun e nombernan di e yunan di Israel: diesdos, segun nan nombernan; nan mester ta manera grabashon den un seyo, kada un segun su nomber pa e diesdos tribunan.

²²"I riba e pechero bo mester traha kadenanan manera kordon trosi di oro puru.

²³I riba e pechero bo mester traha dos renchi di oro, i pega e dos renchinan na e dos puntanan di e pechero.

²⁴I bo mester pasa e dos kordonnan di oro den e dos renchinan na e puntanan di e pechero.

²⁵I bo mester pega e dos otro puntanan di e dos kordonnan na e dos monturanan di filigrana, i pone nan na e strepnan-di-skouder di e efod, na su parti dilanti.

²⁶I bo mester traha dos renchi di oro i pone nan na e dos puntanan di e pechero, na su rant ku ta keda na e parti paden di e efod.

²⁷I bo mester traha dos renchi di oro i pone nan na e parti abou di e dos strepnan-di-skouder di e efod, na su parti dilanti, pega ku e luga kaminda e ta pega na otro, riba e banchi masha fini gewef di e efod.

²⁸I ku su renchinan nan mester mara e pechero pegu'e na e renchinan di e efod ku un kordon blou, pa e keda riba e banchi masha fini gewef di e efod, i pa e pechero no los for di e efod.

²⁹"I Aaron mester karga e nombernan di e yunan di Israel den e pechero di huisio riba su kurason, ora ku e drenta e luga santu, komo un konmemorashon dilanti di SENOR, kontinuamente.

³⁰I bo mester pone den e pechero di huisio e Urim i e Tumim, i nan mester ta riba Aaron su kurason ora ku e ta drenta dilanti di SENOR; i Aaron mester karga e huisio di e yunan di Israel riba su kurason dilanti di SENOR, kontinuamente.

³¹"I bo mester traha e mantel di e efod tur blou.

³²I mester tin un habri na su parti ariba meimei; tur ront di e habri mester tin un rant di obra gewef, manera e habri di un bisti di guera, pa e no tornu.

³³I na su zom bo mester traha granatapel di hilu blou, purpura i skarlata, tur ront na su zom, i bel di oro entre nan, tur ront:

³⁴un bel di oro i un granatapel, un bel di oro i un granatapel, tur ront na zom di e mantel.

³⁵I Aaron mester bisti esaki ora ku e ta sirbi; i por tende zonidu di esaki ora ku e ta drenta i ora ku e ta sali di e luga santu dilanti di SENOR, pa e no muri.

³⁶"Tambe bo mester traha un plachi di oro puru i graba riba dje, manera grabashon di un seyo: 'Santu pa SENOR.'

³⁷I bo mester pegu'e na un kordon blou i esaki mester ta na e tulban; e mester ta na e parti dilanti di e tulban.

³⁸I e mester ta na Aaron su frenta, i Aaron mester karga e inikidat di e kosnan santu ku e yunan di Israel ta konsagra, relashona ku tur nan regalonan santu; i esaki mester ta semper riba su frenta, pa nan por wordu asepta dilanti di SENOR.

³⁹"I bo mester wef e tunika di lino fini, i traha un tulban di lino fini, i traha un faha, e obra di un wefdo-di-tela.

⁴⁰I pa e yu hombernan di Aaron bo mester traha tunika; tambe bo mester traha faha pa nan i traha pana pa mara kabes pa nan, pa gloria i pa bunitesa.

⁴¹I ku esakinan bo mester bisti bo ruman Aaron i su yu hombernan huntu kune, i ungi nan i konsagra nan i santifika nan, pa nan sirbiMi komo saserdote.

⁴²"I bo mester traha pana djabou di lino pa nan, pa tapa nan sunu; esakinan mester yega di nan kustia te na nan bel di pia.

⁴³I Aaron ku su yu hombernan mester tin esakinan bisti ora nan ta drenta den e tent di reunion, of ora nan ta aserka e altar pa sirbi den e luga santu, pa nan no bira kulpabel i muri. "Esaki mester ta un statuto pa semper pa Aaron i pa su desendientenan despues di dje.