Read Papantla Totonac Eksodo 29 Bible Online

Eksodo 29 - Papantla Totonac bible

Eksodo 29

¹"Awor esaki ta loke bo mester hasi ku nan pa konsagra nan pa sirbiMi komo saserdote: kohe un bishe machu i dos karne chubatu sin defekto,

²i pan sin zurdeg, pan buskuchi sin zurdeg meskla ku zeta, i oblea sin zurdeg hunta ku zeta; bo mester traha nan di harina fini di trigo.

³I bo mester pone nan den un makutu i presenta nan den e makutu huntu ku e bishe machu i e dos karnenan chubatu.

⁴E ora ei bo mester hiba Aaron ku su yu hombernan na entrada di e tent di reunion i laba nan ku awa.

⁵I bo mester kohe e pananan i bisti Aaron e tunika, e mantel di e efod, e efod i e pechero, i fah'e ku e banchi masha fini gewef di e efod;

⁶i pone e tulban riba su kabes i pone e korona santu riba e tulban.

⁷E ora ei bo mester kohe e zeta di unshon i basha esaki riba su kabes i ungie.

⁸I bo mester trese su yu hombernan i bisti nan e tunikanan.

⁹I bo mester faha nan ku faha, Aaron ku su yu hombernan, i mara pana na nan kabes. Nan mester tin e saserdosio komo un statuto perpetuo. Asina bo mester konsagra Aaron ku su yu hombernan.

¹⁰"E ora ei bo mester hiba e bishe machu dilanti di e tent di reunion, i Aaron ku su yu hombernan mester pone nan mannan riba kabes di e bishe machu.

¹¹I bo mester mata e bishe machu dilanti di SENOR na entrada di e tent di reunion.

¹²I ku bo dede bo mester kohe un poko di e sanger di e bishe machu i pone esaki na e kachunan di e altar, i basha tur e sanger na pia di e altar.

¹³I bo mester kohe tur e vet ku ta tapa e shirishiri i e vet di e higra, e dos nirnan i e vet ku tin na nan, i kima nan riba e altar.

¹⁴Ma e karni di e bishe machu ku su kueru i su mest bo mester kima ku kandela pafo di e kampamentu; ta un ofrenda pa pika.

¹⁵"Tambe bo mester kohe un di e karnenan chubatu, i Aaron ku su yu hombernan mester pone nan mannan riba kabes di e karne chubatu;

¹⁶i bo mester mata e karne chubatu i kohe su sanger i sprengu esaki tur ront riba e altar.

¹⁷E ora ei bo mester korta e karne chubatu na su diferente pidanan i laba su shirishiri i su patanan, i pone nan huntu ku su pida-pidanan i su kabes.

¹⁸I bo mester kima henter e karne chubatu riba e altar; esaki ta un ofrenda kima na SENOR: e ta un holo dushi, un ofrenda di kandela na SENOR.

¹⁹"E ora ei bo mester kohe e otro karne chubatu, i Aaron ku su yu hombernan mester pone nan mannan riba kabes di e karne chubatu.

²⁰I bo mester mata e karne chubatu i kohe un poko di su sanger i pone esaki na e klep di orea drechi di Aaron, na e klep di orea drechi di su yu hombernan, na e duim di nan man drechi i na e dede grandi di nan pia drechi, i sprengu restu di e sanger tur ront riba e altar.

²¹E ora ei bo mester kohe un poko di e sanger ku tin riba e altar i un poko di e zeta di unshon, i sprengu esaki riba Aaron i riba su pananan, riba su yu hombernan i riba e pananan di su yu hombernan, asina ku tantu e komo su pananan lo ta konsagra, i tambe su yu hombernan i e pananan di su yu hombernan.

²²"Tambe bo mester kohe e vet di e karne chubatu i e rabu gordo, e vet ku ta tapa e shirishiri i e vet di e higra, e dos nirnan i e vet ku tin na nan i e pia drechi (pasobra e ta un karne chubatu di konsagrashon),

²³i un pan buskuchi, un pan buskuchi meskla ku zeta i un oblea for di e makutu di pan sin zurdeg, ku ta poni dilanti di SENOR;

²⁴i pone tur esakinan den man di Aaron i den man di su yu hombernan, i zoya nan komo un ofrenda di zoyamentu dilanti di SENOR.

²⁵I bo mester tuma nan for di nan man i kima nan riba e altar, riba e ofrenda kima, komo un holo dushi dilanti di SENOR; ta un ofrenda di kandela na SENOR.

²⁶E ora ei bo mester kohe e pechu di Aaron su karne chubatu di konsagrashon, i zoya esaki komo un ofrenda di zoyamentu dilanti di SENOR; i esaki lo ta bo porshon.

²⁷"I bo mester konsagra e pechu di e ofrenda di zoyamentu i e pia di e ofrenda di halsamentu ku a wordu zoya i ku a wordu ofresi for di e karne chubatu di konsagrashon, for di esun ku tabata pa Aaron i for di esun ku tabata pa su yu hombernan.

²⁸I esaki mester ta pa Aaron ku su yu hombernan komo nan porshon pa semper for di e yunan di Israel, pasobra e ta un ofrenda di halsamentu; i esaki mester ta un ofrenda di halsamentu di e yunan di Israel, for di e sakrifisionan di nan ofrendanan di pas, nan ofrenda di halsamentu na SENOR.

²⁹"I e pananan santu di Aaron mester ta pa su yu hombernan despues di dje, pa nan wordu ungi i konsagra den nan.

³⁰Shete dia largu e yu homber di Aaron ku ta saserdote na su luga mester bisti nan ora ku e ta bai den e tent di reunion pa sirbi den e luga santu.

³¹"I bo mester kohe e karne chubatu di konsagrashon i herebe su karni den un luga santu.

³²I Aaron ku su yu hombernan mester kome e karni di e karne chubatu i e pan ku ta den e makutu, na entrada di e tent di reunion.

³³Asina nan mester kome e kosnan ei pa medio di kual ekspiashon a wordu hast dia di nan konsagrashon i santifikashon; ma un stranhero no mag kome nan, pasobra nan ta kosnan santu.

³⁴I si algu di e karni di konsagrashon of algu di e pan keda te su manise, e ora ei bo mester kima loke a keda ku kandela; no mag kome esaki, pasobra e ta un kos santu.

³⁵"I asina bo mester hasi ku Aaron i su yu hombernan konforme tur loke Mi a ordenabo; bo mester konsagra nan durante di shete dia.

³⁶I tur dia bo mester ofrese un bishe machu komo un ofrenda pa pika pa ekspiashon, i purifika e altar ora bo ta hasi ekspiashon p'e; i ungie pa konsagr'e.

³⁷Shete dia largu bo mester hasi ekspiashon pa e altar i konsagr'e; e ora ei e altar lo ta masha santu mes, i kiko ku bin den kontakto ku e altar lo ta santu.

³⁸"Awor esaki ta loke bo mester ofrese riba e altar: dos lamchi di karne di un ana tur dia, kontinuamente.

³⁹Bo mester ofrese esun lamchi mainta, i e otro lamchi ora nochi ta sera;

⁴⁰i mester tin un desimo parti di un efa di harina fini meskla ku un di kuater parti di un hin di zeta bati i un di kuater parti di un hin di bina komo un ofrenda di bibida pa esun lamchi.

⁴¹I bo mester ofrese e otro lamchi ora nochi ta sera, i ofrese huntu kune e mesun ofrenda di mainshi meskos ku mainta i e mesun ofrenda di bibida, komo un holo dushi, un ofrenda di kandela na SENOR.

⁴²"E mester ta un ofrenda kima kontinuo durante di tur boso generashonnan na entrada di e tent di reunion dilanti di SENOR, kaminda Ami lo reuni ku boso, pa papia ku boso ayanan.

⁴³I ayanan lo Mi reuni ku e yunan di Israel, i e luga lo wordu konsagra pa medio di Mi gloria.

⁴⁴"I lo Mi konsagra e tent di reunion i e altar; tambe lo Mi konsagra Aaron ku su yu hombernan pa sirbiMi komo saserdote.

⁴⁵I lo Mi biba meimei di e yunan di Israel i lo ta nan Dios.

⁴⁶I nan lo sa ku Ami ta SENOR nan Dios, Kende a saka nan for di tera di Egipto, pa Mi biba meimei di nan; Ami ta SENOR nan Dios.